عاز اعرف طرق كشف التلاعب في هياكل السيارات

**زهير فكري** · 18-07-2009 12:26 PM

السلام عليكم

كنت عايز اعرف طرق كشف التلاعب في هياكل السيارات و خاصه المستعمله , يعني ازاي اعرف ان العربيه دي خرجت من حادثه جامده , او متغير لها نص او القايم كان مكسور و اتلحم .. الخ , و في معلومه عندي وعايز المتخصصين يصححوا لو غلط و هي انه من الغير مقبول فنيا لحام اي اجزاء من هياكل السياره ( الشاسيه و هيكل السياره) و ده يعتبر خطر .

السبب الرئيسي في عمل الموضوع ده اني شفت عربيات غاليه زي المرسيدس بتيجي حوادث جامده و في ناس بياخدوها و تتصلح و ترجع زي الأول بس ده يعتبر غش للمشتري اللي ممكن ما يكونش عنده فكره , و كمان في تاجر قطع غيار اجزاء سيارات ( استيراد) و الراجل ده لقيت عنده 4 نص خلفي( كامل) لعربيه بيجو 406 و مقعدوش عنده اسبوع و اتباعوا . عشان كده انا حاسس ان الموضوع مش سهل و في نصب كتير و تلاعب , فياريت الناس اللي عندها خبره في الموضوع ده يفيدونا . و شكرا مقدما .

**faron525** · 18-07-2009 06:04 PM

نفس احساس الخوف ده وصلي لما كنت في الحرفيين من حوالي شهر وشفت نص bmw , لانسر وحاجات تانية كتير بس اللي مكمني ان فيه محطات بنزين بتكشف علي العربيات وفعلا بيعرفوا اذا كانت مغيرة ربع ولا نص ولاسليمة
وربنا يسترها علي الجميع

**أبو إياد** · 29-07-2009 02:35 PM

فى عربيات معينه كده الواحد يشك فيها انا مثلا كنت باشترى عربيه bmw 535i موديل 92 طبعا هنا الموتور قوى جدا فكان لازم اكشف على العربيه وفعلا ايام ماكان توكيل ابو الفتوح بيشتغل فى البى ام كشفوا واتضح ان العربيه مغيره نص كامل

انما لو عربيات عاديه ممكن الواحد يكتشفها بسهوله من اماكن زى الكارتيرات دواسه الشنطه والقوائم واللى يشكك اكتر لو العربيه رشه من بره بالكامل

انا اعرف واحد مغير سقف ب6 قوايم فى لانسر كشف عليها فى التوكيل ومابانش اى شغل فيها لان اللى عاملوها عملوها بفن
وانا اصريت انى اجرب العربيه دى وفعلا سافرت بيها والعربيه كانت طبيعيه جدا ولا الهوا

واعرف كمان مكان مخصص للزراجين بس مركز كبير ويخلى العربيه على الشعره زى مابيقولوا
مشكلتنا فى مصر ان احنا بنفنن فى النصب لان اللى بيمشى فى الصح بيكلفنا كتيررررررررر

**beckeryahia** · 13-03-2012 05:08 PM

العربية الملعوب فيها لازم يبان عليها سواء من فك الطابلوة او اماكن فك البيبان والكلبسات وخراطيم الموتور ووصلات الكهرباء وشكل البوهية وريحة العربية نفسها , العربية الملعوب فيها لازم تلاقي ياريحة بوهية ياريحة شياط لو لسة معمولة جديد ولو معمولة من زمان هاتبان جامد لانها هاتبقي مخلعة مع الاستخدام وهتبان عيوب العربية لان اللي اتفك واتربط تاني غير اللي عمره ما اتفك وعيوب البوهية مع مرور الوقت بمعني ان العربية لو راشة حوض بعد مرور سنة علي حرارة الموتور البوهية لازم تقشر ويبان المعجون من تحتيها , زلازم وانت بتتفرج علي العربية تكون بتتلكك علي الغلطة وماتعديش اي مكان باين عليه فك وتركيب وخاصة لو في الطابلوه او الموتور