الموضوع: الحضرى يقاضى جوزيه ومجلة سوبر الإماراتية

اولا انا اهلاوي .. و زعلت من الحضري على الحركة النص كم اللي عملها مع الاهلي بس مبكرهوش ... بس الكلام اللي قاله دة بيظهر اد ايه هو شخص سطحي و مش مقدر لعواقب افعاله و غير صريح مع نفسه و بيضحك على نفسه ... اول امبارح كان في الاهلي و امبارح كان في سيون و بكرة في ديار بكر ... فلاح صحيح

المشاركة الأصلية كتبت بواسطة mahfouz1983

أكد عصام الحضرى حارس مرمى مصر وسيون السويسرى، أن البرتغالى مانويل جوزيه المدير الفنى السابق للأهلى قد تجاوز الخطوط الحمراء فى حواره لمجلة سوبر الإماراتية وغلط فى مصر كلها، كما هاجم الأهلى، الذى وفر له الإمكانيات ليحرز البطولات التى تسببت فى شهرته، وكذلك أخطأ فى الإعلام المصرى، الذى كان وراء شهرته ولابد أن يتقبل أى لاعب أو مدرب النقد، وأعتقد أن إساءة جوزيه للإعلام شىء غريب، لأن هذا الإعلام هو السبب فى شهرته.

ورد الحضرى على تصريحات جوزيه ضده فى حوار سوبر الإماراتية، بأن جوزيه باع الأهلى وجماهيره ورحل لتدريب منتخب أنجولا من أجل الفلوس.

وعن قول جوزيه، بأن الحضرى ممكن يبيع عائلته علشان الفلوس، قال الحضرى: "أنا كلمت المحامى الخاص بى ليرفع قضية ضد كل من جوزيه ومجلة سوبر الإماراتية حتى أحافظ على حقى".

قال الحضرى فى حواره لبرنامج بالمصرى الذى يذاع على قناة on.tv، إنه يتطلع للمستقبل دائماً، أنا دائماً أفكر فى المستقبل وأنسى الماضى، وخلاص لا أريد الحديث عن رحيلى عن الأهلى، وعموماً ده كان غلطة ولو عاد الزمان لن أكرر هذه الغلطة.

وأجرى الصحفى المصرى أيمن بدرة سكرتير مجلة سوبر الإماراتية، مداخلة هاتفية، وأكد أن الحوار مع جوزيه صحيح، وقد أدلى به للصحفى البرتغالى، الذى يراسل المجلة الإماراتية.

وكشف الحضرى عن تلقيه عرضاً رسمياً من نادى ديار بكر التركى الصاعد حديثاً، وقال لو فيه نصيب هألعب بين صفوفه، ولن أعطى قرارى النهائى إلا بعد أسبوعين.

وقال الحضرى: "قرار احترافى والرحيل عن الأهلى أعطانى خبرة كبيرة، والآن أفكر وأدرس وأعرف إمكانيات أى نادٍ قبل الانضمام إليه"، وأضاف أنتظر عودتى للأهلى، الذى له الأولوية، وإذا رفضت إدارة الأهلى عودتى هذا لن يجعلنى أزعل، لأنه يكفينى عودة حب جمهور الأهلى للحضرى.

ورفض الحضرى التعليق على مفاوضات الإسماعيلى، وقال: "3 حاجات من صغرى أحبها، أنا طموح وأحب شغلى جداً داخل الملعب وخارج الملعب، ولا أحب الهزيمة داخل الملعب، مضيفاً، الهجوم ضدى يجعلنى انفعل وأفجر كل ما فى داخلى

هوا احنا ليه بندفن رأسنا فى الرمال و بتخدنا الحماسه قوى لما حد اجنبى مبيخفش يقول الحقيقه و نقلب الدنيا انا شخصيا شايف ان :

1- الحضرى فعلا يبيع ابوه علشان الفلوس

2- الصحافه المصريه افشل صحافه فى العالم و كلها ارزقيه و الأخبار كلها عباره عن اعلانات مدفوعه الأجر فى صوره اخبار و مافيش شفافيه خالص

3- جوزيه مغلطش و بيقول الحقيقه

المشاركة الأصلية كتبت بواسطة aif

بعيدا عن الكورة و مشاكلها لأنها ما تستاهلش ان حد يكتب عنها ... وبعيدا عن الحضري و انه علطان ولا عنده حق ....... مالهم الفلاحين .... يا ريت توضح .... انا اصل اهلي فلاحين
هي كلمة فلاح بقت تهمة .... ولا بقت شتيمة

هي دي اللي مسكت فيها ؟؟؟؟انا اهل والدتي فلاحين .. و مهياش شتيمة ... بس دي كلمة دارجة لما حد يبقى مش عارف يتعامل مع الحياة المدنية .. يعني مش عارف يتصرف ازاي مع وسائل الاعلام مثلا او مش عارف يحافظ على مظهره .. لكن مش مقصود بيها شتيمة ... على كدة بقى منقولش نكت على الصعايدة عشان متبقاش شتيمة .. و لا نتكلم على عشوائيات القاهرة عشان متبقاش شتيمة ... الموضوع ابسط من كدة يا حاج احمد

المشاركة الأصلية كتبت بواسطة aif

ممكن يبقى الوصف اللي عاوز توصف بيه حد زي مانت بتقول انه عديم اللياقة ... انه بيئة .... انه جشع .... انه مدب ... انة وصولي ... انه انتهازي ... انه طماع

الاوصاف كتير ..... بس انت كدة ح تزعل كل الفلاحين منك ...... وبعدين انت اهل والدتك فلاحين .... يعني عارف ان الفلاحين جدعان ورجالة ومش خاينين و بيبقو ع العشرة ....

مش معنى كدة اني شايف عصام الحضري بالاوصاف دي .... انا مش عارف الخلفيات اللي دفعته للتصرف كدة و ما اقدرش احكم عليه

معلش الكلمة استفزتني ....
ولما بنقول نكتة على الصعايدة بيبقى معروف انها نكتة وفيها مبالغة وهزار ... برغم ان ناس كتير جدا من الصعايدة بيزعلو بجد منها
لكن لما تصف واحد تصرف بشيء غير لائق او منافي للجدعنة والشهامة ... او ... او انة فلاح ..... اكيد الفلاحين ح ياخدو على خاطرهم
على العموم حصل خير .... وانت طلعت فلاح زينا أهو ..... اوعى تكون م المنوفية كمان ..... نبقى جيران

حصل خير ... بس الحقيقة اهل والدتي من الشرقية و اصولهم من الاشراف