اسوأ جهاز موبايل واسوأ شركة موبايلات

**نور القمر** · 07-07-2009 11:03 AM

من حوالي سنتين اشتريت جهازين موبايل فودافون 225 واحد هدية لاختي وواحد لابني
وقتها كان سعره 250 جنيه بالخط يعني مش رخيص اوي
وكان نازل في نفس الوقت عدد lg بخط اتصالات بنفس السعر تقريبا ونفس امكانيات الموبايل
للاسف انا اختارت الفودافون وواحد قريبي اختار lg
ماشاء الله lg كويس مش فيه اي مشكله .. مهما كان lg ماركة عالمية ومعروفة

اما بقه الفودافون اول عيب اكتشفناه انه مينفعش يركب عليه غير خط فودافون وابني مكنش بيستخدمه كتير فخطه صلاحيته انتهت واشتريت له خط اتصالات ومنفعش عليه اضطريت اشتريله خط فودافون تاني وكان لازم نفك الشفرة عند حد بتاع موبايلات علشان يشغل الخط الفودافون الجديد
تاني مشكلة ظهرت الجهازين في نفس التوقيت تقريبا على سنة ونص الشواحن بتاعتهم باظت
قلنا مش مكشلة نشتري شواحن جديدة مجتش على 10 جنيه
ملحقناش نتهنى على الشواحن واكتشفنا انهم باظ فيهم الجزء اللي بيدخل فيه الشاحن
حاولنا نصلح واحد كتجربه الرجل قال معندوش قطع غياره

فودافون فعلا اسوأ شركة موبايلات وشركة نصابة .. جالي رسايل على موبايلات اولادي اشحن الان لتحصل على معرفش كام دقيقة مجانية لمدة شهرين
وشحنت الخطين ومفيش ولا دقيقة جات .. اتصلت بخدمة العملاء قالولي كان خطأ وهنصلحه وتوصلك الدقايق وبرضو مفيش حاجة . . وبرضو كا بيجيلي معرفش كل ماترسل كام رساله تاخد كام رساله مجانية ومجاش حاجة ... انا بصراحة كبرت مخي لاني زهقت منهم

ده غير ان عندي ال 3g بموبايلي على فوادافون بيقطع ومش بيلقط بسهولة اما لو شغلت خط اتصالات على نفس موبايلي بيجمع في اي حتة في الشقة وكويس جدا

**mramzy** · 07-07-2009 11:19 AM

ههههههههههههههههههههههههه هه
حصلت عندى فى موبيل بنتى ورحت فكيت شفرته وشغال
والدقائق اللى كانت بتنزل كل شهر لازم اتصل واتخانق
فعلا شركه مالهاش اى لازمه

**Ashraf_Ashraf** · 07-07-2009 11:21 AM

صدقينى ال3 شركات نصابين وكل شركه فيها البدع علشان تلهف فلوسنا
انا شوفت المرار مع اتصالات وخدمه عملاء كدابين من اكبرهم لاصغرهم موبينيل شبكه زى الزفت فى التغطيه لو اتخرتى فى الدفع هوا قطع خط بس دا المهم لكن اى مشكله تقابلك مش مهم المهم تدفعى وبس

**ASKAFRAWY** · 07-07-2009 11:52 AM

ال 3 شركات فى مصر فقط بيزيد فيها النصب و الحمد لله
اتصالات نصبها قليل عشان لسة صغننة بكرة لما تكبر تبدأ تنصب على كبييييييييييييييييييييييي يير
طالما احنا ساكتين و راضيين يبقى مينصبوش ليه

**beautiful0mind** · 07-07-2009 12:33 PM

انا حصل معايا مشكلة مع فودافون قبل كدة عشان كان فى رصيد بيتسحب من عندى ولما كلمتهم وبلغتهم بموضوع الرصيد لقتهم بيتصله بيا تانى يوم على طول , فضله يتابعونى لمده اربع تيام لغايط معرفة الغلط فين وتم استرجاع الرصيد المسحوب وعلى ذياده على سبيل الاعتزار

المشكة انى لما اتصل بخط اتصالات او ابعتله رسالة يخصم جنية ونص فالوقت ده كانت اتصالات لسه شغاله مكملتش اسبوعين

وموضوع القائق اللى نور القمر بتتكلم علية انا معرفوش لكن انا بتجيلى رسالة من شهرين انى اتكلم عشر دقائق اخد زيهم وفعلا كان بيضاف الدقائق لانى عارف الرصيد بيخلص عندى بعد كام دقيقة

وتكررت الرسالة اول امبارح بس المرادى 20 دقيقة .بس لسه العرض مشتغلش

اسواء موبيل من وجهت نظرى n73 .........شركة ........انا شايف الثلاثة معقولين وبيكملة بعض ولا اية ......

