و بعدين مع المشاة , يزنق نفسه في وسط الشارع و يطلعك انت الغلطان

منذ ساعة تقريبا كنت عائد الي البيت من الحي العاشر و أثناء دوراني من اليوتيرن اللي مواجه لمحطة الميكروباصاتطبعا الشارع كان واقف كالعادة و 3 عربيات بيلفوا مع بعض

انا كنت في أقصي اليسار و عربيتين علي يميني بيلفوا معايا بمنتهي البطء و فجأة ظهر واحد ماشي علي رجله و قرر يعدي الشارع من الحتة اللي أحنا بنلف فيها و مش بس كده لأ ده راح داخل بيني و بين العربية اللي في يميني و ماشي بالطول (من قدام الي ورا)

طبعا كان طبيعي أن عربية من الاثنين تخبطه (أنا أو العربية اللي في اليمين) و لكنه علشان غبي أتخبط من العربيتين و كان هايبقي ساندويتش ووقف يخبط علي العربيتين و يهلل في الشارع

فأنا ببساطة فتحت الشباك و قلت له بما أنه مش عايز يتخبط يبقي مايحشرش نفسه وسط العربيات و تركته أنا و العربية التانية و كملنا طريقنا

بالذمة اللي بيعملوه المشاة ده مش حرام ....... أحنا هنلاقيها منين و لا منين بس

حرام طبعاً
هو أحنا بنشوف شوية ...

طب حضرتك تقول اية لواحد مش لاقيله لقب واقف يولع السيجارة في قلب التقاطع .؟؟؟ ولا واحد تاني بيربط رباط حذائه في اليوتيرن ....ههههههههه

انا هتهبل قريب من اللي بشوفه و الله

اقرب موقف حصل لى كان النهارده

رايح مدينة نصر

وواحد بيعدى الشارع من عند المنصه للناحيه التانيه

وبمنتهى البطئ والبرود

وطبعا كلنا جايين سريع

واللى يغيظ انه بيشاور كدا بصباعه اللى هو استنوا

وبيبص بصه كدا فيها استفزاز وضحكه بارده

وكله ثقه ان محدش فينا هيدوسه واكيد هنقفله

هو الظاهر و بلاحظه كتير

ان بعض المشاه عندهم أكتر من اعتقاد

منهم ..العربيات دي اليات تجرح ولا تقتل ...يعني هو مستحيل يموت ...ممكن يتخربش بس

الوهم التاني بقى ....

ان الشارع امتداد لصالة البيت أو طرقة الحمام

وتلاقي الشاب من دول بيعدي الشارع بشويييش و ظهره للعربيات و تاتا تاتا كده و لما تديله كلاكس !!!!

ينزعج جدا و يبصلك بصة استغراب و عينيه بتنطق " إيه اللي جاب عربيات في الصالة"

اقتباس:

---

وتلاقي الشاب من دول بيعدي الشارع بشويييش و ظهره للعربيات و تاتا تاتا كده و لما تديله كلاكس !!!!

ينزعج جدا و يبصلك بصة استغراب و عينيه بتنطق " إيه اللي جاب عربيات في الصالة"

---

انا مرة اديت لواحد كلاكس لاقيته اتخض يا حبة عينى و راح متزحلق قدامي.!!! كان داخل البلد و كان في رمل ...
حسبي الله و نعم الوكيل فيهم

دول بقى غير الى بيعدى بالراحه من الحقد الى جواه
انت فى العربيه و فى التكييف و هو حران و ماشى ع رجله فأنت تقف و الناس تلبس فيك من ورا عشان هو يعدى

لك الله يا مصر

اصلهم بيعتقدوا ان الطرق للمشاة
والسيارات دخيلة عليهم
فهي اللي تقف مش هما

وبيبقوا متأكدين انك مش هتدوسهم
انا بدوس دبرياج مع البنزين فصوت العربية يعلى فيبعدوا بسرعة
وبتنفع كتييير خصوصا في الزحمة

يا جماعة ده مزاج جر شكل و خناق

شوف كده لما الواحد ييجى يركن العربية ، اول ما تبتدى ترجع بضهرك تلاقى الكل بيجرى علشان يعدى من ورا العربية ، و لما تبتدى تتحرك لقدام علشان تعدل تلاقى الناس قلبت و بتجرى تعدى من قدام العربية ، و طبعا كل تعدية معاها ما يستلزم نن تخبيط و ترزيع على شنطة أو كبوت العربية مع اسطوانة من الكلام بداية من "ما تحاسب يا بنى آدم" مرورا بـ "متسربعين على ايه جاتكوا ال..." و نهاية بألفاظ لا تليق و طبعا لا مفر من النظرات النارية

الغريب انى مش لاقى اجابة ليه بيعملوا كده ... ماهو لما بارجع لورا العربية من قدام فاضية و واسعة ... ليه مايعدوش من قدام ... و العكس صحيح !!!

النهاردة وانا واقف فى اشارة المجمع داخل على الجامعة الأمريكية واحد واقف يشرب سيجارة ... عادى ... و أول ما الأشارة فتحت اندفع كأبطال العدو فى سباق 100م و ها يا جرى يعدى أول ما الأشارة فتحت ... امال واقف ليه و الأشارة قافلة للعربيات و خضراء للمشاة ؟؟؟

مش باقول لكم مزاج جر شكل و خناق و مصايب على راس اللى بيسوق ...

طب اية الحل معهم ؟