الموضوع: هل المعلومة دي صح (خاص بالتكييف المنزلي)

المشاركة الأصلية كتبت بواسطة karim_monir

ويكفي مساحة قد ايه

شوف القدره التبريديه للتكييف اد ايه و هيا بتقاس بوحده اسمها btu و تفسمها على 1000 هبطلعلك عدد الأمتار المربعه

يعنى مثلا التكييف ال 1.5 حصان متوسط قدرته التبريديه حوالى 12000 btu

يبقى يكفى لغايه 12 متر مربع

لآن المتر المربع بياخد حوالى 1000 btu علشان يتبرد كويس

بالمناسبه BTU دى اختصار ل British Thermal Unit

المشاركة الأصلية كتبت بواسطة karim_monir

متشكر جدا على نصايحكم الجميلة
كلمت الشركات اللي بتوردلنا
قالولي شارب علية حجز وويتنج ليست كبيرة في المصنع وبيخرج باوفر برايس من اعجاب الناس بيه
ال جي الجهاز بالكامل ضمان 5 سنين والكمبوسور كوري
سامسونج زيه
شارب زيهم بس تجميع مصر والكمبروسور صيني
ده الفرق بين التلاتة بس كلهم اكدو ان ال جي تكنولجيا اعلى واداء خرافي
التمن :
تكييف شارب اسبليت بارد بلازما 3 حصان 4500 جنية
تكييف lg اسبليت حائطي بارد / ساخن 3 حصان - بلازما 5350 جنية
تكييف سامسونج اسبليت حائطي بارد / ساخن3 حصان forte 4850 جنية
تكييف سامسونج اسبليت حائطي بارد / ساخن 3 حصان vivace
6200 جنية
كل الاسعار كاش وبتزيد حاجة معقولة في التقسيط
ايه رايكم
اخليني في الشارب
هو يجي بعد اسبوعين
الباقيين بضاعة حاضرة

اسمحلى اصلح معلومه ان كومبريسور lg كورى لآنه تركى لكن الموردين بيقولوا كورى
و بعدين الأسعار دى مبالغ فيها جدا

كلم الشركه دى و استفسر منهم عن الأسعار هما ناس محترمين جدا و اسمهم شركه الرحاب

و ابقى قلهم انا من طرف محمد فوزى بتاع فودافون

تليفونهم : 25923999

المشاركة الأصلية كتبت بواسطة A_H_M_A_D

بمناسبة الحر العليل اللي إحنا فيه اليومين دول , كنت سمعت معلومة و عايز أتأكد منها:

هل فعلا إستهلاك أجهزة التكييف المنزلية الشباك للكهرباء أقل من إستهلاك التكييف السبليت ؟؟
طبعا المقارنة [OVERLINE]عند نفس القدرة[/OVERLINE] , و هل الفرق ده - إن وجد - محسوس و لا فرق بسيط

و هل هناك إختلاف مابينهم في المقدرة على التبريد , بمعني لو حانتكلم عن تكييف 3 حصان مثلا , هل الشباك قدرته أعلى و لا أقل من السبليت , و لا الإتنين زي بعض؟؟

أصلي عايز أشتري تكييف و كنت محتار أجيب شباك و لا سبليت , و إيه أحسن نوع في رأيكم ؟؟

