الموضوع: السيارات الصينيه سيارات فاشله

المشاركة الأصلية كتبت بواسطة medo1986

اولا شكرا ليكم على المتابعه بس ارجوكم قبل ما تردوا على موضوع ماتتسرعوش فى الرد لان كلامى دا مش هيضرنى انا بحاجه لانى خلاص مش راكب صينى انا قولت الكلام دا ليكم انتم اللى راكبين صينى واللى لسه بيفكرو يركبو صينىواحكيلكم على تجربتى كامله والله المستعان
انا اشتريت فى الاول سبيرانزا 20/2/2008 عند مرحلة ال 3000ك العربيه شخللت قولت اتصل واعرف مكان الضمان والصيانه دلونى على ابو الفتوح روحت هناك بصراحه معامله زباله زباله زباله المهم عند 10000ك لقيت العربيه لو داست على حصوايه فى الارض الدريكسيون يخبط روحت الضمان قالو دا عمود دريكسيون وصلايب دريكسيون المهم ربطو وظبطو بعدها ب1000ك رجعت تانى روحت الضمان قالو هيتغير وفعلا بداو يصرفو لى عمود جديد وقالو لى بعد 20 يوم هنكلمك ونقولك تعالى ركب العمود فعلا كلمونى ورحت كل دا مشاوير من الفيوم لطريق اسكندريه الصحراوى 200ك رايح جاى المهم روحت قالو العمود ناقص روح انت ولما نجيب عمو د كامل هنكلمك وكلمونى وروحت كان فى رمضان اللى فات سلمت العربيه انا وواحد صحبى وروحنا ندور على مكان ننام فيه دا جو صيام وتعب المهم فوجئت بيهم بيصحونى وبيقولو العربيه مش هنركب لها عمود عشان لسه هنفك ونعمل وهياخد وقت وهيا اصلا مش طالبه عمود دا كلام رئيس المهندسين قولتلو اللى صرف لى العمود مهندس قالى دا حمار قولتلو طيب هوا حمار ليه مشغلينو يبوظ حاجة الناس المهم معرفناش نعمل حاجه وغير كدا كتير بس انا هتعب من الكتابه لغاية ما قولت انا هبيعها وفعلا لقيت زبون بالعافيه والحمد لله ربنا كرمنى وبعتها وركبت نيسان اللهم صلى ع النبى مش عاوز اروح بيها صيانه او ضمان ليه لانها يابانى دى مراية الاسبيرانزا اتكسرت غيرتها 440ج فى التوكيل ليه مراية تويوتا ولا نيسان ولا لانسر ....
اما البيرليانس الاموره اللى انتو طالعين بيها السما حد فيكم يعرف موتورها اسمو ايه بلده ايه زى ما بيقولو فى مصر دى حلاوة روح موتورها المانى لا دى موتورها لانسر لا دا اتحاد اوروبى لا عفشتها رياضيه سعرها كام اللى هيا بريليانس اخر حاجه 100 الف 110/120/130 فيه كماليات بالمنظر دا والحلاوه دى ولسه ما لحقتش التويوتا يا جماعه اقسم بالله انا مقولتش كدا من الهوا والله دى تجربه للعربيتين اسبيرانزا وشيرى ايه رايكم فى سخونة الموتور اللى ممكن تولع فى الكابينه ايه رايكم فى الدريكسيون بعد سرعة 120ك ايه رايكم فى تقفيل العربيه ايه رايكم فى اسعار قطع الغيار والحمد لله بعد معاناه انا وابن عمى فى اسبيرانزا وبيرليانس ركبنا نيسان قطع غيار ارخص يابانى فعلا يعتمد عليها وانا عارف ان كل واحد منكم راكب صينى عارف وملاحظ عيوب مفيش حد غيره يقدر يلاحظها حتى مهندسين التوكيل ليه لانك انت اللى بتركب وانت اللى عارف بس ياريت محدش يخبى انا قولت كل دا مع انى مش مطالب انى اقول العيوب دى انا خلاص بقيت يابانى مش صينى بس والله تعبت من العربيات دى وخسرت كتير وشوف تمنها كام وتمن اليابانانى كام هتلاقى نفسك اعلى من اليابانى بس اعلى ليه لانك بتدفع تمن الكماليات مش الموتور والغفشه لو شوفت تويوتا ونيسان هتلاقى نص كماليات البريليانس بس موتور ايه وحش شوف الفرق موتور 1600 هواهوا تمام خش بقى على الكماليات هتلاقى الصينى معدى واكل اليابانى فى المظهر بس مش اهم حاجه المظهر انت بقى بتدفع تمن المظهر بس ياريت المظهر ينفعك وابقو طمنونى وقولولى سعر الكاتينه كام فى الصينى وسعرها كام فى اليابانى وشوف الفرق وشوف انت هتغير كاتينه على كام الف كيلو وشوف اليابانى هيغيرها على كام فى اليابانى ملها وقت محدد مفتوح عندك انت فى الصينى 30000ك وتتقطع الكاتينه وروخ بقى غيرها 2500ج يا جماعه انا تعبيت بجد كفايه كدا وانتو قررو براحتكم بس خليكم عارفين انكم بتدفعو تمن المظهر وبس مع ان فلوسك اللى هتدفعها فى الصينى تركبك يابانى تكسر بيه الاسفلت وارجو ان ردودكم تكون رحيمه عليا دى مجرد ارااء عشان محدش يدبس فى صينى شكرا

