-
العربية بهدلتني إمبارح!
السلام عليكم ورحمة الله تعالى وبركاته.
إمبارح يا جماعة كان معايا الأولاد وراجع من شرم الشيخ... المهم وقفنا فى الطور عشان إبني الصغير كان عايز يدخل الحمام...نزلت معاه ...وأنا راجع لقيت زيت أحمر بينقط تحت الإكصدام من الناحية اليمين...إتخضيت لأني عارف إنه حاجة من إتنين يا باور يا فيتيس!!!
المهم ... فتحت القربة بتاعة زيت الباور مالقيتش فيها نقطة زيت... ربنا كرمني بمحطة بنزين قريبة إشتريت منها زيت الباور ويدوبك حطيته لقيت الزيت بينقط تاني من نفس المكان!!!!
سألت واحد من بتوع المحطة عن ميكانيكي شاورلى على واحد الناحية التانية.... رحتلله وبص على العربية قاللى الماسورة اللى قدام المروحة اللى قدام الردياتير مخرومة ولازم نفك الإكصدام والفوانيس ... إلخ عشان نوصللها!!!
المهم.. لقيت إن فك الإكصدام والكارتيرات واللذي منه حياخد وقت غير عادي والساعة كانت داخلة على 2 الظهر وكمان الميكانيكي ده كان شكله مش مقنع لأنه عايز يلف الماسورة الألومنيوم بحتة كاوتش وأفيزين وقصص وحوارات ماتدخلش أي عقل!!!
المهم .... إشتريت 6 علب زيت باور وتوكلت على الله.... العربية إبتديت معاها كل ثلث ساعة... أقف وأزودها وساعات لما ألاقي الدركسيون إبتدا يتقل... زائد إني سقت بسرعة متوسطها 140 كيلو عشان طرمبة الباور ما تطيرش مني وكل ده وانا على إتصال بالميكانيكي....
المهم العربية (أكلت) 10 علب ب 200 جنيه و 7 ساعات سفر للقاهرة وحرقة دم ونكد وخوف من إن حاجة تبوظ ضيعت معاها فسحة المصيف!!! غير إن الموتور كله غرق زيت باور لدرجة إنه سرح من تحت العربية وفرش على الإكصدام اللى ورا!!!
وصلت للميكانيكي بسلامة الله الساعة 8 بالليل وابتدا يشتغل فيها....
رحتلله الساعة 12 عشان أحاسبه طلع حسابه كالآتي:
1- ماسورة الباور الرئيسية الأمامية (اللى المروحة لطشتها) برازيلي 400 جنيه.
2- كهربائي لفك الزينون وتنظيفه من زيت الباور وتركيبه مرة أخري 80 جنيه.
3- مصنعية الميكانيكي 50 جنيه.
4- علبة زيت باور أبيض 50 جنيه.
5- غسيل العربية مرتين من إمبارح للنهاردة 40 جنيه لأنها عمالة تدخن من كل حته!!!
والحمد والشكر لله إن طرمبة الباور ما باظتش.
آه نسيت أقوللكم حاجة مهمة ..... مرة من ضمن المرات اللى كنت بأزود فيها زيت الباور وكان الموتور سخن ... جيت أفتح علبة زيت الباور قام طار منها نقطتين على حديدة الفرن اللى جوه الموتور فمسك فيها النار!!! لولا ستر ربنا إن المدام كان في إيدها قزازة ميه فقمنا مطفيينها بمنتهي السرعة!!!! والحمد لله ربنا سترها بس إبني الكبير دنه طول السكه مرعوب وجبت طفاية الحريق حطيتها جوه العربية ليحصل حاجة!!!!!
المهم ...الدرس من الموضوع ده إن الكل يبص على المروحة اللى قدام ويشوفها (بتكتك) واللا لأ لأنها لو لطشت الماسورة الألمنيوم حتلاقي زيت الباور نزل قدام عينيك في دقيقة ومالهاش حل لأنك لوفكيت سير الباور والدينامو الكهرباء حتقطع عن العربية فى خلال نص ساعة !!! ولأن الموضوع اللى حصل معايا إمبارح ماكانش سهل ابدا وربنا يسترها علينا جميعا.
