الموضوع: متحرمش نفسك من العربية اللي نفسك فيها (هو انت هاتعيش كام مرة؟)

المشاركة الأصلية كتبت بواسطة amrico

في البداية الموضوع غير موجه لأي شخص قام بشراء اللانسر البومة بناء على اقتناع فني بإمكانيات العربية وليس تبعا لسياسة زيي زي الناس

الموضوع ده انا عملته عشان بجد مش لاقي تفسير للإنتشار المريع للانسر البومة في الشوارع
وفي نفس الوقت تدخل المعارض تلاقيها مازالت نجمة المعارض الأولى

ملاك البومة نوعين ناس بتفهم في العربيات زي اعضاء المنتدى مثلا وجايبينها عن اقتناع بالإمكانيات الفنية بتاعتها وطبعا رأيهم يحترم
والنوع الثاني ناس بتقلد وخلاص ودول معظم ملاك البومة في المحروسة

وهاقسم موضوعي لأربع نقاط هانتكلم فيهم
1- ليه تشتري عربية وبتفكر ازاي هاتبيعها قبل ماحتى تركبها؟
2- ليه كل واحد مايكونش ليه رأي ويجيب اللي يجيبه الناس وخلاص (إلا من رحم ربي)؟
3- ليه حتي لما بتقلد وتجيب عربية لازم تقلد بالتفصيل الممل (يعني لازم اللون يكون فضي الا من رحم ربي برضه)؟
4- بعض امثلة اللانسريزم في مصر (وخارج مصر)
================================
1- لو نلاحظ المصري منذ قديم الأزل بيفني عمره يبني في المقبرة اللي هايندفن فيها بعد مايموت ويضيعله يجي 20 سنة من عمره يبني فيها، طيب ماكنت تعيش الأول هو العمر فيه كام 20 سنة
برضه في العربيات موجودة الفكرة دي

واحد صاحبي راكب لانسر بومة فضي، وكان بيحلم انه يركب سيات كوردوبا، وكل مايشوف السيات في الشارع يقعد يتحسر، وكان سببه الوحيد انه جاب اللانسر انها بتتباع زي الهوا وخفيفة في البيع
انما السيات تقيلة جدا في البيع ومش هاتتباع رغم اقتناعة بالجودة العالية للسيات
عارفين العربية دي بقالها معاه 4 سنين دلوقت ومش بيفكر يغيرها عشان مش عارف السوق رايح فين واهي اي حاجة والسلام
هو الإنسان عنده كام 4 سنين في حياته عشان يضيعهم راكب عربية بحجة انه هايبيعها ويمكن مايبيعهاش، ويفضل يتحسر على حاجة كل مايشوفها في الشارع
ياناس ماكل واحد يركب اللي بيحبه وبلاش كدا
لو فضلنا نبيع قبل مانشتري لما نغير هانشتري برضه حاجة بتتباع وخفيفة في البيع طالما هو دا التفكير العملي
يعني مثلا لو عندك بومة 2003 هاتيجي تغيرها هاتلاقي نفسك بتفكر في بومة 2008 مثلا عشان تعرف تبيعها يبقى فين التجديد؟
================================

2- لو سلمنا بالأمر ان كل واحد عاوز يجيب حاجة بتتباع وخلاص، طيب مافي انواع تانية بتتباع برضه ويمكن فنيا لو مش في نفس المستوى هاتكون احسن من البومة، زي التويوتا كورولا مثلا. دا غير ان اكيد اي عربية دلوقت ليها برستيج اكتر من البومة اللي راكبها اي حد، والله العظيم اي حد
طبعا هاتلاقي الناس يقولك العربية دي شيء عملي وبيأدي الغرض ومش مهم حكاية البرستيج دي، طيب ليه المصريين مش عمليين غير في حكاية اللانسر البومة بس.
وهاقول امثلة

- لو نشوف كمية الأكل الصالحة للأكل وبتترمى من البيوت عشان تم شراء كميات زيادة هل دا شعب بيفكر بطريقة عملية؟

- لما العيش بيندفع مليارات عشان نستورد القمح بتاعه الناس تشتريه عشان تأكله للفراخ دا غير اللي بيترمي منه هل دا شعب بيفكر بطريقة عملية؟

- لما كل واحد تلاقيه لازم وحتما ولا بد ينزل بالعربية يلف في الشوارع الزحمة في ال week end حتى بلا هدف ويزيد الشوارع زحمة على زحمتها ويحرق بنزين ويقرف نفسه ويقرف الناس ويتخانق ومايلاقيش مكان يركن فيه ويلاقي نفسه بقاله 5 او 6 ساعات في الشارع ومش عارف لسه هايعمل ايه، هل دا شعب بيفكر بطريقة عملية؟