ربنا يباركلك فى كل ما اعطاك
انا مش عارف اشكرك ازاى
انت صادق جدا فى تحذيرك للناس
جزاك الله خيرا

يا جماعه شكرا لمشاركه جميع الاعضاء

الواقع بيفرض نفسه

الاسبرانزا 516 و113
والبريليانس frv
من


انجح السيارات الصيني في مصر

وقريبا التيجو 1600


يا جماعه انا مش مندوب مبيعات ولا حاجه

بس انتشار التلات عربيات اللي انا زكرتهم دول اكبر دليل ان ليهم سوق حلو

وعلى فكره انا متابع اسعار اعاده البيع في سوق الجمعه

واسعار بيع الاسبرانزا جيده



انا معاكم ان توكيلها سئ جدا

بس اتصرف بره التوكيل خصوصا ان قطع غيارها في جسر السويس وشارع دمشق وعين شمس مرطرطه ورخيصه


واختبار ات التصادم الاوروبي عارفين على سرعه كام

64كم بس

والصيني يا سمعه المتفبركه 000اهو يا عم من غير حضرتك00000

56كم الفرق مش كبير



وانا سيارتي بكرر عامله 42000 كم وبقالها سنتين وزي الفل


انا يا جماعه ركبت قبل السياره ده حاجات كتير من اصحابي
كرولالانسر صني اوكتافيا بي ام الفئه الخامسه لانوس فرنا

وبجد العربيه محترمه جدا وسعرها مغري

وعلى فكره الخليج بينزلو عربيات تتحمل الظروف القاسيه هناك

ال516 بتتباع في السعوديه بسعر 40000ريال سعودي تقريبا بنفس تمن الكرولا والانسر والناس هناك مش عبيطه ولا سهل يضحك عليهم

بس فعلا العربيات هنا في مصر بتتباع باعلى من سعرها الدولي


مثلا اللوجان الروماني ب72 الف والمغربي اللي من غير جمارك ب62 و68 الف حاجه جشع تجار




وزي ما حصل تجربه سيئه مع صاحب الموضوع في الاف ناجحه


وده بيحصل في ماركات كتير مثال الاوبترا


وانا والله العظيم

النهارده راكب مع لانسر تاعت صاحبي تكييفها سئ للغايه لدرجه ان انا معتيا اسبرانزا احسن منه وكان معانا واحد معاه لانوس برده تكييفها احسن منه لدرجه اننا قولناله يقفله والجو كان العصر يعني مش في عز الحر ولا حاجه والعربيه لسه جديده مكملتش 5000كم


وفي تجارب ناس كتيره اللي كان معاه ماتريكس ولانسر وباعو لظروف ماديه وجابو ال516 ومحسوش بفرق كبير



وده تجارب بعض الاعضاء في نادي الاسبرانزا www.speranzaclub.com

السلام عليكم

انا اشتريت الإسبيرانزا 1600 من شهر 2/2009 ورغم ان حصل معايا كذا مشكلة في العربية فانا مش قادر اتخيل نفسي راكب عربية تانية بنفس السعر او حتي اغلي منها ب30000 جنيه وبدون مبالغة ,انا قبل ما اشتريها انا وواحد صاحبي حاول يقنعني بالانسر 1600 بس زمايلي كانوا جايبين اسبيرانزا ومالقيتش اي حاجة تدفعني اني ادفع اكتر من 30000 جنيه زيادة في عربية انا حاسس ان رفاهيتها اقل من الإسبيرانزا ..
والله يا اخوانا كل ما افكر واقول يا تري لو مش هاجيب اسبيرانزا كنت اجيب ايه ؟؟؟الاقي نفسي عمال افكر في عربيات بضعف السعر ...هي بس اللي ممكن تعوضني عن عربية زي بتاعتنا
وربنا يبارك

