تحسن فى استهلاك البنزين

**A.samy** · 07-07-2009 10:01 PM

الموضوع دة ياجماعة ان مكنتش عايز اكتبة الا لما احسب استهلاك البنزين كويس الموضوع بدايتة ان لمبة التشك نورت وكنت كتبت موضوع بهذا الخصوص http://www.nilemotors.net/Nile/showt...t=81329&page=2 ومكنتش عارف اية السبب وبعدين طلع ان السلك بتاع حساس الشكمان كان لافف على سير الدينمو ومقطوع المهم غيرت السلك ونظفت نقط التلامس الخاصة بسوكت الحساس عزلت السلك بعازل حرارى لانى لقيت السلك قريب جدا من من جسم الماتور وطبعا كل دة وانا فاصل البطارية وبعدين عملت ايديل ليرن ورحت مونت العربية وبعدين مشيت بالعربية يومين وبعديها حسيت ان مؤشر البنزين مش عايز يتحرك من مكانة اوبيتحرك ببطء شديد قلت يبقى الطرمبة فيها مشكلة فى العوامة بتعتها وطبعا مكدبتش خبر ورحت فاكك الطرمبة ونظفت نقط التلامس بتاعت العوامة والشريحة وقفلت لقيت المؤشر برضة مش عايز يتحرك واو بمعنى اصح بيتحرك ببطىء شديد على غير المعتاد المهم قلت خلاص هعتمد فى تموين العربية على عداد الرحلات كل لما يوصل العداد الى 300 كيلو هروح افول واصفر العداد تانى المهم عملت كدة لقيت العربية لما روحت افول اخدت حوالى 22 لتر بنزين فى استهلاك 309 كيلو بالظبط الحقيقة فرحت وعرفت ان اللى عملتة فى طرمبة البنزين مكنش لية لزمة وان الشغل الحقيقى اللى اثر فى استهلاك البنزين كان لما غيرت سلك حساس الشكمان وعزلتة بعازل حرارى طبعا انا مكتبتش الموضوع دة الا لما اتأكدت من الاستهلاك بعد لما فولت كذا مرة على فكرة ان كانت اغلب مشاويرى كوكتيل بين داخل البلد والدائرى ولما هطلع على طريق سفر هحسها بالظبط وهقولكم .
على فكرة انا كان استهلاك البنزين عندى كان 190 كيلو فى الصفيحة داخل البلد و210 على الطريق السريع رغم انى مغير رشاشات

**samirayad** · 08-07-2009 10:59 AM

لقيت العربية لما روحت افول اخدت حوالى 22 لتر بنزين فى استهلاك 309 كيلو بالظبط الحقيقة فرحت

أمسك الخشب ..........(ما .................ألا أصحايه )...................( أظن المثل الشعبى ده معروف )........وطبعا لك منى المباركه والحمد لله على عطاياه

**A.samy** · 08-07-2009 12:47 PM

الحمد لله وربنا يستر الحكاية وما فيها ان انا عايز الزملاء اللى يحس ان استهلاك البنزين عندة زيادة يحاول بقد الامكان يتأكد من وصلات حساس الشكمان وكمان ينظف السوكت الخاص بية ويحاول يعزل السلك عن جسم الماتور بأى عازل حرارى وبرط السلك بأفيز فى اى مكان ثابت وياريت من كل فتر للتانية تحاول تفصل بطارية العربية فترة لعمل ريست لاوامر الكمبيوتر وطبعا ترجع تعمل ايديل ليرن بعد ما توصل يعنى لو انت مش خارج بالليل افصل الكبلات بتاعت البطارية و وصلها تانى الصبح طبعا الكلام دة مش كل يوم الكلام دة ( بتاع البطارية ) انا بعملة كل شهر والحقيقة بحس بفرق مش عارف اية السبب بالظبط بس الحقيقة بحس بفرق .
طبعا اللى بيتفصل فى البطارية الكابل الموجب فقط .

**samirayad** · 08-07-2009 12:57 PM

انا عايز الزملاء اللى يحس ان استهلاك البنزين عندة زيادة يحاول بقد الامكان يتأكد من وصلات حساس الشكمان وكمان ينظف السوكت الخاص بية

أنا معاك فى دى يا أبو حميد ....لأن لو السوكيت لو مهويه أو مش نظيفه ( بنقول عليها عامله أتصال غير جيد ....يعنى مفيش أشاره رايحه للوحده ) كأنك فاصل الحساس بالظبط ....وكده الأستهلاك مفتوح على البحرى

ويحاول يعزل السلك عن جسم الماتور بأى عازل حرارى وبرط السلك بأفيز فى اى مكان ثابت

عشره على عشره (عارف ليه ) لأن السلك ده لو لمس الموتور ....العزل بتاعه حيروح فى نقطة التلامس بسبب السخونه بتاعة جسم الموتور وهو شغال فلازم يبقى بعيد عن أى تلامس حرارى وكفايه عليه الحراره اللى بتروحله بالأشعاع الحرارى اللى بيبقى جوه الغرفه أساسا ...لأن أسباب أنهيار أى عزل كهربى هى الحراره اللى غير مصمم عليها العزل بتاع السلك أنه يتحملها.......وكده الأشاره حتهرب للأرضى بتاع جسم الموتور لما سلك الأشاره يلمس معاه........وكأن الحساس مش شغال أو مفصول ................بجد الله ينور عليك

**samirayad** · 08-07-2009 01:13 PM

وياريت من كل فتر للتانية تحاول تفصل بطارية العربية فترة لعمل ريست لاوامر الكمبيوتر وطبعا ترجع تعمل ايديل ليرن بعد ما توصل يعنى لو انت مش خارج بالليل افصل الكبلات بتاعت البطارية و وصلها تانى الصبح طبعا الكلام دة مش كل يوم الكلام دة ( بتاع البطارية ) انا بعملة كل شهر والحقيقة بحس بفرق مش عارف اية السبب بالظبط بس الحقيقة بحس بفرق .

معلش نسيت أعلق على دول ......بس الصراحه دول ملهومش لازمه .......لعدم توافر السبب العلمى للأجراء ده .....ومعلش ......أنت عارف أن أنا حقانى شويه ( أأقول اللى ليه واللى عليه ) ههههههههههههههههه

**akramlail** · 08-07-2009 04:29 PM

ممكن اسال اعزل اى جزء ولا كلة انا بصيت لقيتة ماشى من فوق ونازل على تحت وجواة سلك لونة بنفسجى طب مش الغلاف الاسود اللى علية دة عازل ؟؟ والسلك البنفسجى هوة دة الحساس