ياخبراء التغذية (امتى نبدء ندى الرضيع اكل )

**nano1980** · 14-07-2009 11:02 AM

الاشياء الممنوعه والتي تسبب ضرر للاطفال ( بعضهم لا يحدث له شئ...بس مش معناه انه صح)
الزبادي .....مش قبل 6 شهور
العسل بعد سنه
اللحوم والفراخ والكبده بعد 9 شهور وتكون مطهوه جيدا ومهروسه
اللبن البقري او الجاموسي بعد سنه كامله
الفول لا لا لا ......لغايه تسع شهور لسنه ..علشان لو كان عنده استعداد لانيميا الفول
الحاجات التي لا خلاف عليها
الاعشاب من اول اسبوع(من الصيدليه اسمها ميلوبا) او الينسون العادي ....مهدئ طبيعي للمغص والغازات بتبقي رضعه صغيره واحده في اليوم
ممكن معلقه ميه مقطره يوميا بعد شهر
لبن الام طوال عامين وفي السته شهور
الاولي بمفرده
بعد 3 شهور ممكن عصير برتقال طبيعي ومصفي جيد جدا تنتدي بمعلقه وبعدين كل يوم تزود حبه حبه وتشوف محصلش حاجه يبقي كويس
بعد ال6 شهور نبتدي بتفاح مسلوق مهروس جيدا( التفاح الاصفر لانه مسكر طبيعي وبيحبه الاطفال)
تاني اسبوع( لا نجرب نوعين من الطعام في نفس الاسبوع ابدا )
نبتدي ندخل الرز المسلوق وتهرسه في الخلاط جيدا ليصبح شبه المهلبيه ومعلقه برضه واحدة اول يوم ونزود كل يوم شويه
تالت اسبوع او الرابع حسب استجابه الطفل للاكل
ندخل شوربه الخضار( بطاطس + كوسه+جزر) في الاول لغايه مايحبها ويفضل عدم ادخال البقوليات نهائيا ( البسله) واخواتها
وممكن نبتدي ندخل الفاكهه بكل انواعها علي سبعه شهور مع الحرص التام علي نضافتها وتقشيرها جيدا واخراج كل البذور مع عدم زياده الكميه حتي لا تاتي بنتيجه عكسيه ( البطيخ والعنب والكانتلوب لو زاد يقلب اسهال)
دي معظم القواعد العامه اللي بيها متحصلش مشاكل ان شاء الله
وبعدين لو استجاب الطفل ممكن تجرب كل اسبوع انك تدخل الاكل العادي ...بس جرب نوع كل كذا يوم ولاو محصلوش مشاكل ندخل حاجه تانيه والكلام ده علي تسعه شهور ....
ومتصدقش الكلام ان كده العيل نفسه حتبقي مسدوده وحيتعب وحيبقي رفيع
طول ماهو بيرضع طبيعي حيبقي بخير ان شاء الله
بس المهم الام تاكل اكل منوع وصحي وتشرب لبن كتير علشان الكالسيوم ليها وللطفل
وتاكل خضار والياف كتير
ولو الام اكلت اكل بيسبب غازات ده حيروح لابنها
لازم تراعي التنوع في الاكل والعصاير وتحرص علي الفيتامينات

**asbeats** · 14-07-2009 11:05 AM

المشاركة الأصلية كتبت بواسطة أحمد سالم

طبعا رئيى خبراء التغذية فى الانترنت قالو ان الطفل ممكن يبدء بالعصير المخفف من 6 شهور
وانواع بسيطه من الاكل الصلب من 7 شهور والبروتينات من 10 شهور تقريبا او سنه

هو ده -الى حد ما- الكلام السليم واللي بننصح بيه الأمهات في وزارة الصحة وطبعا مش احنا في مصر اللي مقررين ده,دي دوريات علمية وابحاث عالمية

انا كان عندي ورقة اسمها كارت تغذية الطفل,هادور عليه واحاول اكتبه او اصوره و انزله هنا

**Mohamed.Fawzy** · 14-07-2009 12:23 PM

المشاركة الأصلية كتبت بواسطة mohamedezat

يا احمد ربنا يباركلك فيه وياريت مايخدش اى حاجه قبل 6 اشهر غير لبن الام فقط

+1111111111

هوا ده الكلام الصح 100%

و خالى بالك ان الزبادى تحديدا مش قبل سنه كامله

**الطنطاوي** · 14-07-2009 02:09 PM

نصحية مجرب عود ابنك على الأكل من بدري علشان ماتحتاسش بيه لما يكبر ويكون اتعود على لبن الأم ويستسهل الرضاعة عن الأكل