طبعا منطقيا و نظريا لو بتقارن مكيف سبليت مع شباك لنفس القدرة يبقي مافيش فرق في موضوع سحب التيار الكهربي للمكيف و نفس الكلام بالنسبة لكفاءة التبريد لأن الكباس واحد في الإتنين
الفرق هو في تكوين الوحدة في الشباك بيقي الكباس و دائرة الفريون كلها و المروحة مع بعض في مكان واحد
اما في الإسبليت بيبقي الكباس في وحدة خارجية منفصلة و المروحة و الكنترول بيقي في وحدة داخلية اخري و دا بيبعد صوت الكباس عن المكان المراد تكييفه و بيخلي صوته هادئ جدا مقارنة بالشباك
بس انا عن تحربة شخصية عندي مكيفين كاريير 2,25 حصان واحد شباك و التاني سبليت
بصراحة الشباك بحس انه تبريدة احسن و اقوي من الإسبليت و بيخلي الغرفة تلاجة في وقت قصير عكس اللإسبليت اللي بياخد وقت طويل علي ما احس بيتسقيعه
بس بصراحة انا عندي الشباك جاي من مصنع كاريير بالسعوددية و يمكن دا عامل فرق غير ان الإسبليت متركب في منور مش كبير و يمكن دا بيخلي كفائة التكثيف مش 100% و يمكن دا اللي عامل خلل في التبريد
و انا بفكر اشتري مكيف تالت 3 حصان شارب
طبعا انتوا عارفين الجو عندنا في الصعيد عامل ازاي الحرارة النهاردة حوالي 850 درجة مئوية سيليزيه صعيدية جهنمية في الظل ، اما في الشمس بأه فما فيش ترمومتر قادر يقيسها لحد دلوقتي من كتر ماهي مشنشنه
انا راي ان الشارب هو حاليا افضل جهاز تكيييف في السوق في الوقت الحالي بعد تجربة ناس كتير له و غير كدا عليه 5 سنوات ضمان علي الكباس ، كاريير بيدي سنة واحدة
+ تكنولوجيا البلازما كلاستر الموجودة في شارب
بالنسبة للي محتار بين الشباك و الإسبليت فانا بصراحة لو عندي مكان في الغرفة ممكن يركب فيه شباك هشتري شباك واوفر فرق الفلوس اللي كنت هدفعها في اللإسبليت و علي فكرة تكييفات شارب الشباك صوتها ناعم جدا و مش مسموع مش زي ما الناس واخدة فكرة عنها انها جرارات بتحرت لأأأأ
التكنولوجيا الحديثة يا جماعة زي ما عندنا في السيارات صوووت الموتور مبقاش زي الأول مسموع نفس الكلام في المكيفات

المشاركة الأصلية كتبت بواسطة mramzy

متهألى الشباك اقل علشان انه محرك واحد فقط وكباس
لكن السبليت بيكون فيه كباس ومروحه بره ومروحه فى اللاسبليت وديره الكهرباء بره وجوه ووحده تحكم بالاضافة الى سريان الفريون فى مواسير طويله كلى يغشل الاسبليت فيحتاج مجهود فيستهلك كهرباء عكس الشباك كله جنب بعض
اللى اعرفه ان اقصى قدره فى الشباك 2.25 حصان وبعد كده لازم اسبليت
والله اعلم ومستنين رد الخبراء

انا بصراحة مش متفق معاك في الكلام دا لأن نفس المروحة اللي في الإسبليت موجودة في الشباك ودي اللي بتبرد الفريون في مواسير السربنتينة الخارجية عشان يتكثف و حرارتة تنزل و يكمل دورته من تاني يعني نفس القدرة الكهربية للإتنين واحدة هو بس الصوت اللي بيقل في الإسبليت عشان الكباس بعيد من الغرفة

المشاركة الأصلية كتبت بواسطة جمال

الميزة الاساسية فى الاسبليت هى الهدوء و عدم التكسير فى الحائط
الميزة الاساسية فى الشباك هى امكانية تجديد هواء الغرفة عن طريق الجهاز بانه يسحب هواء من الخارج و يبرده , ودى غير موجودة و لا ممكنة فى الاسبليت

كلام حضرتك مش مظبوط لأن الشباك بياخد الهواء من داخل الغرفة مش من برا و هتلاقي الفلتر بتاع الهوا من جوا مش من برا و لازم يتعمله صيانة كل شهر عشان التراب و العوالق اللي بتترسب علي الفلتر و بتقلل كمية الهواء المسحوبة و بتقلل كفاءة التبريد
دا لو زي ما حضرتك بتقول بيسحب هوا من برا يبقي مش هبيرد خالص دا هيسخن المكان بزيادة و مهما التكييف عمل مش هيقدر يبرد الهواء اللي داخل عليه و حرارتة فوق الأربعين و يوصله ل 24 مثلا و بالذات عندنا في الصعيد " قنا عذاب النار " يا جدعان دي الناس هنا ماشية بتكلم في روحها من كتر ما الشمس عماله تلسوع في دماغتهم من فوق و احيانا تلاقي واحد ماشي في الشارع يا عيني و عمال بيضحك مع نفسه كدا لوحده و ما حدش معاه من كتر ما الشمس اكلت نفوخه
ربنا يلطف بينا يا جماعة
انا كرهت حاجة اسمها الصيف من كتر ماهو صعب و شديد وخصوصا للي عليش في الصعيد خصوصا اسوان و الأقصر و قنا عذاب النار
يا لطيف يا رب حر غير عادي كتر الف خير العربيات بتاعتنا في الغلب دا و الله انا العربية بتاعتي بتبقي صعبانة عليا و انا ماشي بيها في عز الحر الساعة 3 العصر نار حمرا يا جدعان تخلي الحديد ينطق و يقول يا هوووووووووووووووووووووووو وو ارحموني من اللي انا فيه

المشاركة الأصلية كتبت بواسطة asbeats

عندنا اتنين واحد اسمه أمريكول والتاني هيونداي,الاتنين سبليت وكفاءتهم في التبريد معقولة بس مش جبارة يعني.

