تكلموا عن الأهم : الدورى ستة


اتكلموا عن الأهم : الدورى ستة أندية جماهيرية فقط فى دولة 80 مليون
ثروة الشعب بتدفعها أندية شركات البترول والاندية الحكومية للاعبى الكرة 0 وفيه ناس مننا بتأكل وجبة واحدة يوميا وشباب وبنات محرومين من فرصة الزواج وناس بتبحث عن أكل أولادها من صناديق الزبالة وديون على البلد وملايين الشباب بدون شقق وتخلف فى الخدمات وغيرها 0
بلدنا اصبحت اعجب بلاد الدنيا فكل حكومات العالم توزع الفلوس اللى جاية من البترول وغيره من باطن الارض على الشعب وفلوس الضرائب والموارد الاخرى على الخدمات والاسكان والفقراء وتحسين مستوى المناطق المحرومة 0
الا مصر تقوم وزارة البترول بتوزيع خير البلد الزائد على لاعبى الكرة 0 و وزارات اخرى بتأخذ فلوس الضرائب وخير البلد وتعمل به فرق كرة قدم وسلة ويد ودخلوا فى كل الالعاب وده لا يحدث ولا فى أغنى دول العالم 0
ووصلنا لدرجة الراجل بتاع الاتصالات والتليفونات رفع اسعار المكالمات عدة مرات علشان يصرف على لاعبى الكرة وبعد ما نزل بفرقته درجة ثانية مفيش راجل ابن بلد يرفع عليه قضية ويحاكمه ؟
اللى بيحصل ده منتهى الاجرام ضد كل مواطن مصرى ومش عارف هل يوجد محامى مصرى جدع يرفع قضايا ضد هؤلاء المسؤلين لاهدارهم المال العام ؟ لأ المفروض كل الغلابة والموجوعين والمطحونين يرفعوا قضايا ليأخذوا نصيبهم ومن واجب الحكومة تدفع لهم تعويضات0
اموال الشعب اللى بتدفعها الوزارات على اللعيبة وأنديتهم الفاخرة دى سرقة من مستحقات الشعب ومن الأولى ان يأخذها الراجل اللى مرتبه بيخلص فى نص الشهر واللى بيشتغل شغلتين ومحروم من اولاده 0 واللى مش عارف يشترى ملابس له ولاولاده0 وهذه الاموال أحق بها كل شابة أو شاب يحتاج شقة و من يأكل وجبة واحدة يوميا ودول كتروا وفيه ناس عايشة وسطنا مش عارفين يدفعوا ايصالات المياه والكهرباء اللى بيزودوها فى الكتمان 0
والأولى بها المرضى اللى بيبوسوا الاعتاب علشان العلاج المجانى الردئ و اللى بيموتوا علشان بيوفروا ثمن العلاج علشان يعرفوا يأكلوا فول أو ملح أو بصل 0والأحسن أن نبنى مشروعات لكل العاطلين أو ندفعها لهم مبالغ شهرية 0 والاحق بها القرى والمناطق المحرومة من الصرف الصحى 0 وهى حق لكل بنت لم تتزوج حتى الان و حق لكل شاب بيحلم ببيت و من حق الراجل اللى بيعرق ويهلك صحته وعمره علشان يدفع للمدرسين الحرامية بتوع الدروس الخصوصية اللى الحكومة سايبة لهم درجات أعمال السنة حجة علشان ابتزازنا وسرقتنا 0
ما يحدث هو جريمة فى حق كل مواطن مصرى 0 أنا وزميلى فى الكلية حسبنا وجمعنا تكاليف الملاعب والفلوس اللى بتصرفها اندية البترول وأندية الحكومة وجدنا أنها كان يمكن صرفها على 340000 شاب وشابة سنويا ليأخذوا شقق ويكونوا اسرة ولكن تم حرمانهم من مال بلدهم وأعطتها الحكومة للاعبى الكرة والمستفيدين من هذا الاجرام ممن يهلبون عمولات بيع وشراء اللاعبين والمباريات وممن يحصلون على بدلات ومخصصات عضوية مجالس ادارات هذه الاندية0
وهؤلاء المسئولين لكى يستمر اغترافهم للمال العام كونوا مافيا من المطبلاتية والمنافقين حيث تجدهم فى وسائل الاعلام يبررون وجود هذه الاندية بكلام ساذج فهم يقولون أن هذه الاندية تحقق انجازات طيب يا أفاق يا ضلالى أليس ذلك تم بخطف لاعبى الاندية الشعبية ودفع أضعاف المبالغ التى يستحقونها من مال الشعب المسكين0 ويقول الافاقين المنافقين : فى العالم كله أندية شركات شوفوا منعدمى الضمير هم عارفين ان شركات الاندية بالخارج هى ملك اما لرجال أعمال أو اكتتاب عام وليس من الايرادات العامة للدولة 0ويقولون أن التكاليف من أموال مخصصة للرياضة يا سلام وهل الشعب اعطاكم توكيل لتستخرجوا خيرات الارض وقناة السويس والضرائب وتقسموها بينكم كغنائم ؟ وليه تأخذون مخصصات زيادة ؟0ألا يكفيكم أنكم تتقاضون مرتبات وحوافز وأرباح ضخمة غير منطقية وغيركم ينام جوعان ؟ هل فيه بلد غير مصر ناس مرتباتها بالالاف أو بعشرات الالاف و الغالبية مرتباتهم لاتكفى اسبوع واحد ؟ كأننا من رعايا دولة أخرى وبلدنا نسيتنا 0 هل هذه الخيرات تخص 5% فقط وباقى الشعب يجب أن يبقوا فقراء للأبد ؟
وبتحدى نؤكد ان مصر للأسف هى الدولة الوحيدة فى العالم اللى شركات وهيئات الحكومة بتهدر الايرادات العامة فى أندية ورياضة بهذا الأسلوب الاجرامى0
خيرات مصر حق لكل مواطن مصرى ومش من حق اى مسئول يصرفها الا بعد الانتهاء من كل ازمات ومشاكل البلد وسداد كل الديون وبعد انجاز تنمية حقيقية وليس شعارات مفضوحة 0 وبعد وصول المياه النقية وشبكة المجارى لكل قرية وبعد أن يكون لكل شاب عمله وشقته 0
من يريد أن ينشئ نادى أو يشترى لاعب يدفع من جيبه وملكه الخاص ولكن أن يدفع من أموال الشعب فهذا سرقة