**أحمد سالم** · 30-09-2009 12:50 AM

الحمد لله بعد ماعملت المشاركة دى وسئلت الدكاترة وسمعت اراء اشكال والوان
قررت انى مااديش ابنى اى اكل الا بعد 6 شهور
وبعد ماتم بحمد الله ال6 اشهر بدئت اديله سيريلاك لعمر فوق 6 شهور
ومن الشهر السابع بقيت اديله تفاح مسلوق وكمثرى مسلوقه
ومن اسبوعين تقريبا بدئت اديله صفار البيض البلدى طبعا بدوخ على البض البلدى بس الحمد لله بلاقيه ان شاء الله هبدء اديله دجاج بلدى مهروس بعد شويه والمياه بديله بسيط جدا معدنيه
الحمد لله لم نستخدم مع ابنى السكاته لان اغلب الدكاتره قالو انها سبب اغلب الامراض بسبب التلوث الحمد لله ابنى تم ال8 اشهر والحمد لله نموه كويس وبحمد ربنا انى ماسمعتش كلام الناس اللى فضلت تقولى من الاقارب طبعا لازم تأكله على 4 شهور ولازم ولازم
الحمد لله الطفل ماعندوش مشاكل فى معدته زى باقى الاطفال اللى بتاكل من اليوم الاربعين وبيقعدو يصرخو طول الليل من المغص
انا حبيت اكتب عن تجربتى ليستفيد الجميع
وخلو بالكم ان الطفل لازم ماياكلش زبادى ولا منتجات البان الا بعد 8 شهور انا يدوب بدئت ادله زبادى منزوع الدسم وحليب الابقار لازم بعد سنه ده ياجماعه والله كلام الاطباء وبالاخص اطباء التغذيه اللى متخصصين فى الاطفال

**itsonlyme** · 30-09-2009 12:59 AM

المشاركة الأصلية كتبت بواسطة أحمد سالم

وخلو بالكم ان الطفل لازم ماياكلش زبادى ولا منتجات البان الا بعد 8 شهور انا يدوب بدئت ادله زبادى منزوع الدسم وحليب الابقار لازم بعد سنه ده ياجماعه والله كلام الاطباء وبالاخص اطباء التغذيه اللى متخصصين فى الاطفال

أنا اتخضيت لما لقيت الكلام عن الزبادي والحليب البقري والجبن في السن الصغير ده. خطر جداً. الطفل ممكن يجيلو حساسية من اللبن ويعيش طول حياته مايقدرش ياكل أو يشرب منتجات الألبان.

لو تقدر تأخر منتجات الألبان لغاية سنة يبقى كويس.

**icehearted girl** · 30-09-2009 01:00 AM

هو صحيح سن ال 6 شهور هو السن الامثل لبدأ تغذية الطففل لان اللبن مبيكنش مغذي بالقدر الكافي ليه

انما فنفس الوقت احبذ ان الطفل يبتدي يدوق من اربع شهور

مش ياكل..بس يدوق علشان لما يوصل 6 شهور يبقي عنده استعداد وقابلية

متبقاش مرة واحدة يعني

انا بقي جدتي لحستني ملوخية

ايوا والله ملوخية وونا عندي اربعين يوم

اهئ اهئ

وكانت النتيجة اني بكرها لحد دلوقتي

الملوخية طبعا مش تيتا

**أحمد سالم** · 30-09-2009 01:18 AM

أنا اتخضيت لما لقيت الكلام عن الزبادي والحليب البقري والجبن في السن الصغير ده. خطر جداً. الطفل ممكن يجيلو حساسية من اللبن ويعيش طول حياته مايقدرش ياكل أو يشرب منتجات الألبان.

لو تقدر تأخر منتجات الألبان لغاية سنة يبقى كويس.

ده فعلا الكلام اللى سمعته من اطباء التغذيه وخاصتا ان لبن الابقار له اضار على الاطفال حديثى الولاده

هو صحيح سن ال 6 شهور هو السن الامثل لبدأ تغذية الطففل لان اللبن مبيكنش مغذي بالقدر الكافي ليه

انا مااكتلش ابنى اى حاجه قبل 6 اشهر والحمد لله دلوقتى بياكل عادى ومافيش مشاكل
كمان ماينفعش ندى الطفل اى حاجه فيها ملح ولا سكر قبل سنتسن تقريبا
واكيد كانت الملوخيه فيها ملح وثوم
شكرا لمروركم الكريم