الموضوع: متحرمش نفسك من العربية اللي نفسك فيها (هو انت هاتعيش كام مرة؟)

المشاركة الأصلية كتبت بواسطة alisleman

المشكلة فعلا فى التقليد بتاع المصرى فى العربيات وفى المشاريع وفى كل حاجة

عندك حق طبعا التقليد في كل حاجة حتى المشاريع
واحد يفتح سوبر ماركت 10 يفتحوا حواليه

المشاركة الأصلية كتبت بواسطة mahmoud saloum

انا اول ماجيبت الميجان كنت راكن فى جراش الشركة التى اعمل بها المهم وانا مروح لقيت واحد معانا فى الشغل معاه لانسر بومة فضى "للعلم احنا عندنا فى جراش الشركة حوالى عشرة حداشر لانسر بومة ومعظمهم فضى" المهم الافندى لقيته بيقولى هيا ايه البتاعة اللى انت جايبها دى. مرضيتش ارد عليه برده اكبر منى والادب فضلوه عن العلم. لقيته بيقولى مش دى رينو برده؟ طيب لما انت معاك تجيب رينو مجيبتش لانسر ليه؟ بصراحة لقيت نفسى انفجرت فيه وقلتله لانها بقت زى ال128 و بياعين السمك و السباكين راكبينها وانا طريقة تفكيرى مختلفة عن الفئة دى من الناس. (طبعا انا غلطان وتجاوزت بس كنت طهقان طهقان ومش مستحمل اى غباء على اخر النهار) لقيته سكت وقالى بس هيا قطع غيارها غالية . قولتلوا واللانسر قطع غيارها رخيصة قام سكت ومشى.

المهم بعيد عن القصة دى انا عندى الشركة بتأجر عربيات بالسواق لمشاوير الشغل وبكون سعيد جدا لما الاقيهم جايبينلى عربية لانسر بصراحة برتاح فيها والعربية فعلا كويسة بس برده مشتريتهاش لان على رأيك المفروض اركب اللى عاجبنى اكتر واللى انا مرتحله اكتر.

اخيرا انا ضد اننا نلوم على الناس على حكاية اليونيفورم "كله يشترى زى بعضه" لان بعد القصة اللى فوق ما حصلت قعدت مع نفسى وقلت ايه اللى يخلى الراجل ده والناس عامة تفكر كده "مادام معاك فلوس اللانسر يبقى لازم تشتريها" ولاقيت 3 اسباب:
1- التوكيل -- (وما يستتبعه من نقص قطع الغيار وغلوها وضعف الصيانة او العكس)
2- رأى الجمهور ! -- يعنى تخيل انت بتسال 100 فرد ، ايه رأيكم ايه افضل سيارة فى السعر الفلانى والمية فيهم 60 معاهم لانسر . يبقى رأى الجمهور 60% لانسر يبقى لو انت ملاكش خبرة "وده معظم الناس" هتاخد برأى الجمهور وتجيب لانسر
3- الشائعات -- واحد عنده مشكلة فى ال mmt يبقى الكورولا الجنوب افريقى مضروبة، واحد عطلت منه الميجان فى الطريق يبقى الميجان بتجيب حساسات وبعدين تضرب بوردة !! الهوندا بتحك فى المطبات يبقى الهوندا مش معمولة لشوارع مصر، واحد طويل ركب مازدا 3 وقال ضيقة تبقى المازدا 3 ضيقة ومتنفعش لعيلة . يبقى فاضل ايه لانسر طبعا :) :) وهكذا . وفى النهاية شكرا للموضوع المتميز

بقى الميجان يتقال عليها البتاعه دي
ربنا يشفي وربنا يبارك لحضرتك في سيارتك الراقية ويكفيك شرها وشكرا لمساهمتك في تغيير اشكال العربيات في الشارع بشراء حاجة غير اللانسر

