الموضوع: هل توافق على إلغاء مجانية التعليم ؟

المشاركة الأصلية كتبت بواسطة dr zezo

الردود علي اغلب اسئلة حضرتك سهلةجدا بل ومنطقية وهي كالتالي:

1-ناس فقيرة ومستواها العلمي كويس ومتفوق يبقي معندوش مشكلة لأنه لومجتهد مش هيدفع ولا مليم و هيتصرف عليه كمان لان الي زيه يبقي استثمار حقيقي للبلدكلها انما فقير و معندوش استعداد يتعلم وعايز يأخد شهادةو السلام كما هو الحال ملوش لازمةو العواطف لامجال فيها و بالتالي الفقير المجتهد ده نخرجه من حسباتنا لان الغاء المجانيةوتطبيق النظم العالمية افيد واصلح ليه وهو الوحيد الكسبان

2- الصنايعية بيشتكوا من ركود !!!! اسف دا كلام وبس هما ملاحقين و بعدين برضه وارجع اقولها الصنايعي الشاطر الناس بتجري وراه بالمشوارو لا حضرتك بتروح تصلح عربيتك اوتلاجتك اواي حاجه عند صنايعي اي كلام عشان خاطر انه غلبان وفقير نفس المنطق العاطفي الذي نتكلم به و نتراجع عنه فور ان يمس مصالحنا مصر تشكو من قلة الايدي العاملة الماهرة بجد ليه لان كلنا في الجامعات !!!

3- الغني اللي يدخل الجامعة بفلوسه كفئ مش كفئ علي نفسه ....ازاي؟
طول ماهوقاعد في الكلية السنةفي سنتين انا الكسبان لانه بيدفع فلوس انا محتاج لها من اجل الانفاق علي غير القادر وبعدين لما يبقي يدخل سوق العمل هو هايفشل لوحده ليه برضه ؟
بقانون الانتخاب الطبيعي والبقاء للاصلح خاصةمع وجود خريجيين اخرين متميزين

4- انا مش فاهم النقطةدي ازاي دكتور دافع دم قلبه واحنا بنتكلم علي مجانيةالتعليم ولا حضرتك تقصد الاشارة الي الغني اصلا الوضع مش زي ما حضرتك متخيل ما حضرتك عندنا كليات طب خاصة حاليا بفلوس ومجموع متوسط ومع ذ لك لا اقبال شديد عليها ليه؟ الدراسةصعبةومعقدةوطويلةو انا غني و شاب ومش في دماغي التعليم اصلا اعقد نفسي ليه زيارة خاطفة الي كليات الطب الخاصة وستري ما اتحدث عنه داخل هذه الكليات الخاصة ستجد طلابا يسعون للعلم بحق وقد فاتهم الالتحاق بالجامعات الحكومية لسبب او لاخر وتصادف توفر مقدرةمادية لديهم تعينهم علي التعلم بالمال وستجد اخرين مش في دماغهم اصلا وهولاء منهم من يترك الكلية بعد سنةاواكثر ومنهم من يستمر ويتخرج و لايعمل اساسا في هذا المجال لانه لايفهمه ولا يحبه هي خلاص الشهادة جت و تمام كده اوي ومثل هولاء ستجدهم في الجامعات الحكومية ايضا يعني نظام كله خاص و عام فاشل مبني علي نظام زي تخصيص مقاعد في مجلس الشعب لبعض الطوائف لانعدام قدرتهم علي المنافسة اساس التقدم


5- برضه نظريتك حضرتك دي بتدل ان حضرتك مصمم ان الالتحاق بالكليات العلمية الهامة ستقتصر علي الاغنياء فقط وهذا ليس ما نرمي اليه و مانريد تطبيقه لان ما يحدث ان قبول الطلبة الذين يدفعون مقابل التعليم له نسبة بحيث ما يدفعه هولاء يصرف كمنحة لطلبة اخرين مجتهدين ا ي ليست كل الدفعة من صنف واحد من الناس بل ستضم جميع الاصناف

وابشرك اننا اذا طبق هذا النظام عدد المسافرين و المهاجرين للخارج سيقل ...لاحتياج سوق العمل الداخلي لهم لقلة او لنقل لاعتدال الطلب امام العرض