تحياتي.
-
الحمد لله على كل شىء
وحمد الله على السلامة
-
-
الحمدلله ع السلامه يابشا واحمد ربنا ع كل شي ولا تزعل نفسك وشكرا اوي ع الافاده الجامده دي عشان الواحد بينا يتعلم وياخد باله من اي حاجه بتحصل
-
حمد الله على و كويس ان حضرتك و الاسره الكريمه بخير
-
الحمد لله على السلامه بص انت ممكن بكل سهولة تفك الكسدام وتجيب اى لزق حرارى وتغطى منطقة التسريب لغايت متوصل على العموم معلش بتحصل فى اى عربية واجازة سعيدة
-
حمد لله على سلامتك اولا يا ياراجل
ثانيا بقى وانت كنت لسه بتجهز للسفر كنت حاسس ان فيه خلل فى العربيه كنت تطلع للميكانيكي يريحك من التعب الى انت شوفته دا
عموما حصل خير وهى قرصه ودن علشان متكسلش تانى
دنا لما بسافر مشوار للمنصوره ولا للاسماعليه بروح للميكانيكي اقوله انا عايزك تكشف كشف كامل على العربيه انا هبقى على سفر كمان ساعتين مش عايز حاجه تقابلنى ونا فى السكه والا انت عارف بقى :ma: خليت الميكانيكي ياخد على تهديدي ليه :)
-
-
الف حمدالله علي سلامتك يباشا انت والاسره... وربنا يهديلك العربيه
-
حمدلله على سلامتك وسلامة الاولاد :36_9_4:
ربنا يوفق
-
الف حمدا لله على سلامتك ياباشا
وربنا يسترها معانا جميعا
-
فداك و حمداً لله على السلامه
-
-
فداك ,والحمد لله على السلامة...
هي العربيات كدا ياما بتصرف...والف شكر على التنبيه
-
حمد لله على السلامة و أنا كمان و أنا راجع من المصيف إمبارح عملت حركة بايخة جدا و قعت الإزاز الى جمبى تانى
-
-
الحمد لله جت سليمه و ربنا يستر فى مشاوير الصيف دى و حمدا لله على سلامتك و العائله
-
حمدلله على سلمتك إنت والأسرة والحمدلله انها فعلاً مجبتش طرنبة ولا اطريت انك توقف على طريق سفر وكويس انها طلعت أصيلة ووسلطك بسلمه
شكراً على التنبيه دة وربنا يسترها معنا جميعاً
-
قدر الله و ما شاء فعل
الحمد لله انها جت على قد كده و اكتشفتها فى الوقت المناسب و جت سليمة
-
السلام عليكم و رحمت الله و بركاته
اهم حاجه فى الموضوع ده حجتين
1- حمدله على السلامه انت و الاولاد و اى شيئ فداهم اهم حاجه ان انت كويس و العيال
2- معلومه انت قلته مهمه ان مافيش حد يفتح غطاء علبة زيت البوار و العربيه سخنه
لثانى مره حمدله على السلامه و اجازه سعيده يراب
-
الف حمد الله على سلامتك
ومعلش دى فصول العربيات فى الاجازات ولازم تكون اتعودت عليها وصدقنى مهما الواحد عمل صيانه برضوا بتفضل نسبه احتمال لحاجه غير متوقعه
وسلامتك مره تانيه
-
حمدلله على السلامه يا باشا
مش عارف العربيه دى بتعاندك ليه كده
بس ولا يهمك
كلنا بيحصل معانا مواقف بايخه :(
-
عادى العربيات بتتهبل فى الصيف و تعقل فى الشتا العربيات اللى جبتها فى حياتى كلها ملقتش اصلها غير فى سفريات طويله مطروح - العريش - شرم - الغردقة - اسيوط - اسوان ----- انما قريب طنطا - اسكندرية - العين السخنه زى الفل
Content Relevant URLs by
vBSEO 3.6.0 PL2