السلام عليكم ورحمه الله وبركاته......

إخوانى وأصدقائى وأحبائى .....النايل موتورزاويه.......

يوم الخميس 23 يوليو هيكون إجازه بمناسبه ذكرى قيام الثوره...كل ثوره وانتم طيبين والمصريين مبسوطين وراضيين ومستحملين ...طبعا انا كل علاقتى بالثوره انى بأخد اليوم ده إجازه......

المهم......

كنت بكلم أخويا محمد الشنورى أجدع إسكندرانى قابلته فى حياتى.......

إستعدنا زكريات أخر مره إتقابلنا فى اسكندريه ووجبه السمك والجمبرى الجباره اللى خليتنى حاسس انى مشع من كتر الفسفور...وفكرنا فى فكره.....

بما إن يوم الخميس والجمعه أجازه والسبت عند ناس كتير كمان....

نوينا والنيه لله...نعمل رحله مصيف وفسحه صغننه فى اليومين دل...
يعنى هنأجر شقه فى الهانوفيل او النخيل.....لزوم النوم وتغيير الملابس....

وطبعا الدعوه عامه لكل اللى يحب يأنسنا...سواء من القاهره اوالاسكندريه....

مش هقول اسامى عشان محرجش حد ....الدعوه عامه واتمنى نبقى كتير لان من خلال اللى شوفته لغايه دلوقتى ....نايل موتورز بتضم نخبه وصفوه المجتمع المصرى....

أحلى شباب الواحد اتعرف عليهم....أحلى عقول تحب تسمعها بتتكلم....

أحلى صحبه الواحد يلاقيها.......

حد كان يصدق إنى اتعرف بحد عن طريق النت ويبقى من أقرب الناس لقلبى......

فى ناس اتعرفت عليهافى مقابله عيد ميلاد المنتدى وواحشنى جدا زى استاذ جمال توفيق عميد المنتدى على الرغم من انى مأسعدنيش الحظ اسمعه بيتكلم اكتر من دقايق معدوده.....لكن فى ناس تدخل قلبك وتربع فيه بعد دقيقه واحده......

طولت قوى........!!!!!!!

أنا أسف....عموما لو قعدنا نتكلم على نايل موتورز وناس نايل موتورز الكلام مش هيخلص...

شكرا نايل موتورز اللى عرفتنى بأحسن ناس بجد...مش كلام وخلاص....

شكرا للجنود المجهوله...إداره ومشرفين ودعم فنى...اللى بيحافظوا على مستوى المنتدى الراقى...

جزاكم الله خيرا عنا.....

أخر حاجه هقولها واستنى الردود.....

اللى مأكلش سمك فى اسكندريه ما أكلش سمك فى حياته.....

إن شاء الله الغدا هيبقى سمك بورى مشوى وسبيط وجمبرى وجندوفلى وفيليه ورز صياديه وسلطات...
ومستعد لقبول اى إقتلراحات وللعلم الرحله هتبتدى الخميس صباحا وحتى الجمعه مساء وفى إمكانيه اننا نرتب مع بعض ونتقابل ونروح بعربيه او اتنين او تلاته حسب العدد وكل ما زاد العدد زادت المتعه....

التكاليف هتتوزع على عدد الناس اللى هتنورنا ....سلاموعليكو