للحد من الحوادث، او لتخفيف اثارها برجاء استعمال فرامل اليد

**amrico** · 12-07-2009 09:03 AM

السلام عليكم ورحمة الله

في البداية مش عارف لو كان موضوعي ده مكرر في المنتدى ولا لأ وفي حالة اذا كان مكرر اتقدم بإعتذار ضمني لصاحب الموضوع الأصلي مع رجاء من المنتدى برفع الموضوع القديم لأهميته ولتذكير الأعضاء به للوقاية وتخفيف اثار الحوادث

السؤال يا جماعة !! حد بيفكر يستعمل فرامل اليد وهو موجود في الشارع ولا بنستعملها بس في وقت مابنركن العربية؟

انا متأكد ان محدش بيستعملها او قليلين جدا اللي بيستعملوها رغم انها بتكون مفيدة جدا في بعض مواقف هانتعرض ليها هنا

من مبادئ القيادة الوقائية اللي اتعرضنا ليها قبل كدا في مواضيع مختلفة في المنتدى يجب استعمال فرامل اليد في حالة الأنتظار لمدة تزيد مثلا عن 3 ثواني في الطريق لأي سبب من الأسباب، إشارة، طريق عطلان، لجنة ... الخ
ويا ترى عارفين ليه؟
الإجابة عشان لاقدر الله لو حد جاي من وراك ومكانش مسيطر على العربية عنده اكيد عارفين ايه اللي ممكن يحصل
هايروح خابط عربيتك من الخلف وهايدفعها للعربية اللي امامك يعني العربية هاتتعمل سندوتس وهاتكون الخسائر جسيمة، او لو كنت اول واحد واقف في الإشارة ممكن يدفعك لدخول نهر الطريق مع العربيات اللي ماشية عمودي ودي طبعا كارثة (وطبعا بتكلم عن خسائر عربيات بس يعني خسائر مادية مش حياة انسان لا تقدر بثمن)
بعض الناس هايقولك انا بكون دايس على دواسة الفرامل بس تفتكروا ده كفاية؟ اكيد لأ لأنك في حالة التصادم ممكن رجلك تفلت من على الدواسة ممكن رجلك تخف من عليها وبالتالي العربية هاتتحرك
لكن في حالة تفعيل فرامل اليد عربيتك مش هاتتحرك او هاتتحرك حركة بسيطة وهانقلل الخسائر الى اقصى حد

ارجوكم ماتستهروش بالموضوع ده ومحدش يقولي اللي ورايا هايضرب كلاكسات عشان هاتأخر في الحركة على مانزل الفرامل اليد وامشي
هاقولك تجاهله تماما سلامتك اولا وسلامة اولادك

حاجة تانية برضه للتذكير مش للتعريف لأني عارف ان معظم اعضاء المنتدى ماشاء الله سواقين محترفين بس للتذكير ولتعريف اللي ميعرفش محدش ينكر فايدة استعمال فرامل اليد في المطالع وخصوصا لو هاتوقف العربية في المطالع
انا عارف ان معظمنا بيعرف يوازن بين الفرامل والدبرياج والبنزين لأبقاء العربية واقفة في مكانها على المطلع بس ده غلط على اسطوانة الدبرياج فلو مستعمل فرامل اليد هاتخف كتير عن العربية، وليك انك تتخيل ايه اللي ممكن يحصل لو العربية رجعت منك على اللي وراك اكيد موقف مش لطيف ابدا

اتمنى لكم السلامة واسف للإطالة وياريت نطبق الكلام ده

**gade2** · 12-07-2009 01:05 PM

greay greAT

**Moh.Abdelbaset** · 12-07-2009 02:42 PM

حصلت مع والدتي ، كنا واقفين في إشارة ( كان عندنا أكسنت موديل 2000) وورانا فيات 124 و مش فاكر العربية اللي قدامنا كانت إيه
وجه الونش بتاع المرور اللي بيسحب العربيات وراح خابط ال 124 راحت خابطة فينا ( أمي كانت رافعة فرامل اليد و رابطة الحزام) تقريباً اتحركنا حركة بسيطة -بس كانت جامدة -لقدام والعربية محصلش فيها حاجة غير وش الفوانيس الأمامبة اتشرخ و وش الفانوس الخلفي شمال اتكسر وأضرار بسيطة كانت في الشنطة
فعلاً موضوع مهم استعمال فرامل اليد في حالات الانتظار

**jisso82** · 13-07-2009 08:23 AM

على الرغم من بساطة المعلومة زى ما قلت إلا إنها قيمة جدا و فى نفس الوقت طريقة عرضك تدل على إنك إنسان محترم و حابب إنك تنصح الناس و تفيدهم بجد.
ميرسى لحضرتك جدا

**أبو إياد** · 13-07-2009 08:44 AM

انا لما اكون واقف اخر واحد باكون متعمد انى مارفعش فرامل اليد خوفا من التصادم بحيس ان لو العربيه لقدر الله اتصدمت ماخدوش الخبطه كلها عموما باكون واقف امامى مسافه كافيه ومره حصلت معايا وبعد ماخبطنى العربيه مشيت معاه وقدرت اقف قبل ما اصدم الامامى
بعكس لو الفرامل مرفوعه هاخد رزعه تمام التمام
والفكره دى اخذتها من واحد صاحبى لما دخل فى عربيه راكنه وكانت مموره العربيه المركونه مشيت ولا جرالها الهوى وعربية صاحبى اتدمرت تماما

**kloda** · 13-07-2009 09:40 AM

معلومة قيمة جدا
شكرا بشمهندس امير

**ahmedhilmy** · 13-07-2009 09:46 AM

المشاركة الأصلية كتبت بواسطة mohamedezat

انا لما اكون واقف اخر واحد باكون متعمد انى مارفعش فرامل اليد خوفا من التصادم بحيس ان لو العربيه لقدر الله اتصدمت ماخدوش الخبطه كلها عموما باكون واقف امامى مسافه كافيه ومره حصلت معايا وبعد ماخبطنى العربيه مشيت معاه وقدرت اقف قبل ما اصدم الامامى
بعكس لو الفرامل مرفوعه هاخد رزعه تمام التمام
والفكره دى اخذتها من واحد صاحبى لما دخل فى عربيه راكنه وكانت مموره العربيه المركونه مشيت ولا جرالها الهوى وعربية صاحبى اتدمرت تماما

انا شايف ان وجهة نظر الاستاذ محمد هي الاصح في هذه النقطة

**YaSSerwIN** · 13-07-2009 10:50 AM

وانا أيضا ً بس تحتاج سرعة

-

-

الموضوع: للحد من الحوادث، او لتخفيف اثارها برجاء استعمال فرامل اليد

LinkBack

أدوات الموضوع

عرض

للحد من الحوادث، او لتخفيف اثارها برجاء استعمال فرامل اليد - انشر الموضوع فى :

-

-

-

-

-

-

المواضيع المتشابهه

عصا فرامل اليد

فرامل الرجل ( فرامل اليد ) ضعفت قوى ... اعمل ايه

فرامل اليد

نظام "فرامل" جديد للحد من الحوادث في 2010

أفكار ومقترحات وملاحظات للحد من الحوادث في مصر

الكلمات الدلالية لهذا الموضوع

المفضلات

المفضلات

ضوابط المشاركة