الموضوع: السيارات الصينيه سيارات فاشله

المشاركة الأصلية كتبت بواسطة som3aa

طيب ممكن اسال سؤال ازاى برقبة الفرنا؟؟
المقارنة فى ايه , الموتور طبعا موتور الفرنا اقوى بكتير , الثبات : اكيد الفرنا مع عيبها المعروف اللى هو ضعف الثبات احسن 100 مرة بالعقل كدا من ال113 , من ناحية ايه بالظبط قولى حاجة واحدة بس احسن , انا مش مقتنع اساسا ان ال113 دى عربية ممكن واحد يشتريها خالص , طيب ال620 و قولنا ماشى , 516 و قولنا نعديها بالعافية انما ال113 دى زيادة اوى , عربية تحسها لو واحد طخين شوية دخل جواها هتقع بيه على الارض و مع انها نزلت فى مشروع تاكسى الجديد مشفتهاش و لا مرة فى الشارع مع انى شفت جميع العربيات من اول اللادا للبيجو البارس , و كان فى واحد هنا عامل عنها تقرير بيقول زبالة و تحس انك قاعد على الارض و فعلا تخاف على نفسك جواها , طيب طالما العربيات الصينى ممتازة كدا ليه مبتنزلش دول محترمة و تبيع هناك؟؟ مع ان الفرنا فيها عيوب تقفيل بسبب غبور الا انها نزلت و التباعت فى العالم كله و كميات ضخمة لانها عربية جيدة و بعدها الاكسنت انما ايه اللى يخلى شخص يدفع 70-90-150-170 الف جنيه فى عربية صينى؟؟ مجهولة المصدر و العربيات البريليانس الجالينا اللى اتباعت فى مصر زبالة مخدتش نجمة واحدة فى اختبار الامان الاوروبى فى 2007 , بعد كدا طورها و خدوا اختبار اخف شوية و خدت 3 نجوم , طيب معنى كدا ان كل اللى اشترى القديم معاه عربية لو دخل بيها فى اى حادثة هيروح فى داهية و السقف هيطبق عليه!!! تخيلوا دا اللى احنا نعرفه , ليه الواحد يجازف و يشترى الfrv اذا كانت الكبيرة اللى ب 170 الف كدا!!!!
ليه طالما فى بدايل محترمة يابانى و كورى زى الدايهاتسو السيريون و الاكسنت و الياريس و لو وصلت ل 90 فى الاوبترا و الالنترا و اللانسر و فى حاجات كتير اوى , اذا كان الجالينا اللى هى ب 170 الف تحسها صينى من جوه و العربية كلها بلاستك رخيص ردىء الصناعة و الجودة من مجرد اللمس و كدا , الواحد يقوم يشترى الصغيرة منها ب 80 الف!!!!

و الله اللى يشترى العربيات الصينىدى مش مفروض يشتكى خالص و لا يتكلم و يقول العربية سيئة لانه هو اللى جابه لنفسه (مش بتكلم على صاحب الموضوع , ربنا يعوضك خير ان شاء الله) , انا بتكلم على الناس اللى قاعدة تدافع دلوقتى و تقول العربة معايا اهى زى الفل عامل بيها 10 كيلو و لسه مستلمها من التوكيل و مباظتش , بتريق طبعا بالذمة ا كلام , العربية ممكن نبدا نتكلم بعد 30-40 الف كيلو نشوف العروب المبدئية بعد كدا بعد 3-4 سنين نشوف العربية لسه عربية و لا بتتجر دلوقتى كدا يعنى!!!
اذا كانت الاسبرنزا اللى هى من اقدم العربيات الصينى فى مصر اول دفعة اخر 2006 هى و البريليانس يعنى معنى كدا معداش عليهم 3سنيتين و نص يبقى ازاى الناس بتتدعى انها تقدر تحكم
العربية مش شكل و خلاص و لو سمحتوا متقولوش عيب فردى و الكلام الاهبل دا لان لو العربية كانت كويسة كانت اتباعت فى الدول المحترمة الاوروبية او امريكا (سواء الشمالية و لا الجنوبية ) و لا استراليا و لا دولة اسوية محترمة.

