خدعة أبو غالي

**rova** · 14-07-2009 09:53 AM

أعضاء المنتدى الكرام
دي أول مشاركة لى في منتداكم القيم وعايزة أعرض تجربتي وأخذ رأيكم.
أنا حجزت عربية ماتريكس 2010 من أبو غالي طبعاً علشان عرض ال 6% فائدة وده كان من اكتر من شهر ، وطبعاً العربية مش موجودة ولم يتم تسليمها إلى الآن ، المهم طبعاً وقت حجز العربية كان سعرها 97000 جنيه وجي بي أوتو نزلها الاسبوع الماضي بسعر 93000 جنيه طبعاً الموزعين ومنهم أبو غالي المفروض عليهم الالتزام بالسعر الجديد ، ولكن أبو غالي طبعاً رفض وبيقول إن اتفاقية البنك وعرض ال6% مقتصر على سعر 97000 جنيه .
طبعاً كلام ما يتصدقش سألت البنك قالوا طبعاً إن ده كلام فارغ ومن حق العميل إنه يستفيد بأي عروض ويدفع سعر العربية وقت استلامها لأن لو كانت العربية زادت كان لازم ندفع زيادة السعر و مش هايكون ده رد الفعل.
المهم أنا مش هاقدر أكون سلبية وأستسلم لجشع أبو غالي أنا بافكر في الكيا كارينز لأنها بصراحة كانت عاجباني من الأول لكن أنا قلت الماتريكس محدش اشتكى منها وصيانتها وقطع غيارها معقولة وكمان ال resale بتاعها ممتاز .
بس مش هاقدر اقبل الجشع ده ، ياريت تفيدوني بآرائكم وأقدر أعمل إيه مع الناس دي ؟

**basemzaki** · 14-07-2009 10:26 AM

هدديهم بأنك تلغي التعاقد معاهم لو لسة مدفعتيش فلوس او مخلصتيش اجراءات البنك، هتلاقي رد فعل تاني خالص.

وعلي فكرة دا معروف عن أبو غالي من زمان انهم بيتأخرو جدا جدا.

**seaman** · 14-07-2009 10:30 AM

لا طبعا متقبلش وخذ موقف مع نفسك انت كده بتتنازل عن حقك ومعتقدش ان الجشع والطمع هما الاقوى وقفتك ديه ممكن تكون عبره لبعض الناس اللى بتستسهل الامور وتقول مش مهم ..
اختياراتك بايديك انت بلاش تخلى حد يفرضها عليك وانا واثق انك أقوى طالما انت فكرت وانا اول واحد يساندك

**M.ABDEEN** · 14-07-2009 10:42 AM

لازم تاخد موقف طبعا وللاسف كله بيستغل اللي قدامه وممكن تفكر في الكارينز كامكانيات افضل من الماتريكس مش تحيز والله بس برده المشكلة ان في تاخير ووعود زائفة في تسليم الكيا ولا نقول الا حسبنا الله ونعم الوكيل في الجشع والاستغلال بتاع الوكلاء والموزعيين

**kloda** · 14-07-2009 11:08 AM

هدديهم عشان دة حقك
و بصراحة الكيا الكارينز حلوة جدا

**rova** · 14-07-2009 12:05 PM

المشاركة الأصلية كتبت بواسطة basemzaki

هدديهم بأنك تلغي التعاقد معاهم لو لسة مدفعتيش فلوس او مخلصتيش اجراءات البنك، هتلاقي رد فعل تاني خالص.

وعلي فكرة دا معروف عن أبو غالي من زمان انهم بيتأخرو جدا جدا.

شكراً على الرد أنا خلصت إجراءات البنك بس طبعاً ودفعت لهم 1000 جنيه حجز وباقي المقدم هادفعه عند الاستلام اللي كل أسوع يأجلوه أسبوعين ولسه لغاية دلوقتي .

**rova** · 14-07-2009 12:08 PM

المشاركة الأصلية كتبت بواسطة seaman

لا طبعا متقبلش وخذ موقف مع نفسك انت كده بتتنازل عن حقك ومعتقدش ان الجشع والطمع هما الاقوى وقفتك ديه ممكن تكون عبره لبعض الناس اللى بتستسهل الامور وتقول مش مهم ..
اختياراتك بايديك انت بلاش تخلى حد يفرضها عليك وانا واثق انك أقوى طالما انت فكرت وانا اول واحد يساندك

شكراً للاهتمام وياريت الناس كلها تكون كده إيجابية يمكن نقدر نغير حاجة فعلاً .

**rova** · 14-07-2009 12:11 PM

المشاركة الأصلية كتبت بواسطة mohammedsamirabdeen

لازم تاخد موقف طبعا وللاسف كله بيستغل اللي قدامه وممكن تفكر في الكارينز كامكانيات افضل من الماتريكس مش تحيز والله بس برده المشكلة ان في تاخير ووعود زائفة في تسليم الكيا ولا نقول الا حسبنا الله ونعم الوكيل في الجشع والاستغلال بتاع الوكلاء والموزعيين

حسبنا الله ونعم الوكيل

اللون الاحمر مخصص للمداخلات الاداريه
يرجي مراجعه قوانين المنتدي
مشرف هيونداي

**rova** · 14-07-2009 12:13 PM

المشاركة الأصلية كتبت بواسطة kloda

هدديهم عشان دة حقك
و بصراحة الكيا الكارينز حلوة جدا

أنا هاهددهم وأشوف النتيجة ولو أني أشك لأنهم حاسين بنفسهم قوي وبيتكلموا بثقة غريبة ولا كأنهم بينصبوا ولا حاجة ، مشكلة الكارينز إن لسة بدري قوي على تسلمها سمعت إنه مش قبل أول أكتوبر.

**dr-mohamed** · 14-07-2009 12:29 PM

الاول انت معاك ما يثبت ميعاد التسليم ولا لا؟
لو معاك ما يثبت انهم ملتزمين بتسليم العربية في ميعاد محدد روح القسم واعمل محضر اثبات حالة بامتناعهم عن التسليم في الوقت المتفق عليه وبلغ جهاز حماية المستهلك ويكون معاك نسخة من المحضر وتطلب الغاء الوعد بالتعاقد اللى انت عامله معاهم وتطلب رد الالف جنيه المقدم اللى انت دافعه وتعويض عن التاخير في التسليم وشوف ابو غالى دعايته مع الاهرام ولا الاخبار وابعت للي دعايته مش معاه بالاوراق دي وهما هيقوموا بالواجب في التشهير بيه
وصدقني قبل ما توصل لكل اللى فات هتلاقيهم بيقولوا لك خد فلوسك ومش عايزين نشوف وشك تانى