- لما تلاقي العروسة لازم تشتري اطقم صيني غالية جدا وحلل قد ايه وصواني بأعداد كبيرة ويمكن ماتستخدمهمش طول حياتها لحد ماتموت هل دا شعب بيفكر بطريقة عملية؟

الأمثلة كتير بس حكاية التفكير العملي دي بتيجي كحجة غير حقيقية بالمرة، والا لكنا في مقدمة الدول انتاجيا واقتصاديا طالما كلنا خبراء اقتصاد وسوق كدا.
================================
3- اللون الفضي
دي نقطه بجد مش لاقيلها معنى بس هي نقطة للترفيه في الموضوع
وياريت كل واحد يقولي في كام لانسر بومة فضي بيشوفها لما يبص من البلكونة ولا من الشباك ولا حتى من خرم ابرة
سامع حد بيقول اللون الفضي بيستحمل التراب اللي مالي البلد، بس الفواتح كلها بتستحمل، ومش معقول اذواق الناس كلها واحدة في عشق اللون الفضي

ولو حد عاوز يجيب لحد حول او يجيبله شلل رعاش او التهاب سحائي او انفصال في الشبكية بسيطة قوي
بس يطلب منه يعد كام لانسر بومة فضي بتعدي في الشارع في الدقيقة
بيتهيألي متابعة مباراة بنج بونج ولا تنس اسهل واريح للعين

================================
4- بعض الأمثلة لمرض اللانسريزم

- واحد اتعرفت عليه (خريج تجارة) قابلته مع واحد صاحبي على كافيه وقال انه عنده لانسر بومة، سألته هي 1300 ولا 1600 مكانش متأكد وقالي هي زي دي بالضبط، وراح مشاور على واحدة من ال 4000 لانسر بومة اللي راكنين في الشارع قدام الكافيه، وطبعا هما جايبينها عنده في البيت عشان كل الناس جايبينها (على حد كلام الراجل)

- انا حاليا في سلطنة عمان، واحد زميلنا عماني الجنسية عمل حادثة طريق بسيطة مع واحدة ست، لقيته بيطلبني يقولي انا عملت حادثة مع واحدة ست مصرية وبعد ماطمنت ان الحمد لله مفيش خساير قالي ان الست كانت راكبة لانسر بومة ( العقدة وصلت لبرة ) و 90% لو شفت لانسر بومة في الخليج (رغم ندرتها) تلاقي اللي راكبها مصري

- كام مرة يحصلي اني اكون مثلا في اشارة والاقي قدامي وورايا ويميني وشمالي لانسر بومة وساعات بتكمل والاقيها فضي

- كام مرة تلاقي البومة الفضي اللي بيقلبلك نور عشان يعديك وتفتحلة وبمجرد مايعديك وتيجي تعدي تلاقي ان دي بومة تانية مش البومة الأولانية، حاجة تجيب هستريا

وفي امثلة كتير

وهاقتبس مشاركية ليا في موضوع تاني

انا سامع ان هايبقى في اطباء نفسيين اخصائيين لعلاح الناس من اللانسريزم

واللانسريزم هو مرض ينقسم الى شقين

لانسريزم ايجابي (وهو ده الخطير) وهو الإصرار على شراء عربية داخلة على 8 سنين بنفس الشكل وبتغلى والناس واقفين عليها طوابير زي زيت الجمعيات والمصيبة انها لسة وهاتفضل تتباع زيرو

لانسريزم سلبي (ودول الغلابة) وهم الناس اللي بيعانو من الإنتشار البشع السافر الفائق للحد للانسر وخصوصا اللون الفضي منها

ومحدش ينكر ان كل العربيات الياباني كويسة
التويوتا كويسة، المازدا كويسة، الدايهاتسو كويسة، النيسان كويسة، والمتسوبيشي كويسة
لكن الناس ماسكين بإيدهم وسنانهم في البومة ومش عاوزين يسيبوها

وفي نهاية الموضوع
اسجل احترامي لكل عضو محترم اشترى البومة بناء على اقتناع فني ودا طبعا راجل محترم واشيله على دماغي، لأن الإقتناع الفني النابع من تجربة شيء يجب احترامه

هههههههه انا مش بغزيظك بس والله اليوم الى عملت فى الموضوع انا روحت البيت للقيت خالى باع النوبيرا واشترى لانسر فضى اتوماتيك بس الشكل الى هوا قبل البومة على طول الى هوا الشكة بتاعة على شكل ننص دائرة مش شكل الشبكة بتاعة البوما