الموضوع: تجربتى مع a113 ورأى الشخصى فى الصينى

العربيه معايا موديل 2009 ولحد دلوقتى ما شاء الله ماشيه تمام وثابته على الطريق واستهلاكها حلو بس الشنطه صغيره اوى وعفشتها ناشفه شويه وانا عامل لحد دلوقتى 3000 كيلو كانت الشنطه بتعلق لما افتحها من جوه لكن التوكيل عالج الموضوع فى صيانه الالف وكمان كان فى سماعه الصوت فيها بيعلق ظبطوها برضه فى صيانه الالف غير كدا كله تمام وفى رأى صفقه رابحه بالنسبه لسعرها وياريت كل الناس تلاحظ حته السعر دى وهما بيقيموا العربيه

وفى ملحوظه عايز اقولها بالنسبه السيارات الصينيه ياريت ياجماعه فى اى نقاش خاص بسياره صينيه محدش يدخل يفتى ولا يالف ولا يشوف كلمه صينى يجيله وساوس ويقعد يشتم بلاش الاسلوب دا لانه ما منوش اى فائده وغير حضارى بالمره الى عنده العربيه او ساقها او اتعامل مع اى عربيه صينى يقولنا رايه والاختلاف لا يفسد للود قضيه
وفى حاجه تانيه احنا معانا لانوس 1999 ولما كنا بنشتريها زيرو الناس كانت بتصحنا لا وبلاش كورى يا عم دى زباله والكلام الى بيتقال على الصينى دلوقتى بس طبعا الناس شايفينها سوقها ازاى ودا ما جاش من فراغ وكمان ما تروحش تشترى عربيه ب 60 الف جنيه وتتكلم على حاجات بعيده اوووى عن السعر دا اكن انت شارى لكزس لازم نعرف احنا راكبين ايه وحدود العربيه دى ايه وكمان خوف الناس من الكماليات الكتيره طب ليه؟؟؟
عشان احنا خدنا اننا نركب عربيات فاضيه بدون اى كماليات بسعر عالى بسبب الاسعار الغاليه وبدون اى مواصفات امان ودا فى كل عربيات غبور المنتشره يعنى الناس تشترى الانترا باكتر من 100 الف مفيهاش abs ونبقى مبسوطين اوى ! يا جماعه دا السوزوكى التو بتنزل ب اير باجز و abs بره مصر ارجو اننا نغير فكرنا عن موضوع الكماليات دا شويه
فى النهايه ارجو انى مكونش طولت عليكوا واتمنى انى اكون افدتكم