وحدثت امامي تجربة ناجحة في هذا الصدد اريد ان اقصها عليكم

الميكانيكي الذي اتعامل معه لديه ابنه ودائما يشكو من عدم التفاته لدروسه وهكذا الي ان ظهرت نتيجته في الاعدادية ويادوب مجموع يلحق الالتحاق بالثانوية العامة وطوال الصيف والرجل يسأل ويناقش لكي يحدد مصير ابنه وقد نصحته بما املاه علي ضميري انذاك الي ان قرر الحاقه بمبارك كول لتعلم الميكانيكا

الولد الان صار له عاماو يقضي منذ فترةتدريبه في كارتك بمدينة العبور لصيانةالسيارات واخر النهار يقف مع ابيه اقول وبصدق صار حاله افضل بل و اتوقع ان يكون افضل من ابيه في الحرفةو الحظ ورايي ان امثال هذا الصبي كنوز لا يجب التفريط فيها بل وتنميتها من اين ننميهاوالجميع يريد شهادة ومكتب و خلاص


نفس الرجل ابنته هذا العام حققت نتيجة متميزةفي الاعدادية بمجموع يقارب 95%بلا دروس والرجل يسأل الان ماذا يفعل ؟

واشار عليه الجميع بالحاقها بالثانوية العامةو استكمال المسيرة طالما تحقق نجاحا

الرجل يتمني ان يفعل ذلك لكنه يخاف من عناء ومشاق الثانوية لضيق ذات اليد

هومقتنع بضرورة اكمال الطريق لكن ماذا عن الدروس ومصاريفهاماذا عن الجامعةان اراد الله و التحقت بكليةعملية اوحتي نظرية فالكل اصبح في الهم سواء لكن الرجل عزم امره علي الله وسيكمل مع ابنته المسير.

لقدطبق هذا الرجل البسيط حاله ما نتحدث عنه ولكن الجميع ليسو كذلك فالبعض يكابر ويتوهم لذا وجب اجبار المجتمع علي ذلك الامر

ماش انا معاك في اللي انت قلته
لاكن في هاجس عندي معتقدش هيروح بالسهوله اللي حضرتك متوقعها
المثال اللي حضرتك قلته واحده زي بنت الراجل ده ممكن بكل بساطه مجموعها ميكملش المجانيه يبقي احنا عملنا ايه
احنا ظلمناها اكيد ليه لان دلوقتي ممكن ابوها يتصرف ويعلمها وتطلع حاجه كويسه تنفع البلد واهلها لاكن في ظل القانون الجديد مستحيل ابوها يقدر
نحسب حسبه بسيطه كمثال كليه زي كليه الطب بتخرج 26000 دكتور سنويا هنقول انهم تقلصوا الي الف دكتور
فيهم 100 مائه تعليم مجاني وكده انا بكون حسن النيه مع الحكومه الذكيه دول ياتري بعد ما يخلصوا هيكفوا ايه ولا ايه
علي العموم انا شبه مقتنع بالإلغاء حاليا بسبب الاراء المقنعه الموجوده بس انا قلقان علي الغلبان اللي ممكن بسبب الكلام ده يبات عيان وكمان عريان
ورجاء اخوي محدش يقولي دي عاطفه احنا مسلمين واهم حاجه في المسلم الاحساس بأخيه المسلم والمسيحي واليهودي كمان لو وجد

المشاركة الأصلية كتبت بواسطة compuland

اولا مش كل الطلبه بتاخد دروس
فى ناس معهاش ويدوب بتأكل عيلها
مين بقى يضمن حقوق المتوفقين دول؟؟
حتى لو المدارس على عنها متكدسه وفيها اللى فيها بردو بيخرج منها ناس كويسه كتير فى اوحش الظروف
معظمنا طالع من مدارس حكومى او من جامعات حكوميه
والحمد لله زى الفل

ايه ياجدعان انتو مابسمعوش على الناس اللى قتلت عيالهم او ولعت فيهم عشان معندهاش فلوس تصرف عليهم
ولا سمعتوا عن الناس اللى بتبيع بناتها لاى راجل غنى عشان تقدر تعيش



