انا عايزة اعرف ايه العربيات اللى تتجاب فى حدود 25 الف ، و مطلوب فى العربية باور و تكييف بس ، و تكون موديل حديث ( تسعينات فما فوق) و كل ما كان احدث كل ما كان افضل عشان تكون مشاكلها اقل .
و شكراااااا :36_1_1[1]:
عرض للطباعة
انا عايزة اعرف ايه العربيات اللى تتجاب فى حدود 25 الف ، و مطلوب فى العربية باور و تكييف بس ، و تكون موديل حديث ( تسعينات فما فوق) و كل ما كان احدث كل ما كان افضل عشان تكون مشاكلها اقل .
و شكراااااا :36_1_1[1]:
لو يزيدوا شويه ممكن اسكودا فليشيا او سوفيت
فيات اونو طبعا ..
الونو او برايد عصفوره
بيرودوا كانشل ممكن من سنه 2002 الى 2005
ماتور دايهاتسو يابانى
مكيفه
موفره جداااا فى البنزين
من احلى العربيات اللى ركبتها و ليا معاها زكريات جميله جدا و عمرها ما خذلتنى فى حاجه
كنت جايبها ب 24500 عامله 18000 كيلو متر وبعتها ب 25000 عامله 36000 كيلومتر و قعدت معايا سنتين و الحمد لله كل اللى صرفته عليها كان بنزين و زيت فقط
و اخدها منى واحد صاحبه لمراته و ماشاء الله فرحانه بيها جدا
النضيف منها دلوقتى هيعمل من 23000 الى 25000
و لو زودتلك الف ولا الفين ممكن تجيبها اوتوماتيك
ممكن لو سمحت تعرفنا بالعرربية دي اكتر انا اول مرة اسمع عنها ومش عارفه شكلها ياريت صورة
وياترى اسعار قطع الغيار غالية ولا عادية وصيانتها سهله ولا محتاج صنايعيه معينين
وايه الكماليات اللي فيها وياترى تكييفها كويس؟؟
سويفت احسن واحدة
اكسيل 1300 هاتشباك
سكودا فيلشيا
برايد العصفورة
ماروتي
لادا 2105 95-96
شاهين او دوجان 93-94 يعملوا في حدود 26-27
ممكن برده دايو ماتييز
طيب هى الكانشيل كام سى سى ، و كمان السويفت و الاكسيل ، هل تبقى حالتهم كويسة ؟ انا بدور على افضل حاجة و اقل مصاريف
الكانشيل 850 سى سى
و بالنسبه للسويفت و الأكسل فمش هتلاقى حاجه كويسه و جديده بالسعر ده
دا غير ان العربيه دى موفره جدا فى البنزين و الميزه دى مش موجوده فى الأنواع الأخرى
تصورى ان تنكها كله 28 لتر !!!
انا سافرت بيها كتير
مثلا مره فولتها من الهرم و طلعت بيها العين السخنه كنت رايح ( ستيلا دى مارى) و قعدت هناك يومين منهم يوم لفينا بيها شويه باليل و رجعت القاهره و العربيه كان فيها لسه حوالى 8 لتر
يعنى المشوار كله رايح جاى لغايه باب البيت اخد حوالى 20 لتر بنزين
انهى عربيه هتعمل معاكى كده !!!
ده غير انها مكونات يابانى تجميع ماليزى
بالنسبه للكماليات :
- تكيفها تلاجه
- 2 زجاج كهرباء امامى
- مفيهاش باور بس مش هتحتاجيه لآن دركسونها خفيف لآن قطر الجنط صغير جنط 12 و مقاس الكاوتش بتاعها 12/60/165
- قطع غيارها كويسه سواء فى التوكيل او بره التوكيل ... فى واحد فى الحرفيين عنده كل حاجتها اسمه ( اوشين) و توكيلها هاشم باص
- هيا نسخه من الدايهاتسو ميرا بس متصنعه فى ماليزيا تحت اشراف دايهاتسو اليابانيه ( الماتور محفور عليه دايهاتسو)
- ماتورها 3 سلندر
- معظم اللى بيشتغلوا فى اليابانى بيفهموا فيها
- التوكيل اسعاره كويسه مثلا رحت مره غيرت ز يت موبيل xhp و عملت تربيط للعفشه و اشترين 2 فلتر زيت زياده و غيرت درج التابلوه عندى علشان كان مسكور و غيرت حاجه تانيه مش فاكرها كل ده و دفعت 180 جنيه !!!!
