ياخبراء التغذية (امتى نبدء ندى الرضيع اكل )
السلام عليكم
رزقنى الله بطفل الحمد لله واصبح عمره الان خمسة اشهر
(انا مش بخمس ياجماعه) لحسن دى عاده فى الناس
المهم
اقارب زوجتى قالولنا لازم تلحسو الطفل من بعد اربعين يوم
وقال ايه نجيب علبة زبادى ونشيل الوش وناكله منها
وادتى قالت من شهرين
انا طبعا رفضت الحكايه دى وبقيت بقى فى صدام مع كل الاسره كلهم بيقولو لازم الطفل يلحس الزبادى ويشرب بعض انواع الاعشاب من عند العطار من بعد اربعين يوم وفى اللى قال اكلوه رز من اول شهر رز مسلوق
المشكله ان الدكتور اللى بنتابع عنده بيقول ممكن يبدء من 3 شهور
وفى الدكتور اللى قالى اسمع كلام الستات الكبار اللى فى الاسرة عندك هما ادرى
طبعا رئيى خبراء التغذية فى الانترنت قالو ان الطفل ممكن يبدء بالعصير المخفف من 6 شهور
وانواع بسيطه من الاكل الصلب من 7 شهور والبروتينات من 10 شهور تقريبا او سنه
طبعا الاراء كلها مستمده من الموروثات الشعبيه
وده خطأ
وفى اللى قال ان اكل الطفل فى سن صغير مهم علشان يتعود على الاكل
وفى اللى قال اكل الرضيع خطر جدا على صحته لأنه بيكون جهازة الهضمى غير مكتمل والكليه غير مؤهله للقيام بكامل عملها
طيب اعمل ايه بقى
ياريت حد من الاخوه الاطباء بالمنتدى ينصحونى لانى لسه لغاية دلوقتى مش بديله الا بعض من المياه المعدنيه فقط