الموضوع: اشتريها ولا لأ gen2

وعليكم السلام ورحمة الله وبركاته

وعيد سعيد إن شاء الله

عندنا في الأسرة واحدة أتوماتيك؛ العربية تحفة بكل المقاييس وباستمتع بركوبها جدا بس هيا شبابي أكتر منها عائلية

مميزاتها من وجهة نظري: سعرها المعقول؛ موتورها القوي؛ إمكانياتها اللي أغلى من سعرها؛ ضمانها المحترم؛ ابتدت تنتشر وتعملها سوق وده أكيد حاجة مشجعة.

عيوبها: الأتوماتيك بطئ في تجميعه شوية؛ فراملها بحس إن مشوار الدواسة أطول بس أداؤها محترم جدا يعني بس تخلي بالك من الفرق ده؛ الكاسيت أوديو مش إم بي ثري؛ على الأقل بنزين 92؛ العيب الأساسي من وجهة نظري هو التوكيل لأنه زحمة جدا وبيتأخر أحيانا في بعض قطع الغيار غير الاستهلاكية وإن كانوا كفاءة - برضوا في حدود تعاملي معاهم.

خلاصة القول؛ العربية ديه أنا بحس إنها يعتمد عليها جدا وكل العيوب اللي أنا ذكرتها - بالنسبة لي - مبتقللش منها في شئ بس حبيت أوضحها لك.

واستنى ردود تانية من الخبراء هنا.

وربنا يوفقك

شكرا على ردك انت طمنتني شوية بس انا كنت عايز اسأل عن التوكيل بتاعها في مصر فين و اسمه ايه و ياريت اي معلومات عنه

التوكيل بتاعها هو عز العرب - وهو برضه توكيل ستروين في مصر.

والمقر الرئيسي بتاعه على طريق مصر-إسكنرية الصحراوي قبل البوابات بشوية - جهة القاهرة

وبياناته: ALPHA EZZ ELARAB CO.
Km 28 Cairo,
Alexandria Desert Road,
Ezz Elarab Automotive Complex
Cairo , Egypt
Telephone : 00 202 5390601 TO 9
Telefax : 00 202 5390610
Mobile : 010 539 6354

Habib Ibrahim Habib
Proton Brand Manager
Mobile : 002 010 6131 666
E-mail : habib@ezz-elarb.com

حسب موقع بروتون

وده فيه صالة عرض ومركز الخدمة الرئيسي

وفي مركز خدمة صغير لعز العرب في العجوزة واعتقد ليهم فرع في إسكنرية بس مش متأكد أوي - وليهم مركز خدمة معتمد في مدينة نصر اسمه أمير وجوزيف في شارع أبو داوود الظاهري - أنا مجربتوش بس الناس بتشكر فيه

وممكن حضرتك تلاقي معلومات أكتر برضه في:
http://www.nilemotors.net/Forum/viewtopic.php?t=5912
http://www.nilemotors.net/Forum/viewtopic.php?t=4417
http://www.nilemotors.net/Forum/viewtopic.php?t=4321
http://www.nilemotors.net/Forum/viewtopic.php?t=3053
http://www.nilemotors.net/Forum/viewtopic.php?t=2254
http://www.nilemotors.net/Forum/viewtopic.php?t=571
http://www.nilemotors.net/Forum/viewtopic.php?t=57

وربنا يوفقك

شكرا جدا لكل اللي رد و شكر خاص ا أ-هشام
بس انا بس عن عز العرب دة انه خدمة زبالة و صيانة اي كلام
الكلام دة صح ولا ايه؟؟؟
اتمنى يكون غلط عشان انزل اجيبها
بس لو كان صح ايه هي العربيات البدايل اللي ممكن افكر فيها و تكون في نفس السعر تقريبا و الامكانيات

العفو يا أستاذ أحمد

برضه من خلال تجربتي - وزي ما وضحت في أول رد ليا مشكلتهم الرئيسية الزحمة وحط تحتيها 100 خط

بس أنا هأحكي لحضرتك موقفين حصلوا معايا وإنت تحكم:

الأول، العربية (تاني دفعة نزلت مصر) تاني يوم ما اترخصت دخل فيها ميني باص جاب الباب اليمين بالجنب مع فانوس الإشارة والإكصدام. العربية ما شاء الله صاجها محترم بس كان لازم فانوس الإشارة والاكصدام يتغيروا والعربية تتسمكر وتترش - ولاحظ طبعا العامل النفسي في كل ده. طبعا ما كنش في أمل إن الحاجات ديه تبقى موجودة والعربية ما كملتش شهرين في السوق تقريبا. لاقيناهم موجودين واكصدامها أرخص من الواجا ودخلوا العربية بأولوية على كل اللي موجود -ورشة السمكرة بتخدم كل الماركات اللي بيتعامل فيها عز العرب وكانت زحمة جدا عشان كانت دخلة الصيف (آخر شهر خمسة) واستلمناها بعد 3 أيام بالظبط مراعاة للظروف.

التاني، العربية واقفة في الجراج مش راضية تدور؛ أكلمهم هاتها، ختها على ونش، البطارية كانت عايزة تتغير، لسه في الضمان، من غير ما اتكلم اتركبت الجديدة وخدت العربية بعد نص ساعة. وذات الشئ حصل مع الكلاكس مع إنه كان عيب استخدام غيروهولي في الضمان والله.

اللي عايز أقوله إن فيما يتعلق بالضمان والمواقف الحرجة بتلاقي فيها حد يعتمد عليه - برضه في حدود تجربتي

مشكلة الزحمة الأزلية ظهرت مع انتشار العربية فبقيت لازم تكون هناك الساعة 7 الصبح مثلا عشان تبقى من ضمن أول 20-25 عربية تتصان وإلا فالعربية هتبات وطبعا العربية ما تتسلمش قبل الساعة 2 ظهرا مثلا على حسب الشغل اللي فيها - يعني يبقى فيه يوم تتفرغ فيه للصيانة. بس اللي أنا عايزه في العربية بيعملوه. واللي اعرفه إنهم بيفكروا يبنوا مركز منفصل لمبيعات وصيانة بروتون في أبو رواش وتفعيل خدمة حجز الصيانة بالتليفون عشان الزحمة وعدم الانتظام - بس مش متابع التطورات ديه أوي لظروف تواجدي خارج مصر حاليا.

وبرضه عشان أكون صادق معاك هما متأخرين علينا في استيراد زرار ضبط المرايات - بس أنا مش مديلو اهتمام أوي ولو في حالات زي ديه في موضوعات في المنتدى عن مدى الاهتمام اللي بتلاقيه من بروتون الأم لو بس كتبتلهم عن أي مشكلة بيتفاعلوا معاك مباشرة.

دي شهادة حق مني، أنا مش بحاول أحليهالك أو أعيبلك فيها دي تجربتي فقط لا أكثر ولا أقل وحاول تستمع لأكتر من رأي - لأن قرار شراء العربية مش سهل - وربنا يوفقك للي فيه الخير.

شكرا جدا يا استاذ هشام
طب سوأل كمان معلش انا بسأله ليك بصفة شخصية
اجيب gen 2 ولا optra ولا waja
من حيث الشكل الداخلي و الكماليات و الصاج و تعاملك مع الوكيل
و اسف طولت عليك اوي و ترجغلنا بالسلامة

من حيث الشكل الداخلي و الكماليات و الصاج

جين 222222222222222222


توكل على الله العربية ممتازة