بس انا في حاجة بعملها:
مش بخلي درجة الحرارة اقل من 24 ويمكن اعلى كمان,هاقولكوا ليه... لأن درجة حرارة الغرفة لو كانت مثلا 26 في بدون تكييف هتحس ان الجو حار جدا.لكن 26 بالتكييف بتبقى باردة.وانا لما بظبط التكييف على درجة حرارة معقولة هيبرد الغرفة في وقت قليل وبعد كده هيفصل وده مفيد من ناحية:
1-يقلل من استهلاك الكهرباء.
2-صحي اكتر...لو حد خرج من الغرفة للجو العادي مش هيبقى الفرق كبير.
3-هيطول في عمر الكمبريسور بتاع التكييف لأن الناس اللي بتظبط التكييف على 16 والأرقام الوهمية دي التكييف عمره ما هيفصل-الا لو كان مشغله بارد في الشتاء بقى :) -

+1000000000000
كلام 100% و يا ريت الناس تتبعه
انا عن نفسي بظبط التكييف علي 26 -27 مش اكتر من كدا
يا جماعة احنا عندنا قصور كبير جدا في الكهرباء في مصر و ربنا يستر الأحمال عماله بتزيد و ما فيش توليد يغطي و الحكومة عماله تبني في محطات الكهرباء كل يوم و مش مكفي الزيادة المهولة في الإستهلاك نتيجة للسلوك الخاطيء اللي عايش به الشعب المصري و للأسف في كل مجالات الحياة مياه بتهدر بسهوله و كهرباء شغاله عمال علي بطال و في الآخر نشتكي من الفواتير و نتهم الحومة انها بتسرق و تليفونات ارضية و محمول مش مبطلين رغي و حكي فيها في كلام ما يستاهلش و اكل و شرب بيترمي في الزبالة بالعبيط و نشتري غيرة و نسل و خلفة عاملين زي الأرانب الستات عندنا بتخلف بالجوز و الجوزين حاجة رهيبة احنا شعب مش مستلك وبس دا احنا شعب مستنزف و مدمر كمان انا خايف يأجوج و مأجوج يطلعوا من عندنا واللله من كتر ما نا بشوف من الشعب الغريب دا

المشاركة الأصلية كتبت بواسطة karim_monir

طب يا جماعة تكييف شارب اسبليت بلازما 3 حصان كويس ولا لاء
حد جربه وهل في منه مشاكل
ويكفي مساحة قد ايه
وايه اطول مسافة للخرطوم
لان انا غالبا المسافة هاتعدي ال 3 متر
وليه تكييف زي ال lg اغلى
وهل lg احسن ولا سامسونج ولا اخليني في شارب

كريم باشا مساء الأنوار علي راي مدحت شلبي
انا من كتر ما سألت في الموضوع دا ناس كتير و كلهم كان ردهم ان شارب تكييف ممتاز و عليه ضمان 5 سنوات و دي نقطة مهمة جدا جدا
و اسعاره قريبة جدا من الكاريير و صيانته و قطع غيارة متوفره
3 حصان دا المفروض انه بيكيف مساحة كبيرة في حدود 36 متر تقريبا لأنه قدرته حوالي 3600 مع الأخذ في الإعتبار عدة عوامل بتأثر في قدرة تبريد الوحدةزي مثلا لو انت دور اخير و الشمس فوقيك بيبقي اقل من كدا عشان الفقد الحراري اللي بيحصل و لو انت عندك اكتر من ريح عليه شمس مباشرة نفس الكلام
LG غلي عشان كله بالكامل كوري زي العربيات عندنا يقللك اما حكاية تكييفات ال LG غاليهليه دا باه عشان مستوردة من كوريا و متقفله هناك و كلها كورية الصنع من الكباس و انت نازل زي العربيات بالظبط لاتقي العربيات اللي تقفيلها كوري اغلي من اللي متجمعة في مصر
و بالنسبة لطول المواسير هو غالبا بيجي معاه 3 م مواسير بس لو المسافة زادت عن كدا بيقي المتر الزيادة ب 100 جنيه تقريبا و بحد اقصي تقريبا 8-10 متر بس مش متأكد من المعلومة دي


