الموضوع: مدارس المستقبل للغات

المشاركة الأصلية كتبت بواسطة NYSMA

كل الكلام اللى حضرتك قلته انا حاطه فى الاعتبار وقبل اى خطوة خدتها عملت استخارة

عارف حضرتك انا دفعت فى kg1 السنة اللى فاتت 4300 ولما السنة خلصت وبسأل على المصروفات الجديدة 7000 اتخانقت مع الاداره وقلتهم ليه وازاى طبعاً كل حاجة عملينها قانونى العيب على الادارة التعليمية اللى وافقت لهم على كده بحجة انهم هيدخلوا سيمى انترناشينوال مع انى واخدة وعد من صاحب المدرسة بعدم زيادة المصروفات بشكل مش طبيعى وكمان واخده تخفيض امال باقى الناس دفعت كام

وده كان سبب تفكيرى فى التحويل لانى حسيت باللعب وعدم المصداقية وخد عندك لفيت مدارس التجمع الخامس كله واقدر اقولك كل مدرسة شغالة ازاى وبتسرق اد ايه

ويعلم الله ان ليس لى هوى شخصى أو استعراضى فى اختيار المدرسة وانما كل ما ابتغيه ان يوفقنا الله للخير لها واخوتها وجميع المسلمين

ربنا يهدي حضرتك للي في الصالح لبنت حضرتك و ليكي و ابقي طمنينا

الف الف شكر على إهتمام ومتابعة حضرتك

بصراحة الموضوع بتاع المدارس ده من أكبر الهموم اللى الواحد ممكن يمر بيها في حياته وده طبعا في مصر بس

أنا والمدام تقريبا مش بنام منه

جزاكم الله خيرا كثيرا ووفقنا وإياكم الى ما فيه رضاه

الحقيقة انا كان ليا احتكاك بنسبة كبيرة من مدارس المستقبل في القاهرة لأننا كنا بنعمل برنامج تعليمي عندنا في الشركة وكنا بنجربه على الطلبه

ولفيت على مدارس كتير من مدارس المستقبل والحقيقة فعلا انبهرت بمعظم المدارس من حيث مستوى الطلبه والمدرسين ووجود نظام بالمدرسه ، دة غير نظافه المكان

بصراحه مكنتش مصدق اني في مدرسه حكومي لدرجه اني سألتهم هي المدرسه دي تبع الحكومة يا جماعه !!!

وعجبني مشروع بيعملوه مع الحكومة الأمريكية وداخل في إطار المعونة الأمريكية في مصر وهو مشروع الـTailo

ودة عبارة عن مشروع لتحسين الأداء التعليمي في مصر بس هما شغالين في مدارس المستقبل بس ومش عارف اذا كان هيعمموا المشروع على بقية المدارس الحكومية ولا لاء

ومن خلال مشروع التايلو بيتم عمل غرفه حاسب آلي في كل مدرسه مزوده بأجهزة كمبيوتر حديثه وتوصيل شبكه DSL

بالإضافه لتوزيع عدد 5 شنطة لاب توب لكل مدرسه توزع على بعض المدرسين على سيبل التجربه

والشنطه مزودة بجهاز لاب توب وبروجكتور بحيث يقوم المدرس بتحضير الدرس على الـ Power point وعرضه على الطلبه في الفصل من خلال جهاز البروجيكتور .. ، ودة بصراحه أكتر حاجه عجبتني في المشروع

شكراً جزيلاً أخى خالد على التوضيح وأقدر أقولك أنك ساهمت معى فى الوصول لقدر من الهدوء النفسى

جزاك الله خيراً

انا رحت قدمت لأبني (احمد) في مدرسة المستقبل التجريبي للغات (اللي في شارع الطيران) وقالولي النتيجة هتبقى في شهر 7
رحت من يومين عشان اشوف الاخبار لقتهم معلقين كشوفات فيها اسماء المقبولين
بس اللي محيرني جدا جدا ان لقيت اول الكشف مواليد شهر 12 سنة 2003 واخر الكشف مواليد شهر 6 2004
يعني كده اقل طفل هيخش kg1 هيبقى عنده 5 سنين ونص واكبر واحد هيبقى عنده 6 سنين الا شهرين
بالذمة دا كلام
يعني دول عقبال مايخشوا اولي ابتدائي يبقى عندهم 7 سنين ونص او 8 سنين - طب ازاي ؟؟؟؟؟
حد يفهمني النقطة ديه

حد يعرف فين مدارس المستقبل دي. ااقصد فين غير في شارع الطيران

المشاركة الأصلية كتبت بواسطة ecybrarian

حد يعرف فين مدارس المستقبل دي. ااقصد فين غير في شارع الطيران

لو حضرتك من سكان المقطم زي اللي مكتوب في البروفيل يبقي اقرب حاجة ليك هي مستقبل المعادي و دي ورا كارفور بس في مشكلة ان المدرسة دي حاليا تابعة لمحافظة حلوان بالتالي حضرتك متقدرش تقدم فيها لازم بقي تشوف حاجة مدينة نصر لاني التقديم بيبقي لقاطني المحافظة بصرف النظر عن محل السكن

شكرا لردكم السريع يا استاذ احمد..اللذيذ في الموضوع إن انا ما غيرتش بطاقتي للمقطم (يعني لسه بطاقتي مدينة نصر على عنوان الوالد)