الموضوع: أخطاء يقع فيها مبتديء القيادة

المشاركة الأصلية كتبت بواسطة hhoo

السلام عليكم
بصى حضرتك من رأيى ماتخرجيش بالعربيه فى شوارع رئيسيه أو طرق سريعه إلا لما تختفى الرهبه بتاعة الشوارع العاديه......وهقولك على فكره كويسه حضرتك بصى على أى حد ماشى فى الشارع يكون صغير فى السن وهو بيسوق وقولى لنفسك ده اصغر منى ومش خايف يبقى أنا لازم مخفش ولما تيجى تدورى العربيه ياريت تعدى قعدة المحترفين يعنى رجعى الكرسى لورا وسوقى بثقه لإن مظاهر الخوف وحضرتك فى مكان القياده بيكون ليها عامل كبير جداً على أدائك....بس ده مش معناه ان الثقه تتحول لغرور لا طبعاً ولو حسيتى انك اتغريتى افتكرى ان فى ناس محترفين وعملوا حوادث لاقدر الله علشان تقدرى تقيمى نفسك ومستواكى

لا اعتقد اني ممكن اوصل للغرور ابدا
لطبيعة المرأة اكتر من الرجل
واعتقد ان السيدات بيتشتموا اكتر من الرجالة وهما سايقين
وبيتهموا انهم مش بيعرفوا يسوقوا
يا اما تكون متمكنة جدا في السواقة وساعتها ما بيهمهاش حد ودة بيبقى نادر
يا اما بتبقى على ادها اوي وبتمشي على مهلها وبتنقط اللي ماشي وراها
بس انا لو قعدت قعدة المحترفين ورجعت الكرسي لورا مش هاطول الدواسات
انا بدأت اخد ثقة شوية بس بعيد عن الشوارع الرئيسية
والله يبارك فيه المدرب الخصوصي بتاعي اللي هوا زوجي بيعلمني حتة حتة على اصولها
تجنبا لأي اخطاء اثناء نزولي الشارع .. دعواتك

المشاركة الأصلية كتبت بواسطة poussi

موضوع جميل جدا وانا استفدت منه كتيير

انا بقالى شهرين تقريبا بسوق حاسه انى واحده تانيه الحمد الله وبقت ثقتى فى نفسى اعلى بس مازالت المطالع مشكله مش اوى زى الاول بس دايما اللى ورايا تقريبا بيبقى مخمن انى مش بعرف اسوق بيفضل ايده على الكلاكس فبيربكنى اكتر بتضطر استعمل فرامل اليد مع انى من غيرها ببقى كويسه برضه بس زياده اطمئنان علشان اقول للى ورايا انا بعرف اسوق هههههههههههههه

اكتر غلطه كنت بعملها انى ابقى فى الطريق السريع والاقى حاجه قدامى استنى لحد ما اقرب منها اوى واكسر من غير اشاره بس لان المرايه اللى جمبى مش مبينه ان فيه حد ورايا اصلا
وطبعا كنت بتشتم كتير من السواقين والحمد الله دلوقتى بقيت باخد احتياطى واظبط نفسى وادى اشاره حتى لو محدش ورايا

بس اللى يغيظ بقى انى بلاقى سواقين كتير كده دايما يكسروا عليا وابقى مديه اشاره محدش يعدينى
واكتر مشكله دلوقتى بسبب غياب المرور المشى مخالف يبقى الطريق وان واى تلاقى واحد ماشى عكسى فى وسط الطريق وبيقلب نور
ولما تبقى الاشاره واقفه وده يدى كلاكس ويقلب النور العالى فى عينك
وتبقى مهدى علشان قدامك عربيه والطريق زحمه وتلاقى واحد جه بسرعه وبقى قدامك ويفرمل وابقى هقف على الدواسه علشان الحق العربيه مخبطوش من ورا
انا الحمد الله بعد ما كنت بتشتم بقيت بشتم بس بالكلاكس يعنى مجرأش اعمل حاجه اكتر من كده هههههههههه للاسف نادر لما الاقى حد بيسوق باحترام ومحترم قواعد المرور

بما انك حديثة القيادة يا ريت استفيد منك وتقوليلي كنت بتتمرني بقالك اد ايه على ما اخدتي الثقة
وبتعملي ايه في العربيات اللي بتبقى قريبة جدا منك جنبك او وراكي واللي بيكسر عليكي والكلام دة
خاصة سواقين النقل اللي باترعب منه والنص نقل والميكروباص ربنا ينتقم منهم كلهم

المشاركة الأصلية كتبت بواسطة abzoabzo

اترك مسافة كويسة بينك وبين اللى قدامك

استخدم الانتظار لما الطريق يوقف فجاة او بتعدى مطب صناعى لتحذير من خلفك

دائما وابد عنيك على المرايات علشان متتفجاش بحد

لما تبقى نازل الشارع ومش مستعجل او نازل تتفسح امسك يمين

حذار تحدف على اى حد لو ظهر اى موقف امامك استسلم لقضاء الله لوحدك

ولو حد حاول يزنقك ما تفديهوش وتلبس فى واحد ماشى فى حالة(طالما كدة كدة هاتلبس البس فى اللى زنق عليك مش انت تلبس وهو يكمل طريقة)

ركز فى طريقك وماتمشيش فى وسط حارتين

خالى عندك احساس بالشارع انت مش مستعجل فى ناس مستعجلة

توقع خطاء الاخرين التصليح مش ببلاش والوقت بفلوس

حذار وابدا ابدا تقفل طريق لو انت فى تقاطع واتجاهك وقف متتحركش
don`t block intersection

الطريق ملك للجميع وانت حر اذا لم تضر

اوعى توقف عربيتك لتغير الكاوتش فى منتصف او شمال الطريق او منزل كوبرى حاول تاخد يمين
وتختار مكان محترم يعنى الطريق يظل حارتين على الاقل

ومتركنش فى ملف ومتركنش عربيتك فى مكان تتحدى فيه البشر وتختبارهم انهم ميخبطوش عربيتك


ده اللى فاكره دلوقتى
انتظروا المزيد

المشاركة الأصلية كتبت بواسطة poussi

بس اللى يغيظ بقى انى بلاقى سواقين كتير كده دايما يكسروا عليا وابقى مديه اشاره محدش يعدينى

ديه موجودة بالنسبة للمبتدأين و الى بيسوقو من فترة المشكلة مشكلة زوق مش اكتر

انا حاليا لما واحد بديله اشارة علشان داخل شارع معين مثلا و السكة زحمة ميرضاش يعدينى تقوم كبرة فى دماغى انى اعدى منه هو حتى لو وراه ممكن اعدى بقوم موسع لنفسى بعيد عنه و كاسر عليه جامد من قدام بحيث انه لو كمل و مشى ميخبطش دهر عربيتى طبعا بيقرفنى كلاكسات بس اهم حاجة برود الاعصاب عشان ميفتكرش انه هيعرف يوترنى

بس يا ريت متجربيش الطريقة ديه علشان لو حصل حاجة لقدر الله متقوليش انى الى قولتليك :)

المشاركة الأصلية كتبت بواسطة nonetta

خاصة سواقين النقل اللي باترعب منه والنص نقل والميكروباص ربنا ينتقم منهم كلهم

نصيحة منى بلاش تمشى جنب اى نقل فى شارع ضيق او كوبرى علشان عادتا مش بيبقو فايقين انا كذا مرة ترلات تقفل عليا الكوبرى لولا ستر ربنا كان زمانى انا و العربية بوستر على السور :)