الموضوع: معا لألغاء الميكروباصات

والله والله والله انا كرهى لبتوع الميكروباص اكتر من اى حاجه فى الدنيا واللى اتعمل فى عماد الكبير لما عرفت انه سواق ميكروباص فرحت جدا جدا وقلت ده شويه عليه ويارب كل سواقين الميكروباص تجيلهم مصيبه حتى واللى راكبين معاهم علشان سلبين وبايدو السواقين فى كل حاجه

المشاركة الأصلية كتبت بواسطة kh_talaat

طبعا انا مع إلغاء الميكروباصات .... ايوة مع الغاء الميكروباصات

[overline]لكن قبل إلغائها يجب توفير البديل زي مثلا[/overline]

1- توسيع شبكة مترو الأنفاق في القاهرة الكبرى ودة بتعمله الحكومة فعلا شغالين في الخط التالت (مطار القاهرة - امبابة) وقريت كمان عن الخط الرابع ( الملك الصالح - 6 أكتوبر)

2- استغلال نهر النيل بتجديد وتفعيل الأوتوبيس النهري كوسيله سريعه وحضارية للمواصلات

3- عمل اوتوبيسات عامه بطابقين ( زي أوتوبيس اسكندرية الجديد) ودة يعتبر توسع رأسي في أوتوبيسات النقل العام لا يؤدي الى زيادة الزحام في الشوارع ، يعني تخيلو كدة لو كل أوتوبيسات القاهرة الكبرى تبقى بدورين يبقى ضاعفنا عدد الأوتوبيسات بدون زيادة في عدد الخطوط اللي ماشية في الشوارع

4- تأسيس شركة خاصة أو حكومية تملك سيارات السيرفيس أو الميكروباصات ويعمل فيها السائقون كموظفون ويتم إلحاقهم بالعمل بعد تقديم الأوراق المطلوبة لأي عمل مثل الفيش والتشبية والشهادات الصحية وخلافه .. وعمل تأمين اجتماعي لهم وتأمين صحي

الأفكار كتير يا جماعه بس محتاجين الحكومة الواعية اللي تنفذ الكلام دة

وساعتها اكيد معظمنا هيفكر انه يركن عربيته ويوفر البنزين ويركب المواصلات العامة المحترمه

[overline]كلمة أخيرة [/overline]

عيب قوي يا جماعة لما نقول
شعبنا مش بيمشي عدل غير لما ياخد فوق دماغه
العملية عملية نظام مش أكتر ويكون عن طريق الحكومة لأن هي المنوطة بذلك .. وآسف على الإطاله

الله ينور عليك يا استاذ طلعت

شوفوا يا جماعه انا لما طرحت الموضوع ده موش كنت بفكر من وجهة نظري كمالك سيارة، انا ماتولدتش لاقيتني معايا عربيه ده العربيه دي من قريب جدا يلا فرصه تباركولي :)

وبصرف النظر عن العربيه انا نسبة اعتمادي عالميكروبصات 60% كوسيلة نقل لكن صراحة انا بركبها وانا مضطر حمايه من لهيب الشمس وبتكون طبعا اكتر في اعدادها،، لكن اللي بيحصل وانا في الميكروباصات جواها وبراها شئ مؤسف
من بره طبعا انتم عارفيين عاوزيين يمشوا ومايكونشي حد قدامهم خالص بيسوق كأن الشارع بتاعهم وبس، غرز طبعا ومناورات عالطريق وفوق الكباري بشكل مخيف، طيب انتم متخيلين المنظر كده من بره وانتم سايقيين وشايفين من مراية العربيه "وحش الطريق" ميكروباص واخد الطريق غرز وزمامير وازعاج وبيطير متخيلين مدى خوفك اللي سببه ميكروباص وراك وتبقى عاوز تتقي شره عشان مايحدفشي عليك يعني عملك من الاخر ارهاب وكارت انذار انك ماتحاولشي تتحداه طيب سيبكوا منا
خلينا في الناس اللي جوى الميكروباص هل هما مستمتعيين باللي بيحصل، لأ طبعا انت موش بتبقى دريان باللي بيحسوه الناس اللي جوه دول بيبقوا خايفيين ادك ويمكن اكتر منك والله والله الناس بتكون واقفه كبار وصغار يستنجدوا بالسواق يهدي يسوق عدل متخيلين الناس بيحاولوا يمسكوا في كل حاجه ممكنه عشان مايقعوش تعالى بقى للناس القاعديين بنسبه 70% مع كل غرزه وفرمله ومطب قولولي انتم حال معدتهم بيكون ايه.
انا موش هاتكلم عن كلام انتم عارفينه زي حالة الميكروباصات اللي ماشيه اللي تحس انها عباره عن صاج واربع عجل والسواق جاب انتريه من القرون المنصرمه وربطهم في صاج العربيه اه والله :))
ولا عن اللي سايقيين دون السن المسموح بي ولا عن الاوانص زي ما بيسموها الفلوس اللي بيرشوا بيها عشان الدنيا تمشي، ده كلنا عارفينه، علاوة ع الحوادث اللي بتؤدي للموت
وماأقدرش اقول تتحذف من حياتنا بسبب المصايب اللي من وراها مافيش حاجه كده بتحصل مره واحده لكن انا اللي اقصده ان يتم وضع ضوابط وقوانيين تحد من المهزله اللي بيسببها الميكروباص ولازم صوتنا يوصل للمسئوليين عن التسيب والفوضى دي
والحلول البديله زي ما حضراتكم قلتم
1- توسيع طرق متروا الانفاق
2- عمل اتوبيسات ميكفه محترمه ليها مواعيد ثابته موش ماشيه كده والسلام
فيه كمان مدينة الاسماعليه وصراحة المدينه دي جميله جدا نظافه وناس انا روحتها من 4 سنيين ماشوفتش ميكروباصات بس كنت بشوف تكاسي في غاية النظافه كانت بتركب بالنفر وبتيجي تحمل الناس وكان سعرها رمزي جدا زي تذكرة الاتوبيس
والله في حلول تانيه كتير تخلينا ما نعتمدشي على الميكروباصات اللي بيجد عامليين ازمه وواخدنها بالدراع او ان فعلا تتحط قوانين جذريه وحازمة لسواقيين الميكروباص لانهم موش بيؤذوا اللي بره بس لا كمان اللي راكبيين فيها

الف شكر لكل الناس اللي شاركوا في الموضوع وفي انتظار المزيد من مشاراكاتكم وفعلا الجروب ده بيثبتلي كل يوم اد ايه هو وباعضاءه محترميين

ومن ضمن كلامنا اللذيذ ده اللي اي حد يشوفه يستمتع بي لانكم بتذكروا مواقف بطريقه سرد لطيفه تجذب اي مهتم نحاول نطلع بحلول وناقشها ومين عارف يمكن نقدر نعرف نعمل حاجه

المشاركة الأصلية كتبت بواسطة tutankhamoun

معلش يا باشا أنا مختلف معاك .......
حرام عليك تدعي على الناس ..........
المشكلة في الجهل بالقوانين .........
و حرام تفرح في مشكلة سواق منهم ........ برضه العيب مش عليهم بقدر ما هو عيب على الحكومة ......

بس في النهاية ....... نعدمهم برضه في ميدان عام .......

ههههههههههههههه انت شاكلك شايل منهم اوي

للاسف فيه كتير بينسوا اول درس اتعلمته في القيادة
القيادة فن-ذوق-اخلاق
ما احنا برضوا نستاهل كتير