**أحمد كمال** · 07-07-2009 01:32 PM

المشاركة الأصلية كتبت بواسطة ASKAFRAWY

ال 3 شركات فى مصر فقط بيزيد فيها النصب و الحمد لله
اتصالات نصبها قليل عشان لسة صغننة بكرة لما تكبر تبدأ تنصب على كبييييييييييييييييييييييي يير
طالما احنا ساكتين و راضيين يبقى مينصبوش ليه

اخي الفاضل

لقد قمت بالتجريح في موظفي ثلاث من شركات البلد

و انا شخصيا موظف سابق باحداها و موظف حالي بأخرى من الثلاثة أيضا

و احب اقول لك حاجة

مفيش حد بينصب ..... لان في الاخر احنا موظفين ..... محدش له مصلحة يسرق مكالمة و لا شحن و لا حاجة من حضراتكم

لانه مش هياخدها في جيبه و هو مروح

اللي حضرتك بتتكلم عليه بتبقى أخطاء [OVERLINE]غير مقصودة تماما[/OVERLINE]

زي الاخطاء اللي بتحصل في اي نظام مبني على الكمبيوتر في العالم كله

يعني زي ما حضرتك تروح سوبر ماركت و الكاشير بالغلط يضرب ال Item مرتين

او مثلا السستم عليه السعر غلط

محدش مصلحته ان حاجة تتسرق من حضرتك و لا حد نصاب

و صدقني دائما موظفي الشركة - اي شركة من الثلاثة - يعملون ليل نهار على ان كل شئ يمشي بقدر المستطاع زي الساعة ......

**Mohamed.Fawzy** · 07-07-2009 01:56 PM

بصفتى شغال فى الشركه اسمحيلى ارد عليكي بحياديه تامه و اوضحلك بعض الأمور

اولا : مفيش حاجه اسمها عده فودافون ... احنا مش ينصنع عدد لكن بنتفق مع شركات تانيه مشهوره بتعمل لنا براندد موبايلز واحنا فى فودافون مصر كنا بنزل عدد سونى ايركسون براندد فودافون و عدد من شركه تانيه مشهوره بس مش فى مصر اسمها هيواوى ودى الشركه اللى كانت عامله التليفون اللى حضرتك بتشتكى منه

حضرتك بتقولى حاولنا نصلحه ممكن تقوليلى حاولتى تصلحيه فين لآن الموبايل ده بضمان فودافون او دلتا و محدش غيرهم عنده قطع الغيار بتاعته !!!

ثانيا : مش معنى ان حظ حضرتك فى العدتين دول وحش ان كل الناس اللى اشترتهم بيعانوا نفس المشكله دى بتبقى حظوظ وبتختلف من واحد للتانى و بترجع برضه لطريق الأستعمال مثلا فى واحد هنا رادد قبلى و بيقول على النوكيا n73 اسواء موبايل مع ان فيه ناس كتير ممكن تختلف معاه و انا اولهم لآن التليفون ده معايا بقالوا اكتر من سنتين و شغال زى الفل

ثالثا موضوع الدقائق ده انا فعلا معرفش عنه حاجه بس مصدقك طبعا ومختلف معاكى فى عدم المطالبه بحقك فى العرض ده .... كان لازم تفضلى وراهم و تعملى مشكله لو لزم الأمر

* صدقينى بدون تحيز والله العظيم احنا عندنا فى ناس مبتنمش باليومين و التلاته علشان خاطر العملاء

* ده غير اننا افضل خدمه عملاء موجوده فى مصر بشهاده الناس كلها ولو فى مشكله لازم تتحل و نوضح للعميل اسبابها بكل وضوح

