للي عاوز يتفسح في وسط البلد بالعربية ...
قررت امبارح اني افسح المدام ونستعيد ايام الخطوبة الجميلة روحت واخد العربية ونازلين على وسط البلد قلت اقف وية على الكورنيش قدام النيل هيلتون لاقيت صف عربيات واقفين وميكروباص بتاع الشرطة الازرق ده روحت راكن وراه جالي العسكري وبيقول لي يابيه هنا الركن ممنوع قلتله طب ما الناس راكنة اشمعنا يعني قال لي الظابط سايبهم وعارفهم قولتله طيب والميكروباص ده – راح باصصلي حتة بصة كأنه بيقول لي انت مجنون ولا ايه – وقال لي ده شرطة يابيه قولتله طيب ماهي الشرطة اول ناس المفروض يطبقوا القانون المهم عشان ده عسكري ومخه على قده قولت اسيب المكان ده روحت راكن على مطلع الكوبري تخيلوا على مطلع كوبري قصر النيل مش ممنوع وجنب الرصيف ممنوع المهم وقفنا شويه
وبعدين قولت اعدي الناحية التانية عند حديقة الاندلس بالعربية ونقعد في الجنينة شوية جيت اركن لاقيت 3 لابسين اصفر حاوطوا العربية وبيقولوا لي ده باركن ( = باركنج) خاص بالبلو نايل ولاقيت واحد بيتخانق معاهم عشان يركن قولت اخدها من قصيره واشوف لي حتة تانية انا عاوز اخرج الست وافسحها مش عاوزين نكد المهم بعد كام متر لقيت مكان ركنت فيه وجالي واحد قولتله هنا عادي قال لي اتفضل يابيه سيبها هنا ومتقلقش ودخلنا اتفسحنا في الجونينة ييجي ساعة كده وبعدين روحت عند العربية لقيت الراجل واقف وبيفتح لي الباب كمان روحت مطلعله 2 جنيه قال لي انا عاوز 5 جنيه كمان يابيه قولتله ليه ده انا راكن في الشارع قال لي لا ده مش شارع ده باركن(= باركنج برضه) وفي تذاكر قولتله ده شارع ولا انا راكن في السما يعني قال لي انا هندهلك جنزوري يجيبلك الورق مارضيتش امشي ليفتكر اني خفت من جنوزوره قصدي جنزوري المهم جه ولا قال اي كلمة راح قايل لي خلاص يابيه خد ال2 جنيه وانا مش محتاجهم روحت واخدهم منه وقلتله انا بئا محتاجهم وفركت امريكاني ( ماعرفش جت ازاي مع اني مابعرفش اعملها ) ورحت ماشي
قولنا ناكل ايس كريم من عند العبد اللي في طلعت حرب وانا قبل المول بتاع طلعت حرب الاشارة وقفت وجه ورايا واحد شايب سايق نوبيرا وجنبه شاب وحاطط ايده على الكلاكس كأنه عيل صغير فرحان بزمارة العيد والاشارة مقفولة بعدين فتحت بس جت ست شايله عيل صغير بتعدي فأستنيتها لما عدت وبعدين مشيت لاقيت جدو اللي سايق العربية عدى من يميني وعرض العربية في وسط الشارع ووقف شويه بعدين مشي انا بئا راعيت اني معايا مراتي بس شتمته جميع انواع الشتايم الممكنة بالكلاكس والاشارات لدرجة ان الواد اللي قاعد جنبه طلع راسه من الشباك وتقريباً كان بيشتممني بس انا كنت قافل الازاز وعمال اقلب له نور ساعتها لو كان طول كنت هضطر انسى ان المدام معايا واسحب له ال electric shok بس كانت ممكن تقضي عليه وهو في سنه ده
عشان كده اللي عاوز يفسح اهله مايرحش وسط البلد ولو اضطر يروح يبقى من غير العربية ويستحمل رزالة سواقين الميكروباص او زحمة المترو او لو خد العربية مايركنش عند البلو نايل ويشيل معاه ال electric shok
ودمتم