أخى الكريم
بهداوة شوية الكلام مش قفش كده الناس اللى شارية العربيات الصينى اكيد برده عندها مخ مفيش حد مش فاهم
وللعلم أى عربية ليها ظروفها ممكن تظبط معاك وممكن لأ...
وكمان يعنى عايز الناس اللى راكبه عربيات وماشية بيها كويس متقلش ونقول نصبر 3 سنوات يعنى مفيش انطباع أولى عن العربية ليه بتحجر على آراء الناس...
وبعدين فعلا العربيات دى كويسة فى مشاكل مبنقلش لأ بس مش خطيرة كلها حاجات بسيطة وبتتظبط
والناس ليها تجاربها وكل واحدد بيقول رأيه ....
ولو حنتكلم عن المشاكل كل العربيات فيها مشاكل وكل عربية ليها ظروفها والطرق اللى بتمشى عليها والسائق وطريقة سواقته كل دى عوامل منغفلهاش...
وبالمصادفة ليا جار معاه نيسان صنى 2005 مبهدلاه وقرفان منها يعنى ده معيار انها عربية مش كويسه بالعكس شوف انته هو بيعامل العربية ازاى وابقى احكم...
وايضا ليا زوج خالة زوجتى معاه اسبرانزا 516 من سنة وشهرين بيشكر فيها جدا جدا هو بيعاملها كويس ...
وانا النهارده جاى الشغل معدى جنبى فيرنا العربية صوتها عالى جدا وبتكركر بس سايقها 2 شباب ...
يا جماعة فى ظروف سواقة منغفلهاش علشان نحكم أى عربية حتصونها حتصونك حتبهدلها حطلع عينيك
وده برده ميلغيش ان فى عربيات سيئة من بابها وانت عليك اشترى عربية كويسة وتوكيل محترم
الإسبرانزا عربية كويسة والبريليانس كويسة والناس اللى بتجرب تحكم ....
فمعلش انتى متهجمش وتنسى انك ملكش تجربة على تحكم عن واقع وبينة يعن الأخ الكريم صاحب الموضوع تجربته سيئة وده وارد جدا وبيحصل فى عربيات كتير جدا..
أخى الكريم اعذرنى اذا كانت لهجتى قاسية ولكن فعلا السيارات الصينية فيها الجيد فعلا..

المشاركة الأصلية كتبت بواسطة jam

منعآ لكتر الكلام
[youtube]http://www.youtube.com/watch?v=g5sryg6ur2a[/youtube]

يا أخى العزيز

مش عاوزين نرجع تانى للفيديوهات القديمة دى

مشكوووووووووووور

المشاركة الأصلية كتبت بواسطة som3aa

بالعكس لغتك مش قاسية خالص شكرا على ردك , انا كنت عايز اسال كام سؤال , طيب اكيد ركبت الجالينا و الاسبرنزا فلا المعرض مثلا , قولى رايك على جودة الخامات , اذا كانت الاسبرنزا اللى كانت واقفة فى معرض اوتومك كان فى سلك طالع منها و حاجات كدا , بص على التابلوه و قولى الخشب (المضروب ) دا و شكل عام كده كل دى حاجات رخيصة و لا لأ , طيب بلاش العربية خدت نجمة واحدة دى و اطبات على دماغ الدمية اللى كانت جواها لو حصل حادثة حقيقية لمالكها فى مصر على سرعة 60 الراجل يموت بسبب سوء التصنيع؟؟
تضمن بقية عربيات بريليانس و لا اسبرنزا بعد العربيتين اللى عملوا اختبار امان اوروبى اتبهدلوا بالشكل دا قاموا عملوا حاجة اسمها اختبار امن صينى (مضروب برده) بينجحوا فيه كل العربيات نجاح رهيييب؟

طيب ليه لما العربيات كويسة مبتنزلش اى دولة متقدمة , لان بره فى دعواى قضائية و حقوق مستهلك و شعوب واعية , بمعنى لو العربية ظهر فيها المشاكل دى هيرجعها غصب عن التوكيل و يسترد فلوسه او لو عمل حادثة و حلص اللى بنشوفه دا تخيل هيدفعوا الشركة المصنعة كام تعويض .

الفكرة ان سنة مش كفاية و لا سنتين غير لمعرفة عيوب التقفيل الاولية , قوة الهيكل متبنش غير فى اختبارت التصادم او فى حادثة حقيقية , و المشكلة ان ناس كتير ظهرلها عيوب بالهبل , معنى ان شخص العربية عنده كويسة و لا لأ دا مش مقياس , بعدين لازم نراعى ان سعر اعادة البيع ضايع يعنى لو الواحد جازف و اشترى العربية هيلبس فيها علطول او هيخسر مبلغ ضخم جدا , بعدين على ايه كل الكلام دا؟؟ على شكل حلو او شوية كماليات؟؟
طيب ليه , قولى عربية صينى ملهاش بديل فى نفس السعر بالظبط و بديل يعادلها فى حاجات كتير , طيب طالما فى بدايل ليه الواحد يجازف بفلوسه , اذا كانت العربيات الكورى اللى بتباع فى العالم كله و فى امريكا اكبر و اصعب اسواق العالم و فى اوروبا و باعداد ضخمة جدااااا من العربيات لسه احنا هنا فى مصر بنتكلم على الكورى تخيل امال الصينى يبقى ايه؟؟

