قاعدة الموتور اتكسرت

**ehab77** · 14-07-2009 04:03 PM

معايا جوليت 99 وعاملة 90الف كم
يوم الاحد حصل موقف غريب كنت ماشى فى امانة الله وفجأة الفتيس زرجن ومش عايز يغير اى غيار وحجر تقريبا
المهم ركنت وزقيت العربية فى شارع جانبى واتصلت بالميكانيكى اقوله بالتليفون ايه اللى حصل
المهم قالى اجيلك وفعلا جاه وشاف العربية قالى قاعدة الموتور بتاعة الفتيس اتكسرت وعلشان كده الفتيس مش بيرضى يغير اى غيار خلفى لكن ممكن نمشى بيها على الغيارات الامامية زى الاول والثالث والخامس
المهم توكلنا على الله ومشينا بيها وفجأة مؤشر الحرارة ارتفع بطريقة جامدة ركنا وشوفنا العربية مافيهاش ولا نقطة مياه
اللى حصل ان علبه الردياتير من عند الكوعه اتكسرت نتيجة ان الموتور محمل ثقله كله على ورا
الحمد لله ربنا ستر واتصل بعربية نقل تجر عربيتى ووصلنا الحمد لله للورشة
يوم الاثنين جبت القاعدة واخدت الردياتير عملت العلبة الفيبر بتاعته
جينا ندور العربية لقينا مؤشر الحرارة بيرتفع تدريجيا لغاية مايوصل لللاخر
اتصلنا بالخبير محمد عبده قال اكيد ترموستات الكوعه مش شغال
والميكانيكى بدأ يفك الكاتينة والتقسيمة علشان يوصل للكوعه
ادعوليا انها تقوم بالسلامة وتخلص بسرعة علشان انا متبهدل فى المواصلات
انا حبيت احكيلكم على اللى حصل ليا
اه نسيت قاعدة الموتور جبتها من التفيقية 50ج
علبة الرديايتر 100ج من ياسر قدام ورشة محمد عبده
ولسه ربنا يستر على اللى يظهر
واسف على الاطالة
وشكرا

**faron525** · 14-07-2009 04:19 PM

الف سلامة علي العربية وباذن الله تخلص بسرعة وما تظهرش اي مشاكل تانية
ممكن حضرتك تقولنا هي قاعدة الموتور اتكسرت فجأة ولا كان فيه مؤشرات بتدل علي انه في مشكلة في الفتيس ؟

**ehab77** · 14-07-2009 04:23 PM

الموضوع حصل فجأة وبدون اى مقدمات
انا كنت ماشى كمان على طريق مسفلت صلاح سالم

**nasroo** · 14-07-2009 04:47 PM

هي قواعد الموتور دي مش هي الجلدة السودا المثلثة اللي بيبقا ليها مسمارين تتربط بيهم
ولا حاجة تانية غيرهم

**ehab77** · 14-07-2009 04:53 PM

فى 3 قطع قواعد متور
واحدة فى الجنب يمين الموتور وواحد تانية شمال الموتور وواحد ورا خلف الموتور من ناحية الفتيس
بتربط الموتور بالفتيس
ده اللى انا فهمته
اللى اتقطعت عندى بتاعت الفتيس
الحمد لله

**nasroo** · 14-07-2009 04:59 PM

طب دي ايه علاقتها بنقلات الفتيس
اللي كنت فاكره انهم عشان تمتص اهتزازات الموتور وتثبته مكانه -

**ehab77** · 14-07-2009 05:03 PM

وانا برده كان عندى نفس الفكره
لكن اتضح ان قاعدة الموتور والفتيس ليها علاقة بوضعية الفتيس نفسه
مش حعرف اشرح اكتر من كده
ممكن الاستاذ ممدوح يشرح احسن منى

**abzoabzo** · 14-07-2009 05:15 PM

قاعدة الفتيس او القاعدة رقم 3
لما بتتكسر يبقى المتور عامل زى المورجيحة بيبهدل حاجات كتير

علشان كده يفضل انك تشيك عليهم باستمرار
واكيد كان ليها سبقات فى وضع العربية زى اهتزاز صوت طقة بسيط معنا انها اتكسرت يبقى فى انهيار فى الكاوتش المحيط بيها ادى الى تحررها واهتزازها مع المشى وانهيار للجزء المعدنى المحيط

واكتر ناس بيستهلكوا قواعد هما السيارات الاتوماتيك

**MMamdouh** · 15-07-2009 12:17 PM

المشاركة الأصلية كتبت بواسطة nasroo

طب دي ايه علاقتها بنقلات الفتيس
اللي كنت فاكره انهم عشان تمتص اهتزازات الموتور وتثبته مكانه -

مهى فعلا القواعد بتثبت الموتور بالتالى لو قاعدة اتكسرت او اتخلعت من مكانها الموتور بالفتيس وضعيتة حتخلف و المسافة بين الفتيس و عصاية الفتيس حتتغير و بالتالى حركة العصاية مش حتبقى صح و ممكن متعرفش تدخل العصاية فى حارات معينة زى ما حصل مع الزميل صاحب المشكلة

MMamdouh

**samirayad** · 15-07-2009 03:34 PM

المهم قالى اجيلك وفعلا جاه وشاف العربية قالى قاعدة الموتور بتاعة الفتيس اتكسرت وعلشان كده الفتيس مش بيرضى يغير اى غيار خلفى لكن ممكن نمشى بيها على الغيارات الامامية زى الاول والثالث والخامس
المهم توكلنا على الله ومشينا بيها وفجأة مؤشر الحرارة ارتفع بطريقة جامدة ركنا وشوفنا العربية مافيهاش ولا نقطة مياه

غلط جدا أنك سمعت كلام الميكانيكى ومشيت بالعربيه ......وأدى النتيجه

ومشينا بيها وفجأة مؤشر الحرارة ارتفع بطريقة جامدة ركنا وشوفنا العربية مافيهاش ولا نقطة مياه
اللى حصل ان علبه الردياتير من عند الكوعه اتكسرت نتيجة ان الموتور محمل ثقله كله على ورا

وكان المفروض تعمل كده فور حدوث المشكله

واتصل بعربية نقل تجر عربيتى ووصلنا الحمد لله للورشة