خليك في الشارب احسن مضمون و هتلاقيله قطغ غيار في حالة لا قدر الله اي عطل و هتلاقي صنايعيه يشتغله فيه و سعر اعادة البيع مرتفع " زي العربيات يا باشا "
و كلمة اخيرة يا جماعة بما اننا بنتكلم عن الحر و ازاي اننا مش قادرين نتحمله و بندور علي حلول تخففه و تلطفه يبقي الواحد فينا المفروض ما ينساش شكر ربنا علي النعمة اللي احنا فيها و الرفاهية دي اللي عايشن بفضل ربنا فيها و لاقيين تكييفات في البيوت و في السيارات و في العمل نعيش فيها
شوفوا و افتكروا الناس الغلابة اللي مش لاقيه حتي مروحة سقف عادية عشان يعيشوا تحتها و يترحموا من حر الصيف الفظيع دا
يا جماعة فيه ناس مش لاقيه لوح خشب كونتر ولا حبيبي تستره علي بيوتها و تحتمي فيه من الشمس الحارقة دا اذا كان ليها بيوت من اصله و مش مرميين في الشارع
افتكروا الناس في غزة و في العراق و في دارفور و في الصومال و افغانستان و في مصر هنا عندنا ليه هنروح بعيداكيد كلنا بيشوف مناظر الناس في الشوارع عامل ازاي
كان الله في عونهم
و المفروض ان الحر دا كمان يفكرنا بجهنم و العياذ بالله شوفوا احنا مش قادرين نتحمل حر الدنيا البسيط
امال هنعمل ايه في الأخره و هولة الحساب و الوقوف تحت الشمس و هي فوق رؤوسنا مش بعيده زي دلوقتي بملايين الكيلومترات مننا
اللهم انا نعوذ بك من عذاب النار و ادخلنا الجنة مع الأبرار
قولوا اميييييييييييييييييين يا رب العالمين

المشاركة الأصلية كتبت بواسطة kh_talaat

لكن لو عايز نوع محترم وسعر معقول يبقى كاريير ، وأبعد عن يونيون آيير عشان الأنواع الجديدة بقت مكوناتها صيني

حتى مكونات الشارب دلوقتي بقت صيني وبتتجمع هنا ... والكلام ده من بق واحد صاحب شركة تكييف أعرفه بيتعامل مع كل الماركات تقريبا

في كمان ماركتين حلوين جدا على حسب كلام الراجل زيادة على الكلام اللى إنتوا قلتوه وضمانهم 5 سنوات على الجهاز بالكامل وهما وايت ويل و فريش

وايت ويل whitewale - تقريبا - الريش بتاعة السربنتينة بتاعته مطلية بمية الذهب عشان الصدأ والأملاح وده معناه إن عمرها أطول والكباس بتاعه هيتاشي ياباني ومصنع في كوريا بالكامل

فريش ... برضه الكباس بتاعه هيتاشي ولكنه مصنع في مصر ... أنا طبعا لا جربت ده ولا ده ... لكن الملاحظ إن معظم حاجة فريش في السوق جودتها كويسة جدا ومعمرة أكتر بالنسبة للمنتجات الأخرى اللى زيها

الإتنين تقريبا بنفس سعر يونيون إير وضمانهم وخدمة ما بعد البيع ليهم جيدة جدا ومهتمين بعملائم

على فكرة الكلام ده مش كلامي ده كلام الراجل صاحب الشركة

أنا بقى عندي واحد أمريكول والتاني يونيون إير ... بصراحة جهازين قمة في السوء والفنيين بتوع يونيون إير أجهل من دابة بالنسبة لفنيات التكييف

شارب عندي في الشغل وحاسس إنه بقى قطع من الخردة متركبة على الحائط من كتر البهدلة اللى هوة فيها ... فقط بعد إستخدام لمدة 6 أشهر ماعرفش بقى من سوء إستخدام العمال والفراشين له ولا هوة أصلا خاماته سيئة الجودة