بعد 10 سنين فى رايى الشخصى العربيات الصينى ممكن تبقى جيدة فى النع بس دلوقتى مستحيل , دى شركات لسه فاتحة مكملتش 10 سنين و لسه بتجرب و تختبر فى الاول و دى اول انتاج ليها ازاى يعنى يبقى صنعها كويس؟؟

طيب ليه منصبرش لما العربيات دى تتجرب بره م تاخد جوايز فى الجودة بعدين نشتريها ؟؟ ليه الشعب المصرى غنى مثلا علشان يتجرب فيه منتج بايظ ب 170 الف (الجالينا ) و كدا؟؟ ليه يتجرب فينا العربيات دى؟؟ السبب بسيط مكسب توكيلات العربيات كبير جداااا و التوكيلات العالمية كلها متاخدة فلجاوا للصينى علشان ارخص و مكسبه كبير جداااا

أخى الكريم

اسمحلى اشكرك على ردك وذوقك والحوار الطيب ومع اختلافى معك فى بعض الأمور لكن هذا الخلاف لا يفسد للود قضية
العربية الإسبرانزا خامتها سيئه جدا لا اختلف معاك بس البريليانس بجد جيده جدا ومتينة
مسألة اختبار السلامة دى ربنا يستر انتى ممكن تبقى ماشى فى حالك على الطريق وتلاقى عجلة طيشة فى الطريق زى اللى حصل على الدائرى او عربية فيها شباب طايرين على سرعة 200 ويلبسوا فيك
شوف بعد الألمانى مدورش وعن تجارب لا يبانى ولا كورى الأمان ربنا اولا وعليك وعلى الألمانى
عيوب الصناعة ده امر موجود الكمال لله وحده ومتقليش مفيش منتج من غير عيوب صناعة ده صنع بشر
واليابانى فيه والدليل الكورولا 2009 وتقفيل النيسان الصنى فى مصر ومشكلة الضفيرة الأزلية وده برده ميأثرش على ان التويوتا وانيسان من افضل اليابانى..
مسألة اعادة البيع معاك انها مسألة تخوف بس فى منتجات فى بلادنا اعادة بيعها ملوش علاقة بجودة السيارة وأكبر مثل الرينو والمازدا عربيات ممتازة وملهاش سووووق خالص وفى امثلة كتيرومع كده الناس بتشترى عربيات رينو ومازدا وعندك الفولكس الباساة والجيتا مفيش بعد كده وتوكيل ضعيف جدا وبردك الفيات مفيش توكيل محترم
معلش عربيات زى الفل ومفيش خدمة وقطع غيار غالية ومفيش اعادة بيع كويس فين المشكلة ومع كده الناس بتشترى والسبب ان الناس بتشترى علشان تركب عربية مش حتبيعها قبل ما تشتريها اصلا...
الجالينا عربية كويسة والموديلات الحديثة بالذات وكماليات ممتازة وضمان 5 سنوات بدون حد اقصى للكيلومترات
مظنش كده دى تخوف وده ضمان البفارية مش اى كلام ...
بس معاك ان سعرها مبالغ فيه وانا لو بشترى اجيب اوبل أو a5 كل ده بسعر قريب وأوروبى بس لولا اختلاف الأذواق لبارت السلع..
ومتنساش ان الصين دى متقدمة جدا فى الصناعة بدليل كل الهادوير اللى فى اسواق العالم كله صينى ...وحاجات كتير
واعتقد ان السنوات الخمس القادمة كل العربيات حتبقى صناعة صينى والأيام حتثبت الكلام ده ...
معلش على الإطالة وهذا ليس دفاعا عن الصينى ولكن لوضع الأمور فى نصابها ومع ايقانى تماما بجوده الأوروبى واليابانى والكورى ولكل منتج بداية ممكن تكون ضعيفة ولكن لابد من وجود البداية واعتقد ان باية الصينى اقوى بكثير من الكورى واسأل بنفسك عن اليابانى اول مانزل الناس بتقولك ايه اليابان اللى عمرها كام وعشرين سنة بعد الحرب العالمية ووقتها الأوروبى والأمريكانى البشاوات وصاج ايه ومواتير ايه ومع كده اليابانى بقة المنافس رقم واحد وبقوة...
نخلى الأيام تقول كلمتها وخلينا ناخد الإنطباع ومنحكمش غير على تجربة ....
وتحياتى لك وارجو ان تتقبل مداخلتى...