الموضوع: بعد صدور القانون الذي يجبر سكان العمارات على إشهار إتحاد ملاك وإلا يا ويل السكان !!!!

بعد صدور القانون الذي يجبر سكان العمارات على إشهار إتحاد ملاك وإلا يا ويل السكان !!!!
تقريباً هو تابع لقانون البناء الموحد أو غيره (مش فارقة)
والوزير المغربي طلع وإتكلم وحذر من التأخر
وهذا هو الخبر:
http://www.masrawy.com/News/Egypt/Po...n.aspx?ref=rss

http://www.el-wasat.com/details.php?id=55553492

http://www.ahram.org.eg/Archive/2009/4/18/EGYP3.HTM


القانون يعطي مهلة من الآن 45 يوم لإنشاء وإشهار إتجحاد ملاك رسمي لأي عمارة وإلا
وإلا إيه بقه ؟؟؟

وإلا يقوم الحي بتعيين ثلاث موظفين من عنده كمديرين لتلك العمارة ويتقاضون رواتبهم من السكان
حيث سيتم جمع رواتبهم قصرياً من السكان

إيه رأيكم
وما هو الحل ؟؟

عندنا في العمارة مفيش ولا واحد فاضي يشغل نفسه بحاجة زي كده
والجماعة المعاشات عيانين ومش قادرين
والبواب بعتناه الحي يشوف إيه الورق المطلوب وإذا بالآتي:
* محضر إجتماع من جميع سكان العمارة
* أسماء حوالي خمسة أو ستة مرشحين لإدارة إتحاد الملاك
* وتطلع يا سيد على وسط البلد جيب القرار الفلاني
وبعدين .....

المهم كلام كثير ولف أكثر ومحدش فاضي للكلام ده
يعني أسيب شغلي وأروح أعمل مشاوير ولا إيه

المهم أغلب سكان العمارة مكبرين دماغهم ومطنشين
والباقي متخانقين وبيقولوا إنهم مش هيعملوا حاجة
وأنا وغيري مش فاضيين

نعمل إيه ؟؟
وإنتم هتعملوا إيه ؟؟
تقريباً الكلام يمسنا كلنا سكان أي عمارة


تفتكروا هيجي اليوم اللي هلاقي فيه موظف من الحي بيخبط على الباب ويقول لي هات 100 جنيه رسوم إدارة العمارة لصالح الحي
مش عارف ممكن وقتها أرتك أنهي جريمة ؟؟
مش مهم وقتها ربنا يسهل

يا ريت تتفاعلوا معايا لأنها مصيبة عامة لكل عمارة زي عمارتنا ليس لديها إتحاد ملاك وسكانها مش فاضيين
منتظر ردودكم ..........

شر البلية ما يضحك

أنا كلمت الناس الكبار عندنا في العمارة
قلتلهم أنا مستعد أساهم عشان ميحصلش أي مشاكل مع الحي
واحد قال : طيب تروح بكرة لغاية الحي تشوف طلباتهم إيه
هما عايزين ورق كثير بس إكتب طلباتهم
وبعدين هتطلع على وسط البلد مش عارف تعمل إيه وتجيب قرار من هناك
وعموماً ألف شكر على إيجابيتك

كل ده وأنا الإبتسامة لم تفارق شفاهي من الودن للودن
رحت البيت قعدت أشوف أنا هاخد أجازة ولا هستقيل من شغلي
وسهرت
وصحيت متأخر
ورحت الشغل نص يوم
وسمعت نصيحة أخويا (هيا يعني الحكومة هتجيب موظفين منين عشان ملايين العمارات في البلد, يا عم سيبك وطنش تعش تنتعش)

يالله خير اللهم إجعله خير
هجهز محامي من الآن عشان الحوادث وصفحة الحوادث لا قدر الله