الموضوع: رشحولى غسالة اوتوماتيكية غير الايديال زانوسى

المشاركة الأصلية كتبت بواسطة نور القمر

كل ميسر لما خلق له
انتم تكتبوا عن التست درايف للعربيات واحنا نكتب عن الغسالات والثلاجات والبتوجازات

طب بجد...
إعملي موضوع في الإجتماعي..

و سميه : الأجهزة الكهربائية المنزلية... تست درايف..

لأن انا و غيري كتير محتاجين خبرات حقيقية من الناس في الحاجات دي...

المشاركة الأصلية كتبت بواسطة نور القمر

انا جربت كذا نوع من الاتوماتيك المعتادة زي كريازي وايديال زانوسي في بيت والدتي وحماتي ونوع تاني الماني كان عندي في ابوظبي مش فاكرة اسمه وفي الاخر استقريت على ان الفوق اتوماتيك هي الافضل

انا عندي توشيبا لكن كانت من برة ماشاء الله بجد ممتازة بقالها اكتر من 6 سنين واختي جابت زيها توشيبا العربي من مصر

مميزاتها
ممتازة من ناحية النضافة لان تكوين حلتها اشبه بالغساله العادية فيها مروحة من تحت وبتلف دورة شمال ودورة يمين
وبستخدم مسحوق عادي وطبعا تكلفته المادية اقل
الصيانه يكفي انها من العربي من ناحية الصوت والرجة مقبولين
اما بالنسبة لطلمبة الطرد فدي حلها سهل عملنا ماسورة الصرف منخفضة وبالنسبة للتسخين عملنا لها خلاط مية
وبالنسبة للازرار كلها لوحة الكترونية مساحتها حوالي 10 سم *25سم لو لقدر الله باظت بتتغير اللوحة كلها
بتظبط نفسها على حسب كمية الغسيل وتملى الميه على اساسه يعني ممكن تستخدم كغسالة اطفال
وتوشيبا المصرية ال 5 كيلو فيها 3 مستويات يعني في الحالة دي ممكن تستخدم كغساله اطفال
عندي انا الاكبر ال 7 كيلو فيها 5 مستويات للمية مش عارفه الاكبر في مصر نفس الوضع ولا ايه
هي بالمناسبة في منها 5 و7 و10
انا شايفه ان ال 7 الانسب كحجم
ميزة كمان ان الوقت المستخدم كله في الغسيل لا يتعدى الساعة والنصف
مفيش مشكلة لو المية قطعت او كانت ضعيفة لانها في لوحة ديجيتال بطلع ايرور بكل مشكلة سواء ضعف المية او غيره
اهم ميزة انها ارخص كتير من الغسالات الاتوماتيك المعتادة الاخرى
على فكرة قريبتي اشترت زيها يونيفرسال بتشكر فيها برضو لكن فريش شوفتها عند قرايبي وحشة جدا

البرامج
بتتحكم في عدد دقائق الغسيل في 3 اختيارات
بتتحكم في عدد مرات الشطف في مرة او مرتين او شطف مستمر يعني بتملى ميه وتصرف في نفس الوقت لمدة معينة طبعا وهي بتلف بالغسيل
فيها نقع للغسيل
فيها امكانية غسيل بطانية انا بغسل فيها البطاطين الصغيرة ولو عندك ال 10 كيلو ممكن تغسل بطانية كبيرة
فيها غسيل ثقيل للملابس شديدة الاتساخ
فيها عامل امان للاطفال بمعنى انها لو بابها اتفتح اثناء الدوران السريع وبتقف وتدي صفاارة انذار عاليه
صفارة عند الانتهاء من الغسيل
صفارة لو حصل اي ايرور زي ضعف المية او غيرة
في امكانية انك تلغي الصفارة نهائي ولو ان وجودها افضل
هي في مجملها بسيطة الاستخدام وعملية

هيا بتنشف ولا بتطلع الغسيل مبلول ؟؟

المشاركة الأصلية كتبت بواسطة sab3aawy

هو واضح ان الغسالة التوشيبا فوق اوتوماتيك دى اختراع، وموفرة فى كل حاجة، بس انا عندى مشكلة بسيطة ، انى بنيت تصميم مطبخى على ان سطح الغسالة هو جزء من المساحة المتاحة لربة البيت للاستخادم المطبخى وبالتالى مقدرش اتنازل عنه حاليا، اكما ان انا دايما عندى اعتقاد ان استعمال الغسالة الرأسية لازم هسيبب طرطشة مياه وتبليل الأرض، وده مش مسموح بيه فى المطبخ لأن معنديش صرف ارضى فى المطبخ، لذلك انا بفضل الغسالة االأفقية