المشاركة الأصلية كتبت بواسطة ahah

المشكلة فعلا فى التقليد بتاع المصرى في كل حاجه

بالضبط كدا
تلاقي واحد يشتري بنطلون كل اصحابه يجيبوا زيه

المشاركة الأصلية كتبت بواسطة ahmed73

بصراحة موضوع رائع والفكرة العامة حصلت معايا
انا كان معايا ريجاتا قعدت معايا 4 شهور وبعتها وكنت بادور على عربية أخرى الميكانيكى اللى جانبى اقترح عليا هيونداى أو فيات 131 ولو معايا فلوس شوية أجيب لانسر كريستالة وجابلى عدة سيارات - جوز أختى قالى عليك وعلى هيونداى اكسيل أو 131 دى كسبانة ومافيش منها - اخى قاللى لانسر - لانسر - لانسر والمهم يجيبولى عربيات مبهدلة وجربانة ومكانها الطبيعى انها تتكهن ويتفرجوا عليها وعجباهم وخلاص بيتكلموا وعايزين يخلصوا فيها بحكم انهم الخبراء وانا المتفرج.
المهم والفضل لله أولا ولمنتدانا العزيز ثانيا - خلانى اعرف ازاى اختار السيارة واتفرجت من خلاله على سيارات كتير واستعرضت المزايا والعيوب إلى أن هدانى الله إلى ان اشترى فورد اسكورت 1300 موديل 98 وعينك ما تشوف الا النور.
هى دى عربية - ما لهاش قطع غيار عندنا (انا من الفيوم) - كل ما حاجة تعطل لازم تروح تجيبها من القاهرة - دى عربية مش بياعة - قطع غيارها غالية جدا (ما تتباعش عند البقالين) - ما حدش بيفهم فيها - دى بلاعة بنزين.
بصراحة انا احمد الله على هذه السيارة لأنها فعلا محترمة ، وإن شاء الله لما أبيعها هاشترى تانى فورد
عموما البومة لما يكون لونها أحمر والفرش الداخلى جلد بيج فاتح بيكون شكلها حلو وجميل.

ربنا يبارك لحضرتك في عربيتك ويكفيك شرها
وشكرا لمساهمتك الإيجابية في تغيير اشكال العربيات اللي ماشية في الشارع بحاجة غير البومة

المشاركة الأصلية كتبت بواسطة successcre8or

مفيش فايدة يا أستاذ...
انا شابف بصراحة ان معظم الناس بتكون تعبانة في فلوسها .. عشان كدا مش عايزة حاجة تجرب فيها و تطلع وحشة (دول معظم الناس... الناس اللي ميعرفوش كويس في اداء السيارات و مين الأحدث و كذا ...)

لكن برضه مش في مصر موضوع الإنتشار
عندك مثلاً في الخليج الــ"تويوتات" حاجة مقدسة .. ياباني و تستحمل الكرف و مش عارف اية ..:]
بس أنا رأيي من رأي حضرتك.. ان الواحد طالما معاه الإمكانيات يجيب العربية اللي بيحبها .. يبقى خلاص يجيبها ..طالما مقتنع بيها إقتناع تام.

شكرا على المرور ياباشا

المشاركة الأصلية كتبت بواسطة drguevara

الموضوع عامل زي النوكيا n73 n70 و اخيرا n95

المشاركة الأصلية كتبت بواسطة evoo90

وكمان الموبايلات كله قافش فى نوكيا وكمان موديلات معينه مع انها ماركه مش حلوه اصلا بس كله قافش فيها عشان ممكن واحد تحت السلم يصينهالك وتلاقيلها ميت كفر وجرابات وميدليات ودنيا تانيه ومع ذلك والله العدد السونى اريكسون والسيمنس والسامسونج بتنزل عدد جميله جدا واحسن من النوكيا بس مش اى حد يعرف يصينها وده اللى مخلى الشعب يقولك مالها النوكيا ماهى ماليه البلد !!!

