الموضوع: الرحمة يا توكيل ميتسوبيشى !!!!!!!

انا مدخلتش المنتدى خميس مساء ولا جمعة لكن واضح ان السيرفر كان واقع واتعمل باكاب وريستور من توقيت معين وفيه مشاركات كتير فُقدت في القصة دي وفيه اعضاء كتير في المنتديات الداخلية زعلانين ومقدمين شكاوي كمان ان مشاركاتهم اللي تعبوا في كتابتها اتحذفت وبالتأكيد ده امر خارج عن ارادة ادارة المنتدى ومشكلة فنية بحتة

انما بالطبع هو مش مجاملة من ادارة المنتدى لتوكيل ميتسوبيشي واكبر دليل على كده الموضوع الموجود في الصفحة الأولى هنا في منتدى ميتسوبيشي عن تقييم التوكيل مميزاته وعيوبه وكل واحد بيقول رأيه بصراحة وبراحته

نرجع للموضوع الأساسي ليه تكلفة اصلاح الحوادث والسمكرة والدهان عالية

لأن العربية بترجع زيرو تاني يعني اللي بيتم في معاينة اي حادثة بسيطة او جامدة هو عمل مقايسة اصلاح تشمل تغيير لكل ما تلف بفعل الحادث وعلى سبيل المثال لو حادثة امامية والفانوس سليم لكن ودن الفانوس مكسورة (يعني المكان اللي بيتربط منه الفانوس بمسمار في البودي) فبيتم تغيير الفانوس في المقايسة ومهندس التأمين بيوافق على كده
لو مثلا الردياتير او سربانتينة التكييف اتنت لكن لم تنكسر برضه بيتم تغييرها

الخلاصة ان مقايسة الاصلاح بتكون عالية لأنها تشمل تغيير كل قطعة صغرت ام كبرت تكون اتأثرت من الحادث بحيث لما يتم تغييرها ويتم رش العربية او مكان الحادث فعلا بترجع جديدة تاني

ومهندسي التأمين بيوافقوا على 95% من مكونات المقايسات مش مجاملة ولا لأي سبب انما لأن فعلا القطع دي اتأثرت من الحادث ويجب تغييرها

وعلشان كده انا دايما اتصح اي حد شاري عربية جديد انه يأمن عليها فورا لأن الحوادث كترت جدا