انا شايف حاليا ان فيه آراء كتير رايحة ناحية ماركات lg و دايوو و اريستون

انا اول مره اعرف ان دايوو تجميع بهجت ولذلك هلاقى نفسى ميال شوية ليها لأنى بحب قدر الامكان لما اصرف قرش احب انفع بيه ابن بلدى ، لذلك لو حد يعرف عنها معلومات اكتر فيما يتعلق بالأداء وقطع الغيار والصيانة يدينى فكرة عنها،

بلاش الدايو يا خالد باشا عند قرايبى و مشاكلها كتير

شوف عن تجربه بالترتيب :

Lg
زانوسى العبد (تحميع اوروبى)
اريستون الأيطاليه

و زى مقلتلك ممكن تزود شويه و تبقى علقه واحده و تجيبها بمجفف و هتحس بفرق رهيييب جدا من الراحه و الرفاهيه

و هيا انك تجيب من الغساله على الدولاب

و بينى و بينك انظف من النشر فى جو التلوث اللى احنا فيه لآن المجفف فيه تعقيم كمان للملابس

معلش هزود شوية فى الأسئلة

1-هل المجفف ده اختراع عملى وللا مالوش فايده

2-وبيشتغل بالهواء وللا التسخين وللا كلاهما

3-وظروفه ايه مع استهلاك الكهرباء؟

4- اخبار ال جى ايه مع قطع الغيار والصيانة؟

1-هل المجفف ده اختراع عملى وللا مالوش فايده

والله المجفف دة على حسب احتياجاتك يعني بينفع لو انت مثلا ساكن في دور أرضي ومعندكش منشر أو مستعجل على الغسيل أو الجو تراب أو مطر ومش هينفع نشر الغسيل

2-وبيشتغل بالهواء وللا التسخين وللا كلاهما

بيشتغل بالهواء الساخن زي السيشوار كدة

3-وظروفه ايه مع استهلاك الكهرباء؟

طبعا بيستهلك كهربا زيادة .... بس عيبه الوحيد واللي مخلي ناس كتير عندها المجفف ومبتستعملوش هو انه بيكرمش الهدوم جامد ودة لأنه بينشفها وهي ملفوفله جوه الغساله ، فبتطلع الملابس ناشفه بس زي ما بيقولوا في المثل طالعه من بق كلب

4- اخبار ال جى ايه مع قطع الغيار والصيانة؟

دي معنديش فكره الصراحه

أنا عندي دايو ....... تجميع مصانع بهجت ...........
عمرها حتى الآن 4 سنوات ........... و الحمد لله و بفضله لم نحتاج إلى صيانتها اطلاقا .
الغسالة ما شاء الله ...... بتشتغل تقريبا يوميا ......... ( مراتي عندها فوبيا نظافة لما الهدوم بتدوب من كتر الغسيل )

مميزات الغسالة :
أولا صناعة مصرية ..... يعني تشجيع لموظف مصري و مستثمر مصري محتاجين فلوسنا أحسن ما تخرج برة مصر لأعدائنا .
ثانيا صيانتها ........ تكاد تكون معدومة .......... صيانة بهجت عموما جيدة . ( ﻷن عندي تليفزيون جولدي و تلاجة جولدي ) و كويسين و بيلتزموا بمواعيدهم .
ثالثا ثمن الغسالة معقول جدا و أحيانا بيكون معاها هديا ..... بنت خلتي أشتريتها بنائا على نصيحتي و أخدت معاها مكنسة دايو هدية ...... و كنت شوفت من أسبوعين تقريبا في كارفور عليها تليفزيون جولدي 14 بوصة هدية .

إن شاء الله تشتري حاجة كويسة يا باشمهندس و تكون مصري إن شاء الله .....


يا جماعة بلاش موضوع تشجيع المستورد ده خصوصا الأمريكي .......
تخيل نفسك انت العامل في المصنع ....... و لما تلاقي الناس كلها بتسيب المنتج الكويس بتاعك و تروح تشتري المستورد بتاع أعدائنا ..... مين أولى بالفلوس ...... المستثمر الأمريكي اللي بيدعم الصهاينة عيني عينك ......... و لا المستثمر والعامل المصري ؟؟؟؟

شجع صناعة بلدك الحلوة ..... و الوحشة متعبرهاش ....... بس دايما أفتكر ان فيه صناعات حلوة ترفع الرأس في مصر .

تحياتي للجميع .