المنتدى ده لو كان منتدى تليفونات كان زماني كاتب الموضوع ده عن الانواع اللي متتسماش اللي حضرتك كاتبها
تلاقي واحد شايل تليفون فيه gps مثلا وتكلمه عن ال gps اكنك بتكلمه عن دوا هايصرفه من الصيدلية
طيب جايبه ليه، يقولك عشان (كامارته) حلوة مش (الكاميرا) وهو طبعا جايبه عشان يقلد اصحابه وخلاص

المشاركة الأصلية كتبت بواسطة hon

موضوع شيق ومضحك فى نفس الوقت
بس ماتنساش حضرتك أن دا نتاج لعوامل كتيرة زى الفقر الطبقى الذى نعيش فية
لأن كل فرد يريد تعظيم ممتلكاتة بأكبر قدر ممكن مع العلم أت أمكانياتة متواضعة
مثلا بنختار السيارة أم شنطة أكتر من الهاتش باك دليل على كبر الشىء صاج أكتر بنفس السعر
وعشان كدا السيدان منتشر فى مصر وبيتباع أحسن على الرغم أن الهاتش باك ممفيد فى حالتنا وزحمه المواصلات
وربنا يكون فى عون الشعب الغلبان دا يعنى لو حضرتك جيت فى 2010 ورفعت الجمارك نهائيا سترى تعير فى خريطة السيارات فى الشارع المصرى وترى سيارات مافق ال 2000 cc تجرى فى شوارعنا عادى كمان رخص البنزين و الضريبة كل هذا يؤثر على أختيارات المستهلكين ويجعله عامر

شكرا على المرور

المشاركة الأصلية كتبت بواسطة camaro

ههههههههههههههههه
حضرتك عندك حق ..
عاملين زي ام فاروق لما تيجي تجيب لبنتها الجهاز لازم تجيب زي جارتها ان مكنش ازيد
بس انا اعتقد ان فيه اكتر من سبب للظاهرة دي ..
أولا المصريين مش كلهم فاهمين فنيا في العربيات علشان يقدروا يقدروا العربية من الناحية دي و اللي عنده معلومات بتكون من إفتاء من شلة من اصحابه مثلا - المنتدى طبعا حاجة تانية خالص - زي واحد كل اللي يعرفوا في مجال العربيات ان abs بيعمل ايه ..

ثانيا المصريين علشان شعب غلبان و فقير و ليس من الشعوب المرفهة زي الخليج و تعبانين في القرش سواء في العمل في الخارج أو الداخل فبيكون عايز يشتري حاجة مضمونة علشان تحفظله فلوسه و متفتحش معاه في المصاريف و طبعا لما يلاقي منتج معين منتشر في البلد فقلبه بيطمن له و خصوصا لما ميكونش عنده معرفة كافية و تامة للمنتج دة في النقطة السابقة

ثالثا عقدة الخواجة فتلاقي اللي رايح يشتري يقولك لا احسن حاجة الياباني و التاني يقولك لا الالماني - انا مقتنع بالالماني و لكن باسباب مش اي كلام - و ايضا الامر المماثل لما يكون في في عربية ببتجمع برا بلدها تلاقي فيه ناس تقول لا و خلاص لازم تكون من بلدها - على فكرة هوندا سيتي اول ما نزلت كانت بتجمع في دولة اسيوية صديقة و يتم تصديرها لليابان بس لا اذكرها حاليا -

شكرا على المرور

المشاركة الأصلية كتبت بواسطة gemino

موضوع جميل فعلا و كل الناس فصلت التفكير و الشخصية المصرية الفريدة بطريقة محترفة تستحق تتحط فى كتاب زى كتاب وصف مصر كده تحت باب" وصف الشخصية المصرية المعاصرة ".

شكرا على المرور بس الشخصية المصرية مايكفيهاش كتاب واحد بس

اية يا عم كل ده ده انت شردت العربية خالص واضح ان فى بينك وبينها تار بايت وانت حالف انك تاخده بس بردوه معاك حق انتشرها الكتير اوى بقى غباء معنى كدة ممكن اكون بشتم نفسى لانى على نفس نظام بقيت الشعب ومعايا لانوس بس الحمد لله انا اول مالك للعربية من سنة 99 ايام ماكانت دايو مش معروفة فى مصر لوى وكان الى بيشتريها يعتبر بيغامر.
شكرا ليك على توضيح وجهة نظرك ان انت بتتكلم على سلوكيات ونظام شعب من خلال نوع عربية(وجهان لعملة واحدة)وهى لمعظم الشعب المصرى.