الموضوع: مخالفة مرور بسبب اختلاف محل الإقامة !!

طيب ما أنا كمان محل الإقامه عندي مختلف .... صباح الفل

أنا أول مرة أسمع عن إن دي مخالفة ... بجد ده تهريج

إمال إزاي طلعولنا الرخصه بتاع العربيه بالعنوان الجديد ... المفروض إنه بيشوف عنوان البطاقه الشخصيه لما يجي يطلع رخصة العربيه

يعني ملهوش دعوه برخصة القيادة الشخصيه ... إمال الناس اللي بتسوق عربيات أصحابها وأخواتها .،،، ولا الناس اللي ماشيه بتوكيلات يعملوا إيه

بجد المفروض تقدم شكوي والموضوع ده ياخد حجم أأكبر من كده .. عشان اللي بيحصل ده تهريج .. إمال فين الإعلام

المشاركة الأصلية كتبت بواسطة mostafabakry

ماشي في امان الله الصبح يوم الأربعاء اللي فات
و اذا بلجنة مرور امامي قلت يا صباح يا عليم يا رزاق يا كريم " اللهم حوالينا لا علينا"
المهم العسكري الحلو اللي واقف شاورلي اقف و سألني بغرابة العربية دي نوعها ايه قلتله خد شوف نوعها من الرخص بقرف كدا
المهم راح مصرخ في وشي وقايل " نضارة طبية!!!" يا باشا انت ليه مش لا بسها قلت له اصلي عقبال املتك لابس عدسات لاصقة و النضارة اهي معايا في العربية راح قايللي اركن يا باشا علي جنب و طلع رمح عالظابط اللي عمال دبح في خلق الله علي جنب الطريق
ركنت علي جنب و نزلت من العربية و روحت للظابط علي بقا ما خلص سيادته مناهته مع الضحايا بتوعه قاللي ليه مش لابس نظارة با بشمهندس قلتله حضرتك انا لابس عدسات و دي زي دي و مش معقولة هسوق عربيتي و انا مش شايف كويس و اعرض نفسي للخطر
راح مبتسم ابتسامة صفرا كدا و قاللي يعني جواب نهائي قلتله اي نعم
وراح مادد ايده هيديني الرخص و انا مادد ايدي و منشكح و حاسس اني كتمته عالصبح و ببص للعسكري و شوية و هطلعله لساني و اغيظة
و فجاة رايح منفوض كدا و رافع حواجبينه و مادد بوزه و راح مرجع ايدة تاني بعد ما انا خلاص همسكهم
و رايح قاطع ايصال من الدفتر بسرعة ورايح كاتب مخالفة و كاتب السبب إختلاف محل الإقامة
انا محا الإقامة في رخص القيادة بتاعتي مكتوب قنا -قفط
و في رخصة السيارة مكتوب البحر الأحمر - الغردقة
قاللي يا بشمهندس دا غلط ما ينفعش 2 محل اقامة مختلفين و طبعا هو طاير من الفرحة و سعيييييد

انا بقا اتغظت و قلتله انا عديت علي مليار كمين و لجنة مرور من اللي بتيجي من الإدارة العامة بتفتش وراكوا انتوا ما حدش قاللي علي الحكاية دي قبل كدا و انا معرفهاش اصلي مغي محل الإقامة بعد ما عملت رخصة القيادة

قاللي ما هو انا كنت زيك مش عارف الحكاية دي لغاية ما اشتغلت في ادارة التراخيص
المهم قاللي يا بشمهندس انت تروح تعمل شهادة بيانات لرخصتك من مرور قنا و تطلع بيها علي مرور الغردقة و هما هيصوروك من تاني و يطلعولك رخصة بباقي المدة المتبقية
و خد الرخصة و اخدت انا الإيصال و هاين عليا امسك العسكري ابن اللذين دا و اخنقه

المهم روحت عديت عالمرور و عملت شهادة البيانات و كنت اصلا طبيعي مسافر الغردقة لحضور حفل زفاف لواحد قريبي هناك قلت يا ربي حتي لما رايح اغير جو نكدوها عليا الله ينكد عليهم دنيا و آخرة بتوع المرور
روحت مرور الغردقة يوم السبت و وقفت عالشباك و جي الدور عليا و الموظفة قاعدة عالمكتب و مش عاوزة حتي تبصلي و بتكلمني بقفاهما وانا هاين عليا ارزعها بحاجة كدا عشان تنتبه لي
المهم بصت في الورق و قعدت تمصمص و تتمحص و تهرش في راسها و في الآخر بصتلي من فوق لتحت و قالتلي بص يا عم المهندس "باللفظ والله" قولتها نعم يا حجه قالتلي انت تجيب لنا شهادتين طبيتين من اي دكتور باطنة و عيون و الرخصة القديمة و تيجي نعمل لك رخصة ب 10 سنين مش لغاية 2014 بس
قولتها الرخصة القديمة مسحوية يا ستي و انا جاي عشان كدا
راحت قالبه حواجبها و زغرتلي بعنيها و قالتلي لازم تسلم الرخصة القديمة يا عم المهندس و مش هيتعمملك رخصة الا لما تسلم القديمة
و طبعا انا رحت لظابط التراخيص و عرضت المشكلة عليه يمكن يقول كلام تاني قاللي نفس الكلام
روحت ماشي و لما رجعت قنا روحت النيابة و دفعت الغرامة اللي طلعت 50 سحتوت مش 10 بس زي ما قاللولي و رحت جبت الرخصة بتاعتي و ربنا يسهل بقا لما اروح الغردقة تاني ابقا اغير الرخصة بمحل الإقامة الجديد

المهم حد منكم كان يعرف بالحكاية دي و اتعرض لها ولا الموضوع جديد

مساء الخير
انا عندي نفس المشكلة
اني محل الاقامة الغردقة في البطاقة ام الرخصة المنيا ومش عارف اعمل اية بس لنا معي البطاقة القديمة بتاع المنيا علشان كدة مكبر دماغي من اني اروح اغير محل الاقامة في الرخصة
انا كنت ناوي اغيرها بس قراءة في فانون المرور ان التغير يتم خلال 30 يوم من تاريخ تغير محل الاقامة وانا مغير محل الاقامة من اكتر من سنةعلشان كدة قالت اني ممكن اقع في مشاكل
هو حضرتك مطلع الرخصة قبل تغير محل الاقامة واديلك اقد اية مغير محل الاقامة
عاشان انا عايز اغيرة وخايف يقولولي ان الوقت انتهي
وشكرا

أحمد ربنا والله انا خدت مخالفه قبل كده علشان معدى الشارع..ساب الناس كلها اللى معديا معايا ومسك فيا انا وقعدت اهاتى معاه نص ساعه وقوله ماهو اهو جنبك بيعدوا قدام عينيك ومفيش فايده كأنه لما شافنى افتكر حد كان بيضربه وهو صغير فتعقد..ولما لقانى شبهه انفكت عقدته عليا..كبر دماغك مصر ام الدنيا ..دنيا الافتكاسات