الوصايا العشر للحفاظ على أتوماتيك النوبيرا

نصيحه لكل اللى عنده نوبيرا أتوماتيك ، يا جماعه العربيه ديه جوهره وممتعه فى سواقتها جدا بشرط أنك تحافظ عليها وتعمل صيانتها ، بصراحه مشكلة النوبيرا أن اللى ركبها كلهم ناس زى حالتنا يعنى متوسطى الحال حابوا يطلعوا سنه أعلى من اللانوس والفيرنا فاجبوا النوبيرا يعنى هما مش من ملاك الأوكتافيا أو الكورولا أو اللانسر وبالتالى مفيش النزاهه على موضوع الصيانه وأهمال الصيانه هو اللى بيسبب المشاكل فى الفتيس .لوعندك أحد الأعراض التاليه فى الفتيس:-زغطه مع نطره فى نقل بين الغيارات-لخبطه فى النقلات خصوصا عند تخفيض السرعه بالضغط على الفرامل- rpm بيعدى 3.25 - أحساس بصوت النقلات ده بيكون نتيجة أن سيادتك بتمشى بالزيت مسافه كبيره بدون تغيره أو تغير الفلتر ممكن الموضوع ده يتحل بسهوله جداأعمل التالى ومتستهونش:3 كيلو زيت فتيس أتوماتيك موبيل ديكسرون 3 Dexron العلبه بـ 24 جنيهفلتر فتيس أتوماتيك نوبيرا ماركة GM بـ 65 جنيه ، جوان كارتيرة أتوماتيك(تفصيل) 15 جنيه ، أنبوبة سليكون حرارى صغيره لزوم ربط الكرتيره بعد الفك (تكفى لمرتين تغير) 15 جنيه ، 3 لتر بنزين 80 لتنظيف الكرتيره بعد الفك ، مصنعية ميكانيكى 30 جنيه يبقى المجموع الكلى يساوى حوالى 200 جنيه.الموضوع ده ممكن تعملوا عند أى ميكانيكى مش شرط ميكانيكى أتوماتيك بس ينضف الكرتيره كويس بعد الفك بالبنزين ويمسحها بأستبه نضيفه وينضف المغناطيس اللى بيلم الرايش والشوائب كويس ومتقلقش عمره الأتوماتيك مش مكلفه زى ما الناس متصوره وكل واحد مش فاهم حاجه يتكلم ويقعد يقولك ده الفتيس كله بيترمى ويجى واحد غيره بـ 2000 جنيه ، مع أحترامى كل ده هجس فى هجس الفتيس الأتوماتيك هو عباره عن جزء ميكانيكى ذيه ذى الموتور وأى جزء ميكانيكى بيحتاج صيانه وهمرته بتتكلف بين 700 و 1200 جنيه ولو حافظت على مواعيد تغير الزيت والفلتلر يعيش معاك بعد العمره 300 ألف كم من غير مشاكل.وبعدين ما اللى راكبين المنيوال برضه عنده دبرياج وديسك وأسطونه أنا أعرف واحد عنده لانوس 2007 وجابت ديسك وأسطوانه وبليه بعد 32 ألف كم وكلفته 850 جنيه ده غير بقى الفتيس نفسه وعلبته ويقعد يعض وهو بيجيب الغيارات بأختصار مانيوال ولا أتوماتيك كل لازم عنايه وصيانه.أنا عاوز أقولك كمان أنى لما كنت فى السعوديه كان 75% من العربيات أتوماتيك والجديد بالذات على الرغم أن شوارعهم فاضيه هو أظهر أن الأتوماتيك هنا فى مصر ما نتشرش الأنشار الكافى مش عارف ليه على الرغم من ظروف المرور الصعبه عندنا صعبه وتحتم أستخدام الأتوماتيك.بس للأمانه العربيه ممتازه وأتزنها ممتاز ممتاز وبصراحه تكسب اللانسر والكورولا فى الوسع والثبات وهى من نوع السيارات التقيله على الأرض حتى شوف فى سيارات الحوادث اللى بيعلنوا عنها تلقي كتير منها هيونداى بأنوعها (وأكثرها الأكسيل والفيرنا والنيو ألنترا) أو لانسر أو حتى الكورولا لأنها عربيات خفيفه وكمان الأبعاد ممتازه فى النوبيرا وأنت قاعد فيها شايف أخر الكبوت وأبعادها واضحه جدا بعكس اللانسر والكورولا والهيونداى (ماعدا الفيرنا) والكلام ده عن تجربه شخصيه.وعموما أى جزء ميكانيكى فى السياره لو أهملت صيانته يتلف سواء كان جزء فى الموتور فتيس أتوماتيك أو حتى فتيس عادى بالعكس أنا شايف أن الأتوماتيك بيريح وبيحافظ على الموتور أكتر من الفتيس العادى.أعمل موضوع الصيانه الدوريه ده كل 10 أللاف كيلو متر وغير الفلتر كل مره وخليك نزيه وريح دماغك والفتيس بإذن الله هيعيش معاك نص مليون. م/ سمير رياض