- العربيه دى ممتازه و مظلومه فى مصر
- السويفت و الأكسل و السكودا و البرايد مش هتلاقى حاجه كويسه بالسعر ده ... هتون عرييه مهلوكه و عامله كيلومتر كتير و بتجيب اخرها عكس البرودوا اللى ممكن تجيبها كسر زيرو بالسعر ده يعنى ماشيه كيلو متر قليل و لسه جديده
- الماروتى لا تقارن بالبرودوا فى التكنولوجى خالص البرودوا تتفوق عليها بمراحل الماروتى كابربيراتور و البيرودوا انجكشن ... بص على ماتور الماروتى و البيرودوا و انتا هتعرف الفرق متنساش ان البرودوا هيا هيا الدايهاتسو ميرا
- اللادا مبحبهاش بكل انواعها و مبفضل اركبها خالص (رأى شخصى) دا غير انها بردوا هتكون مهلوكه
- نفس موضوع الادا ينطبق على الشاهين و الدوجان هتخدى عرييه تدوخى بيها عند الميكانيكيه و الكهربائيه
طيب والله مواصفات كويسه اوي تخلي الواحد يفكر فيها بجدية كحاجة مؤقتة لحد ما تُفرج
الف شكر
السويفت تعمل 25 الف فعلا لو حالتها سليمة لسة اول امبارح كان فية عربية في السوق خلصت على 24 الف و مفيش فيها اي رش غير بارومة عند الشنب و التكييف شغال و العداد 122 الف
الناس بتطلب في العربية دية دلوقتي 27-28
ابعد عن اسعار النت كلها مبالغ فيها جدا مفيش حد بينزل و يشوف السوق عامل ازاي
الكلام دة نفسة في البرايد و الفليشيا جايز صعب تلاقي اكسيل هاتشباك لان الموديل دة نادر شوية
العداد عمرة ما كان يعيب عربية هو طبعا دليل على الاستهلاك لكن مبيفرقش اوي
بالنسبة للكانشيل انت تكلمت على المميزات لكن فية بعض العيوب العربية نادرة نسبيا
الموتور ضعيف 850 3سلندر معتقدش انة هيعمل 150 الف كيلو و بعد كدة اكيد هيفوت
العربية ليها شريحة معينة من الركاب اعتقد للشباب اكثر
فيها ميزة طبعا توفير البنزين و الضريبة السنوية لكن اعادة البيع ضعيفة
بالنسبة للسويفت مميزاتها عربية شغل شغالة تاكسي و قطع غيارها في كل حتة
موفرة في البنزين 260 في الصفيحة
تكييف قوي جدا
المساحة معقولة
عيوبها :العربية واطية على الارض
محتاجة اعتناء شوية من ناحية الصاج لان البارومة بتاكل فيها في اكثرمن منطقة خاصة في التقفيل المصري
الراي في الاخر لصاحب الموضوع على حسب احتياجاتة
كلام سليم
البرودوا الكانشل مناسبه جدا لبنت او لعائله فى مقتبل الحياه الزوجيه
انا جبتها بعد ما اتجوزت و قعدت معايا سنتين و شويه و كان ربنا رزقنى ببنتى و الحمد لله و مكنتش متضايق منها لكن مكدبش عليك سبب البيع هوا الحاجه لعربيه اكبر و يوم ما قلت يا بيع لقيت ناس كتير بتدور عليها و بعتها لواحد صاحبى
منتساش حضرتك ان سعرها منافس جدا لآنها بتبدا من 23.000 يعنى تقريبا ملهاش منافس فى السعر ده و بالأمكانيات دى وصدقنى انا مش متحيز ليها لكن هيا من اجمل العربيات اللى ركبتها و لو كان معايا فلوس زياده مكنتش بعتها بس للأسف انا بعتها علشان اكمل عليها
الكاتشيل حلوة فعلا ... وحديثة في موديلاتها
2000 و2002
طيب هى الكانشيل باين عليها حلوة فعلا ، بس مش 850 سى سى قليل اوى ، يعنى دى سحبها عامل ازاى ؟؟ و تستحمل تكييف و لا بتموت لما يشتغل ؟ و هل تنصحونى لما اعوز اشترى اشوف اعلانات فى الجرايد و لا انزل سوق الجمعة و لا ايه بالظبط ، لانى معنديش خبرة اوى فى المستعمل بس ممكن اخد معايا ميكانيكى مثلا اكون واثقة فيه عشان ميتضحكش عليا ؟؟
الافضل طبعا اعلانات الجرائد و النت لكن الاسعار مبالغ فيها شوية عن اسعار السوق
لو نزلت السوق حاول تشتري من مالك العربية نفسة و ابعد عن التوكيلات
مش قليل علشان هيا متصممه على كده انا كنت بجيب بيها 140 كيلومتر
