عمرك حبيت الرادار ....انا حبيته بقى
دايما الرادار هو مثال اصيل على القنص و الصيد
و تحس ان انت في المنطقة اللي فيها رادار زي الغزال الشارد اللي مستنى طلقه
و دي تجربة مع الرادار ...بس مش زي التجارب العادية
في رحلة العودة من مرسى مطروح ...
و بعد الخروج من المدينة ببتاع 20 كم تقريبا كنت بعربيتي وعربية والدة زوجتي و اخواتها ...
المهم في وسط اللا شيء انفجر اطار سيارت عائلة زوجتى ...
نزلت كالهمام لتغيير الاستبن ...و طالع هو كمان نايم وبيشخر ...و بعدين ؟؟؟؟
ما ينفعش اسيبهم في الصحرا كده و اروح اعمله ...
بابص كده وكده لاقيت على مرمى البصر حبيبنا المتداري جوا شجرة
الرادار و الشخص العامل عليه
قلت ما بدهاش ...و روحتله بالعربية
- السلام عليكم
- وعليكم السلام اتفضل تحت أمرك (شايفين الحلاوة)
- انا فلان و معايا اسرتي و حكيتله الموقف ...ممكن اروح فين قريب اعمل الفردة دي ؟
- حضرتك تتفضل على راس الحكمة قدام 15 كم ..و انا من هنا هاراقب اهلك و معايا الجهاز و اطمئن هما في جمايتنا و الكمين قريب مننا
جاتلي حالة من الفرح العميــــــــــــــــق لسماع الكلمتين دول (في حمايتنا) اول مرة احس ان وجودى جنب الكمين يوفر لأهلى الحماية
المهم
روحت غيرت الكاوتش و نفخت الاستبن في رأس الحكمة و غيبت 20 دقيقة تقريبا
ورجعت لأجد ما يسر ...
الونش واقف جنبهم و مشغل السارينة على الهادي كده
ووصلت و عرض عليا المساعدة و شكرته جدا جدا من قلبي
و عرفت من اهل زوجتي ان في عربيات وقفت تساعدهم كتيره فالراجل تقريبا قلق غليهم و طلب الونش من الكمين يقف جنبهم ...
تحية لشرطة مرسى مطروح و محافظ مرسى مطروح النشيط جدا
و معزة خاصة للرجل الشهم الذي لا أعرفه
الرادار