اسمها مدرسه مبارك كول وفروعها فى كل حته فى مصر
بقالها كذا سنه ومتخرج منها ناس كتير
تعليمهم بيبقى نظرى فى المدرسه لمده يوم او يومين وعملى فى المصانع والشركات لمده 3 ايام
دور على النت هتلاقى حاجات كتير ليها

المدرسه اليابانيه سوف يتم انشئها فى المدن الصناعيه زى اكتوبر والعاشر

وفيه مدرسه صينيه فى اكتوبر برضوا جامده جدا


اسمحلى بقى اسئلك
اولا انت من المؤيدين للموضوع ده ولا من المعارضين
ثانيا انت جبت الموضوع ده منين
يعنى ده مشروع جارى التفيذ فيه ولا افتكاسه مين بالضبط

اولا انا شفت الموضوع ده كتير جدا ومناقشات حاده جدا فيه
ثانيا انت لو قرأت الردود كنت عرفت اني من المعارضين وبشده بس مع الاسف انا شايف ان فيه ناس كتير موافقه
ثالثا شكرا علي المعلومه بتاعه مدرسه مبارك لاني بجد ماشوفتهاش لاني من الاقصر ودي مش عندينا يمكن ده سبب جهلي بيها
وانا اسف مره تانيه لاني صريح اني مشفتهاش
أساتذة الإسكندرية لـ«هلال»: تطوير الجامعات يهدف لإلغاء المجانية وانتشار المحسوبية

انتقد أعضاء هيئة تدريس جامعة الإسكندرية الرؤية المطروحة لتطوير الجامعات وقالوا لوزير التعليم العالي خلال لقائه أمس الأول: إنها تهدف إلي جلوسنا في المنازل وانتشار المحسوبية.
دافع الوزير عن توقيت طرح مشروع قانوني تطوير الجامعات، مشيرا إلي التحديات العديدة التي تواجه التعليم العالي، الذي يحتاج لاعتمادات مالية كافية.
وقال الوزير: إن «عصا موسي» لن تقدر علي إصلاح التعليم، ولن تستقل الجامعات إدارياً ومالياً، إلا بعد إدارتها بشكل اقتصادي، وهذا لا يعني إلغاء مجانية التعليم، فلا يوجد تعليم «ببلاش» وإنما الدولة تتحمل التكلفة.
وأضاف هلال: إنه لأول مرة يناقش قانون يخص التعليم، وهو مجرد رؤية، ولو كان لي رأي شخصي في هذا الأمر لكتبته علي الإنترنت، فلن أدلي به وأنا وزير لأن المسؤول ليس له رأي شخصي.
وأكد الوزير إطلاق مبادرة جديدة في البحث العلمي، وسيتم إعطاء كل أستاذ وباحث مشارك أجراً يبلغ ٤ أضعاف ما يتقاضاه بالكلية، تشجيعاً لتطوير البحث العلمي.
وأشار هلال إلي أن أعضاء هيئات التدريس يعملون علي الورق ٨ ساعات، وفي الواقع ساعتين فقط، مؤكداً أن الكتاب الجامعي يعد وصمة علي جبين التعليم الجامعي، ولابد من تطويره وتحديثه، فالقانون رقم ٤٩ يطبق في الجامعات منذ ٣٤ عاماً، وبه سلبيات عديدة، وتمني إدخال رؤية الوزارة لتطوير الجامعات ضمن التعديلات التشريعية المقبلة.
ومن جانبه لفت الدكتور فهمي علي فتح الباب أستاذ الهندسة بجامعة الإسكندرية إلي أن هذه الرؤية تهدف لإلغاء مجانية التعليم، وإجلاس الأساتذة في المنازل بدلاً من الجامعة، إضافة لانتشار المحسوبية.
وهاجم الدكتور محمد القط بكلية علوم الإسكندرية تدني المرتبات، وطالب وزير التعليم العالي بتوضيح الإجراء الذي اتخذه تجاه مناقشة منح درجة الدكتوراه بكلية العلوم دون موافقة مجلس القسم والكلية.