الموضوع: افيدوني في الاسكورت يا جدعاااان ضرووووري

اشكركم اخواني علي التوضيح وسرعة الرد ودي يشجعني اكتر اني انضم ليكم في قسم الفورد ان شاء الله
المشكلة ان الفلوس الي معايا بسيطة وتتعداش 30الف ودي اقصي ماعندي حاليا.
فبضور بالفلوس دي لقيت الاكسل والسويفت ودول ورق انا مبحبهمش انا بطبعي بحب العربيات الاوربي لقيت الاسكودا والكورسا .
الكورسا غالية كاسعار قطع غيار انما الاسكودا معقولة جدا وتشيكي الماني يعني معمرة جدا
الفورد عرفتها بالصدفة وشفتها لئيت تئفيلها وصالومها ممتاز جدا تحس انها من خامات نضيفة بجد مش زي الباقي الي في نفس السعر تحس انهم متئفلين في العتبة لذلك انا حابب الاسكورت بس خايف اجيب العربية رخيصة واتصدم في قطع الغيار الاقيها نار فاندم.
بالنسبة اني اكمل واجيب مونديو فهيا ممتازة بس بعيدة عني كفلوس ربنا يكرم بس حاليا صعب جدااا
كمان سعتها هحتار بينها وبين الاوبل فكترا الي كماليتها مش ممكن واحد بس يكون فاكرها من كتر مكانت سابقة عصرها تحس انك بتجيب شوال اوبشن بسعر رخيص

ياباشا والله اناعاجز عن الشكر ومتئكد ان انتو بتقدمو النصيحة الصح لوجة الله تعالي.
بس المشكلة انتا عارف ان الواحد لما بتكون دي اول عربية لية بيكون مش فاهم اي حاجة في الميكانيكا وخلافة بيكون حاسس ان العربيات الي مش معروفة اوي زي الفرد هيكون سعر قطع غيارها نار ومش اي حد بيشتغل فيها لازم التوكيل علشان كدة بحاول افهم كويس علشان مكرهشي العربية من كتر التصليح .
فعايز اجيب عربية بنت اصول تستحمل مشاويري البسيطة جدا انا مبخرجشي كتر ومش بتاع فحت وردم في العربية انا بعاملها باحترام علشان متئلش باصلها معايا وبتعامل معايا بحنية علشان مجرحهاش وئذي شعورها فتجرحني بقطع غيرها

معلش انا عارف اني زهئتكو اليومين دول انا ادامي عربية فرد اسكورت كويسة هروح اشوفها بكرة ان شاء الله عايز اعرف ابص علي اية فيها علشان اعرف حالتها اية الدواخل والمتور اعرفهم ازاي؟
مكان العربية في فيصل لو حد يعرف ميكانيكي او حد كويس يكشفلي عليها اكون متشكر ليكم جدا

aYaBooY باشا والله انا مش عارف اشكرك ازاي علي تفاعلك معايا وسرعة ردك واتمني نكون اصدقاء سواء اني جبت فورد او لا لانك انسان خدوم ومحترم.
كلامك صح وانا مقتنع بية بس المشكلة ان العربيات الكوري بحس وانا بسوئها انها كنبة ومتئفلة بلذات الاكسل وزيها السويفت تحس انهم وزنهم نص كيلو عكس الاوربي تحس بتقل العربية وانك راسي مش عايم لذلك انا بفكر في الاوربي بس
موضوع الميكانيكية عندك حق ممكن زي الاعلان يئولي الكربراتير بينقط كهرباء هئولو الله ينور
بس انا عندي اخويا جن في موضوع الميكانيكية دة وكمان المنتدي هنا ان شاء الله اعرف منة الناس الكويسة الي اتعامل معاها لحد مفهم اهم حاجة ربنا يكرم في مشوار العربية وتكون حالتها كويسة وتخلص علي خير
كنت عايز اعرف اسم وعنوان مركز الكشف الي حضرتك التلي علية علشان اشوفة لو العربية كانت كويسة
وشكرا ليك مقدما

المشاركة الأصلية كتبت بواسطة ayabooy

بص انا لسة اخد بالي من موضوع اول عربية ديه بص انا لما ركبت فورد كنت نازل من عربية زلت انفاسي و عرفتني حتت عمرى ما كنت اتخيل اني اروحها
و اتعلمت فيها امتي اسمع كلام الميكانيكي و امتي اجيب كرشة لما يشتغلني و في جميع الاحوال الي بيسوق جديد عادتا بيتعرض لمواقف و حاجات بيتعلم فيها موضوع انك تتعلم في فورد لا و لا و الف لا
و لا اي عربية قليلة او حاجتها غالية انت لو واحد صنايعي اشتغلك في حتة في فورد ممكن تلاقي نفسك دافع 4 او 5 تلاف جندي و ده طبعا علشان انعدام الخبرة
لا هنا اقول لحضرتك هات اكسل نظيفة و اتعلم عليها و لما تتودك في السواقة و معاملة الصنايعية و طرق شراء قطع الغيار اه ساعتها اقولك هات فورد بقلب جامد بس علشان تكون اول بختك عربية لو لقدر الله اتكسرلك منها فنوس و شبكة يكلفك تصليحها 500 او 800 جنيه لا طبعا كتير
ابعد في حالتك عن فورد بكل انوعها
و على فكرة متقولش انا استاذ سواقة و مش هايحصل حاجة علشان فيه جزء في سواقتنا في مصر بتتعلمة بالممارسة اسمة تفادي اخطاء الغير و ده مش موجود غير في المحروسة
و عموما لو العربية الي انت رايح تشوفها اسكورت بموتور زيتيك يبقي لو عجبتك تضحي ب 250 جنيه و تطلع تكشف عليها في التوكيل علشان اي حد او اي بنزينة بترفع العربية مش هايكون عندهم اي جهاز يعرفوا بيه حالة الحساسات بتاعت الموتور علشان لو حساس محتاج تغير ده بيكون مكلف شويتين

كلام زى الفل بس انا متهيألى ان الواحد لما بيجى يشترى عربية بيبقى فى مخيلته انها عربية العمر (وليه لأ) وانه صعب انه يشترى تانى بعد كده او يغير ولذلك انا من وجهة نظرى دايماً طالما هشترى ....يبقى اشترى حاجة صح علشان اريح دماغى لأنى انا شايف معظم السيارات الاكسيل حالتها تعبانة لأن التكييف اكل الموتور وكانت مع واحد اعرفه وكانت 1500 سي سي بهدلته وماكملتش سنة وباعها وجاب لادا زيرو شوف فرق الكماليات وكل ده علشان يريح دماغه ومصاريفه برده...فلذلك انصح الاخ العزيز تامر انه مايتسرعش فى قرار الشراء ويتمهل ويدرس السوق وكل الاحتمالات فى حدود امكانياته ..انا مثلاً قعدت 7 شهور ادرس قرار شراء مابين زيرو تقسيط أو مستعمل ... لحد ماربنا وفقنى فى اسكورت حالتها حلوة...
وبعدين كلها 6 اشهر والاسعار هتتغير تماما مع بداية 2010 علشات تخفيض الجمارك وده طبعا هيأثر على المنظومة كلها ....ا