احترامى لاراء الكثيرين وبدون الانحياز لمتلاكى السياره ولكن للاحساس بالفرق فعلا
انا كان معايا لانسر والحمد الله على كل شئ ربنا افتكرها فى احدى الحوادث دخلت فيها ترله بسرعه وهى وقفه فى الرست المهم اعت سنه راكم اوبترا بتاعت ولدتى وبجد الانسر 1600 احسن منها لاكن ربنى كرامنى وجزفت واشتريت ال516 بسبب الظروف المديه وبجد كانت افضل مجزفا فى حياتى
يعنى ثبات كانت اعلى من لانسر -فخامه انا حاسس انى ملك وانا قاعد جوها -تكيف بجد احسن من الانسر ومحدش يقولى لانسر فيها عيب بجد تكيف ال516 له قدره لوصولك لاعلى درجة سقوعيه وبدون رطوبه فى وقت قليل لاكن ما بيسقعش العربيه بالكامل يعنى مش زى الكورولا بعد 5 داقائق انت بقيت اعد فى الاسكيموا -الفرامل بقى بجد نضيفه جدا جدا انا وقفت بيها وقف مفاجئ وانقذتنى من حدثه ووقف من 140الى 30 فى وقت قليل جدا وبجد العجل مسرخش كتير فى الارض

نجى بقى للفرنا هى مع ابن عامى و 1600 بجد مطلعه عينه ومفهاش اتزان بعد 120 بتبقى ورقه مشيه على الارض ومتقولش متور قوى وفرامل ضعيفه اقول ان العفشه بتعاتها والشاسيه مش عامل اى اتزان وديه لوحدها مصيبا وبجد ببقى قلقان وانا راكبها وعمرك ما حتحش بالفرنا بالامان وبحد انا بعتبرها من وجهة نظرى انها 128 بس عاملوها هايونداى علشان تتباع

ويارب ما كون زعلت حد وكلماى غير مبالغ فيه واللى مش مصدق يشوف حد معاه العربيات التانيه ويركابها ويجرب
وبجد انا دلوقتى ادامى اشترى لانس وانا رفض لانى مش مستهلا ادفع فلوس كتير علشان اسم لاكن الامكنيات قليله
وبردوه نقطه للتوضيع متور اللانسر على عينى وعلى راسى بس الاسبرانزا قامت بنفس الاداء وبجد بدون اختلاف فى المتور اللى موجود والمتور فى التسابق مش بطئ ولا حاجه ده يمكن سحبه اشد من اى عربيه انا ركبتها لحد دلوقتى

بصراحه التكيف عندي تمام التمام وبيوصل لمعدل بروده معقول في اقل وقت وخصوصا انا عملت بنصيحه الاخوه وبعمل الحراره اوتو

وبنالسبه للفرامل هايله جدا معايا انا من 130 وقفت خالص في ثواني منغير متزحف مني ولا اي حاجه ما شاء الله

وصاج هاااااااايل جدا دخلت فيا واحده سايقه لانسر شارك 2008 البابين عندها ضااااااااااااااااااعو بمعني الكلمه وانا بس الدهان عندي في الرفرف الشمال ادام هو اللي باظ مش اكتر لدرجه ان صاحبي قاعد جمبي معاه لانسر بيقولوا مش معقول الاسبيرانزا كدا وتعمل كدا في اللانسر

انا مقتنع جداااااااااا بالاسبيرانزا كعربيه هايله ومناسبه بس اللي ندمان عليه ان جبت لونها اسود كنت عايز اجيب اي لون فاتح تاني مش اكتر

وشكرا ليك علي نقلك لتجربتك

انا كان معايا لانسر 1600 اتوماتيك ومش حاسس بأي فرق غير انها كانت اتوماتيك

فى واحد صاحبى كان معاه فيرنا زيرو شركته مسلماهالوا و قعدت معاه 6 شهور
و لما ساب الشركة سلم العربية فسألته انت هاتشترى فيرنا ليك انت على حسابك بعد ما سلمت الاولى
( قالى استحالة اركب هيونداى تانى خا لص و خصوصا الفيرنا عشان كان هايقلب بيها كذا مرة )

بسم الله مشا الله و الحمد لله احلى تجربة عملتها فى حياتى كانت اقتنائى اسبرانزا 516 و الحمد لله

ويا جماعه بره بيقارنو الاسبرانزا بالتيدا والاوبترا

بص اللينك ده
http://translate.google.com/translate?hl=en&sl=ru&u=http://ua.autoreview.ru/archive/2007/16/chery_chevrolet_nissan/&ei=vE5LSof-NNmNjAf397Vk&sa=X&oi=translate&resnum=1&ct=result& prev=/search%3Fq%3DChery%2BElara,%2BChevrolet%2BLacetti% 2B%25D0%25B8%2BNissan%2BTiida%26hl%3Den%26sa%3DG








وفي النهايه


ربنا يعوض على صاحب الموضوع ويباركلو في الجديده

ونحترم اراء بعض

لان ده تجارب ناس برده ولا رايكو بس هو اللي صح ولازم يتعمم ع الجميع كما اشعر




و3
1 ناس كتير مبيحبوش الصيني

2 ناس كتيير بيحبو الصيني<مش كله بعض الموديلات<

3ناس وسط بينقدو نقد بناء



وتحياتي للجميع


ربنا يبارك في حضراتكم




والسلام عليكم

بالمناسبه البريليلنس الجالينا سعرها مبالغ فيه طحن


وانا مجيبهاش ابدا