بشم ريحه شياط لما باجى اقف

السلام عليكم
ازيكم يا اخوانى اخباركم ايه يارب تكونوا في اتم صحه وعافية
انا عربيتى سيريون 2009 xl مانيوال عامله حتى الان حوالى 7700 كيلو
عندى مشكلة كده ظهرت من كام يوم او بحس بيها من كام يوم
بشم ريحه كأنه حاجه بتسيح ومش عارف احدد مصدرها ولا سببها وساعات بتبقى مصحوبة بصهد او سخونة كده
ولما جربت اقفل العربية واشغل التكييف الريحه ما ظهرتش كأنى بقول ان الريحه بتجى من برة مش من جوه العربية يعنى برجح مش متأكد او بحاول احسر المشكلة فين وعندى استنتاج تانى ممكن يكون المشكلة جاية من الفرامل على اعتبار ان بلاحظ المشكلة لما بقف او لما اكون بهدى والسرعه بدات تقل خالص
فاعايز اعرف استنتاجى صح والا غلط والمشكلة ديه من ايه وايه سببها وايه علاجها
وجزاكم الله خيرا

شوف التيل , اكيد عايز يتغير .لان هو لما بيتأكل بيسبب رائحة شياط .

بما ان العربيه مانيوال وعامله 7700كم
بصراحه موضوع التيل ده مستبعد نهائى
انما الريحه دى بتكون نتيجه سخونيه صاج الفرن من جهه الموتور وده شىء طبيعى
وموجوده وملحوظه اوى فى اغلب العربيات زى التويوتا والهيونداى والعربيات الاسبرانزا بالذات
ولو فعلا العربيه مقفوله الريحه لايمكن توصل للصالون
ولو مشيت بالعربيه مشوار بالليل مش هاتشم ريحه اى حاجه نتيجه ان مافيش شمس ودرجه حراره الجو قليله

لاتقلق ده طبيعى

شكرا يا جماعه على ردكم
بس فيه حاجه يا استاذ محمد عزت طبقا لكلام حضرتك المفروض اشم الريحه على طول مش لما اقف بس صح والا انا فاهم غلط

طول ما العربيه بتمشى الريحه بتروح فى الجو لكن والعربيه واقفه اكيد الريحه هتلاقيها حتى لو الكابوت مقفول
وشوف الكلام ده بالليل مش هتلاقى حاجه
بس واضح ان حضرتك بتقرص على العربيه حبتين

عفوا يا اخى انا اسف لكن انا كان عندى نفس العيب واتضح انها اسطوانة الدبرياج وغيرتها ودة نتيجة لانى غرست فى رمل فى المصيف والعربية لفت ع الفاضى ودخنت عموما اتمنى انة ما يكونش اللى انا قولتة وتطلع حاجة بسيطة

يااستاذ mohamed551 الراجل بيقولك العربيه موديل 2009 وعامله 7000كم
صعب اوى الواحد يخلى الاحتمال ده فى الحسبان

لا مش للدرجة ديه
انا معملتش اى حادثة ولا خبطت في حاجه ولا حاجه خبطت فيا ده فجأة لاحظت الموضوع و وبعدين مافيش دخنه ولا حاجه ده صهد من غير دخان وساعات بيطلع وساعات لا لكن الريحه هيه اللى بلاحظها دايما وانا بقف او لما اقف
طيب هل ده ليه علاقة بالبنزين لانى برضه لاحظت الحكاية ديه بعد ما مونت من بنزينة كالتكس اللى في العبور كنت الاول بمون من موبيل
ما مش حاسس ان ده السبب غالبا هضطر اروح اكشف عليها في التوكيل وربنا يحفظنا جميعا
شكرا يا جماعه على اهتمامكم وربنا يحفظ عربيتنا جميعا من كل شر
وبرضه مستنى ردودكم