سحبها ممتاز و التكييف مش بيحمل على العربيه خالص
ممكن عن طريق الأعلانات او من النت من على موقع كونتاكت كارز او الوسيط و لما تروحى تتفرجى يكون معاكى حد بيفهم فى العربيات طبعا و بلاش تشترى عن طريق سوق الجمعه علشان كلهم تجار و انا لا اثق فيهم و مبحبش اتعامل معاهم لآن للأسف كلهم معندهمش ضمير
واخيرا انا بفهم فى العربيات دى كويس و الحمد لله يعنى لو احتجتى اى استشاره فى اى وقت انا تحت امرك
عندى سكودا فورمان 1300 مو 94 موتور استيراد جديد ورشه حزام بس للنضافه وعربيه فابريكه جدا جدا
بتاعه صاحبى وجارى وطالب 25 وفيها كلام كمان
عن تجربة الحمد لله
دايهاتسوا ميرا من اول موديل 92 وانت طالع لغاية موديل 2000 السعر بيتحرك من 20 الي 30 يعني لو جبت موديل 94 تعملها 2000 مثلآ عربية رائعة هيا طبعآ صغيرة في الشكل قوي من برة بس مريحة جدآ في قعدتها من جوه بس الكنبة اللي ورا تاخد اتنين مستريح قوي وتلاته مزنوقين شوية ماشاء الله متتعيبش والله وسريعة جدآ طلقة في السفر سحب عالي ومناورة عالية لأن جسمها صغير
علي فكرة الميرا والبرودوا كانشيل وجهين لعملة واحدة في كل شيء اللهم الا الميرا تصنيع ياباني والكانشيل كوري او ماليزي باين والله اعلم
وشكرآ
بص يامعلم معادلة السي سي مع الياباني الله اكبر يعني تنساها خالص العربية 850 سي سي بس في السحب والجري شيء انت مش هتصدقه هتجربه بنفسك افضل او تاخد معاك صديق يكون بيسوق جامد وبحرفيه مش هيحس ابدآ بحكاية السي سي دي
انا معرفش ايه السر ان الكانشيل والميرا السي سي بتاعهم حتة لو قليل قوي العربية بتدي اداء رهيب !! يمكن ده راجع للباور هورس الله اعلم
وطبعآ خد معاك ميكانيكي اكيد ويفضل لو معاك صديق زي ماقولتلك بيسوق حلو وبيفهم عشان يبقي معادل مابين الميكانيكي وصاحب السيارة
اذا تحب تشتري عربيتي معنديش مانع لأني احتمال كبير اسافر هقولك علي كل عيوبها ومميزاتها هيا دايهاتسو ميرا موديل 94 850 سي سي بدون تكييف كاوتشات تيوبلس وموتورها ماشاء الله سحبها رائع وسريعة جدآ محتاجة رشة تنظيف وسمكرة - الباب اليمين بالذات معضعض شوية من خبطة قديمة - عشان تحس بشكلها جديد انا سألت علي تكاليف سمكرتها كانت ب 400 جنيه ورشها رشة ميتاليك انظف حاجة كان بحاولي 1200 جنيه يعني تقدر تقول 1600 تكاليف تظبيط شكلها الخارجي وشوفت واحدة معمولة ماشاء الله شكلها اكتر من رائع بعد التظبيط خصوصآ لما تركب للكاوتشات طاسات زينة شكلها هيبقي تحفه بأذن الله
محتاجة تغيير مساعد يمين هيكلفك حوالي 120 جنيه عشان تحس انها ناعمة مع المطبات انا صراحة مطنش تغييره حاليآ خالص
انا غيرت فيها بعض الحاجت التقليدية اول ما اشتريتها زي البوجيهات ومساعد من المساعدين وكمان الزجاج اليمين بتاع الباب من الخبطة اللي قولتلك عليها كان مكسور غيرته وفلتر الهواء وفلتر البنزين غيرتهم وكمان الدينامو كان مستهلك وبليته محجرة وسببلي مشكلة كبيرة قوي صراحة استهلكت مني شوية حاجت غيرتها زي البوجيهات تاني ووش السلندر بسبب السخونة الي نتجت عن الدينامو ده وغيرت الدينامو كمان افضل لسه مبقلوش كام يوم بالسير بتاعه يعني كانت فرصة مش وحشة اني اغير فيها حاجت كتير ودلوقتي الحمد لله اداءها افضل كتير كمان من الأول
انا كنت شاريها ب 23 بالظبط وهيا معايا بقالها سنة تقريبآ او اقل شهر وبحبها جدآ جدآ وصعبان عليا فراقها بس موضوع السفر سبب بيعي ليها لأني محتاج فلوسها انا شرحتلك الموقف وهات ميكانيكي يشوفها ويقيمها وده موبايلي 0121498530 واسمي وائل
وشكرآ