الموضوع: عضو جديد وعايز أدردش معاكوا شوية إذا سمحتوا

عزيزي المتبهدل
الاول قولنا اسمك بما انك عجبك منتدانا يبقي اول حقوقنا نعرف اننا بنكلم مين
اسلوبك ظريف وحيادي وفكرتنا فعلا بعربيات الوالد وهما فعلا بيبقوا خايفين على شقى عمرهم جدا مش زينا بس انا والدي كان ليه مبدا بصراحة بدات احس انه كلامه صح
ان مفيش عربية اكتر من 128 تستاهل تمشي في شوارع المحروسة
كل ما ابص على عربيتي الكرولا ال 2007 واشوف بقي شكلها ايه بعد ما جبتها ب 3 شهور تصعب عليا واحن لمبدا والدي بس مشكلتي اني بتحرك بالعربية كتير قوي فلازم عربية تستحملني
الخشونة اللي بتحكي عنها دي طبيعه في اللانوس وعمرك ما تقرن لانوس بلانسر كريستالة الل يكلمة ناعمة دي عليها شوية
كفياة فتيسها وصوت موتورها
اما عن شقة التجمع ربنا يباركلة فيها والكريم مش هاينساك ابدا سبحانة عز شانة
العشرة ممكن بخمسة كمان تجيبلك 128 ترحمك وانت بتوضب شقة التجمع عشان ما تصرفش مواصلات كتير
ربنا يوفقك ومرحبا بيك يا ........ اخ جديد لينا

المشاركة الأصلية كتبت بواسطة Metbahdel

ممكن سؤال للأخ محمد ممدوح يعني لو تكرم يقولي ما شاء الله إزاي بقى كويس كده في موضوع العربيات ده ربنا يباركله

يعني دراسة ولا قراءة ولا تجارب ذاتية ولا تجارة ولا ملازمة صديق أو معرفة عندة خبرة كويسة ولا إيه والفترة يعني بدأ إمتى

يعني ممكن نحاول نتعلم منه إزاي نكون كويسين ونتجنب إيه ونكتر من إيه

انا عارف إنك مشغول أوي ربنا يكون في عونك بس عشم بأه :) أخوك مزنوووق :D

وشكراً وجزاك الله خيراً

شاكر جدا على الاشادة يا باشا

القصة بداءت من الطفولة... كان كل اللعب بتاعتى عربيات... لا ليا فى الكورة و الكلام دة.. عربيات و بس... اللعب عربيات التلفزيان يبقى افلام عربيات مجلات عربيات حتى فى الشارع ابص على العربيات اللى ماشية فى الشارع و اتفرج عليها

بعد شوية بقيت عايز افتح كل عربية لعبة اشوف جواها ايه... طبعا الموضوع سبب وفاه كام عربية منهم بس بعد كدة بدات افهم ان فيه موتور و تروس و حاجات كدة و بدات بعد ما افك العربية اركبها و ارجعها زى ما كانت و دة كان اول درس: الفك سهل جدا لكن التركيب هو اللى صعب

لما كبرت و بقيت فى اعدادى نقلت الاهتمام بالعربيات الحقيقية و كنت بروح للميكانيكى مع والدى و اتفرج هو بيعمل ايه فى العربية و شوية شوية بقيت اشتغل معاه على خفيف... بس مكنتش فاهم اى حاجة

جبت كتاب عربيات من معرض الكتاب كان بيتدرس لطلبة الدبلوم و قريت فيه... الكتاب دة فهمنى حاجات كتير اوى مكنتش فاهمها و لا اعرف ايه وظيفتها ولا بتشتغل ازاى... بعد كدة بدات ادور على الحاجات دى فى عربية الوالد و طبعا كات خناقة كبيرة بينا لما شافنى فاكك الكربراتير برة العربية (انا فى تانية اعدادى)

بعد كدة بدات اجيب مجلات العربيات و اقراء عن التقنيات الحديثة و الانظمة الجديدة... سعتها الABS كان اختراع جديد نوفى و مش موجود غير فى ال BMW و المرسيدس و بعدها الاير باجز و خلافة... باختصار كل تقنية جديدة كنت بفهمها من المجلات

لما جبنا الدايو كانت نقلة كبيرة من البيتلز و كانت اول مرة اتعامل وجها لوجة مع عربية انجكشن... لقيت الموضوع حساسات و رشاشات و كمبوتر و حاجات غريبة مقرتهاش فى كتبة القديمة و المجلات مشرحتهاش باستفاضة...ساعتها كانت النت هى الحل

دخلت دورت على كل المنتديات الخاصة بالدايو و فضلت اقراء عن العربيات دى لحد ما عرفت عنها كل حاجة و لما كنت بتزنق فى حاجة مش فاهمها كنت برجع ل www.howstuffworks.com وكان بيشرحها تمام... و الحمد لله رب العالمين فى خلال سنة كنت مشرف فى اكبر منتدى دايو على النت www.daewootech.com
و اكبر جروبات للدايو على الياهو جروبس daewootech و daewoolanos وبعدها بدات اتجه للمنتديات المصرية زى كونتاكت كارز و طبعا اخرها المنتدى العظيم نايل موتورز اللى بفخر انى عضو فعال فيه

و طبعا خلال كل المراحل دى كان اصحابى و زمايلى فى المدرسة و الكلية و الشغل بسالونى فى كل حاجة عن العربيات و الحمد لله بيق معروف وسط اصحابى بالمعرفة و سداد الرائ واحيانا كان الموضوع بيتطور لحد انى بصلح شوية حاجات على الطاير فى عربيات اصحابى :lol: ... الحمد لله على النعمة

طبعا معظم الناس كانت بسال بس لكن انا اتعرفت من فترة على بعض الشباب اللى بقوا اصدقائى المقربين اللى حبهم للسيارات اكتر من مجرد الهواية... الحب حنا هو حب السرعة و التعديلات و ساعتها بدانا بتركيب موتور ال2000 على النوبيرا و بعدين ركبنا عليه التربو... بعدها بدات اتجه اكتر لتعديلات العربيات اكتر من الصيانة العادية و المعرفة العامة

انا بحمد ربنا على العلم اللى اداهولى و اللى كان السبب فى معرفة كم هائل من الناس سواء فى مصر او خارج مصر و اللى بعضهم بقوا اقرب الى الاخوة من الاصحاب... الحمد لله

طبعا زى ما شفت المشوار طويل و عايز صبر و بحث عن المعلومة بمنكاش...لكن اهم حاجة اوعى لما تبقى صاحب علم تتعالى على الناس... اصل العلم دة نعمة ربنا ببيديها لشخص عشان يقضى حاجة الناس فلما صاحب العلم بيتعالى بعلمة على الناس ربنا بيخادة منه و بيحوجة لكل الناس

MMamdouh