السلام عليكم و رحمة الله و بركاته
موضوعي من الاخر
انا اتخنقت من الناس اللي ماشية من غير طفاية
ماشي الناس لبعضيهاو و اعمل الخير و ارميه في البحر و الكلام ده على عيني و راسي
و انا محتسب اي فعل خير عند الله باذن الله تعالى
من شهر و نص تقريبا ماشي في عمارات الفتح اللي في اخر عباس العقاد
و الاقي هيونداي اكسيل مولعة
و صاحبها يقول لي معاك طفاية
نزلت و طلعت الطفاية و طفيت له العربية
الراجل كان ذوق جدا و قال لي متشكرين و كتر خيرك و اللذي منه
و مشيت
طبعا اضطريت اروح بافاريا جسر السوبس يوم السبت اللي بعديها
قال لي الملو ب 30 و تستلم تاني يوم .... التبديل ب 97 و الجديدة 122
قلت له املاها و ما قدرتش اروح الا بعد اسبوعين و هو اصلا كان قايل لي لو اتاخرت بيبعتوها المصنع او المخزن بتاع العاشر من رمضان
و اسبوعين و خدتها من جسر السويس ....
النهاردة ماشي في الشارع الواصل من كوبري القبة لكوبري الفنجري عند الفنية العسكرية و معهد لغات القوات المسلحة
و الاقي سيات 133 مولعة
و الست - هي مش ست يعني هي بتاع 25 سنة - نازلة بطفل و بتجري
و الهانم ما معاهاش طفاية
ركنت و نزلت ابص
محدش تاني من الواقفين طلع الطفاية
رجعت جبت الطفاية من عربيتي و جري طفيت العربية
ما قالتش حتى شكرا
انا مش مستني منها حاجة ..... بس انا مش شغال عند ابوها ..... فاهمينني طبعا
و مشيت
يعني انا في مرتين غرمت 30 ملو للمرة + مش اقل من 20 جنيه بنزين للمرة لاني باروح مرة اسلم و مرة استلم
يعني 50 + 50 = 100 جنيه
غير عطلتي
غير وقتي
غير راحتي
كل ده عشان البشوات و الهوانم مش عايزين يمشوا بطفاية حقيرة تمنها 122 جنيه (لسه مشتري واحدة قريب من بافاريا) .....
طفاية حقيرة ممكن تنقذ عربية
و معلش يعني الناس دي عندها عربيات يعني مش فقرا ..... 122 جنيه مرة واحدة في عمر العربية ..... مش حاجة يعني .......
اعذره لو طفايته معاه و اكتشف انها عطلانة و اخدمه بعيونني
اشيله على راسي لو لا قدر الله حريق كبير و طفايته مش مكفية و محتاجين كذا طفاية
بس هو مش على ايديه نقش الحنة
و بعدين يعني ذوقيا اعزم و لو مراكبية انك تديني فلوس الطفاية
انا اتكسفت اطلب
بس بجد بعد كده
انا هاسيب اي عربية في الشارع تولع
و صاحبها ذنبه على جنبه ...... مش هيصعب عليا لاني فعلا زهقت .......
رأيكم يهمني
المفضلات