* حضرتك عارفه الهدف و الشعار الرئيسى بتاع الموظفين السنه دى ايه ... هوا Delight our customer يعنى ازاى ندلع العملاء بتوعنا لآن العميل عندنا هوا رقم 1

و فى الأخير لو حضرتك او اى عضوا هنا فى المنتدى عنده مشكله و محتاج حاجه انا تحت امره

بس والنبى بلاش حكايه النمر الحلوه دى لآنى مش عارف اجيب لنفسى

**ASKAFRAWY** · 07-07-2009 02:33 PM

المشاركة الأصلية كتبت بواسطة ak1981

اخي الفاضل

لقد قمت بالتجريح في موظفي ثلاث من شركات البلد و انا شخصيا موظف سابق باحداها و وظف حالي بأخرى من الثلاثة أيضا و احب اقول لك حاجة مفيش حد بينصب ..... لان في الاخر احنا موظفين ..... محدش له مصلحة يسرق مكالمة و لا شحن و لا حاجة من حضراتكم لانه مش هياخدها في جيبه و هو مروح اللي حضرتك بتتكلم عليه بتبقى أخطاء [overline]غير مقصودة تماما[/overline] زي الاخطاء اللي بتحصل في اي نظام مبني على الكمبيوتر في العالم كله

يعني زي ما حضرتك تروح سوبر ماركت و الكاشير بالغلط يضرب ال item مرتين

او مثلا السستم عليه السعر غلطمحدش مصلحته ان حاجة تتسرق من حضرتك و لا حد نصاب

و صدقني دائما موظفي الشركة - اي شركة من الثلاثة - يعملون ليل نهار على ان كل شئ يمشي بقدر المستطاع زي الساعة ......

اخى الفاضل انا لم اخطئ فى احد من الموظفين انا بتكلم عن سياسة الشركات..لان الموظفين مش هم المسؤولين عن الجوايز و عن الرسايل البتتبعت من احدى الشركات الافاضل رسالة تقول مبروك فزت معنى بكذا..... و اتصل على رقم كذا...... اللى هو ملوش وجود اساسا!!
وللاسف انا عشت تجربة مع فودافون من بعد ما حولت نظامى لخط ومن ساعتها مش عارف انا بتحاسب ازاى كل واحد فى الشركة بيقولى كلام مختلف !
اما بالنسبة للموظفين و خدمة العملاء فانا بكن لهم كل احترام انهم بيستحملم كم الشكاوى بصدر رحب و عمر ما احد من الموظفين من ال3 شركات اتكلم معايا بطريقة غير لائقة لان بطبيعة شغلى بستخدم 3 خطوط للشركات التلاتة واعتقد انهم ليس لهم ذنب فيما يحدث من عروض و نظام المحاسبة والدقائق المجانية والرسائل المجانية ودة بيكون نابع من ادارة الشركة و بتكون غير صادقة ولكن هدفها الوحيد زيادة كمية المكالمات وعن تجربة شخصية معى وانا لم اقصد اهانة الموظفين او الشركة لكن حضرتك تسمى عدم الصدق على العملاء و عمل جوايز وهمية دة معناه ايه؟حضرتك تسميه ايه؟
انا بتكلم عن تجربة عشتها مع موبينيل خصوصا لان كمية اخطاء و كمية عروض وهمية ليس لها اساس من الصحة
وشكرا للتوضيح

-

الموضوع: اسوأ جهاز موبايل واسوأ شركة موبايلات

LinkBack

أدوات الموضوع

عرض

-

-

-

-

-

المواضيع المتشابهه

حد يعرف شركة لارسال رسائل موبايل جماعية

جهاز موبايل من 600ل700ج

للبيع جهاز سامسونج موبايل i8910 hd 8 g.b كالزيرو بالعلبه بمشتملاته

ايه ارخص واسوأ عربية 128 في مصر... عايز اشتريها

جهاز مصرى للتحكم فى السيارة او الفسبا عن طريق الموبايل من شركة حماية

الكلمات الدلالية لهذا الموضوع

المفضلات

المفضلات

ضوابط المشاركة