الحاجات دي بتروح فين ؟ محتاج افهم بس !!

**medo55** · 19-07-2009 02:27 AM

السلام عليكم
بدون مقدمات

رئيس مصلحة الضرائب بيقول انه اجمالي حصيلة الضرايب على المبيعات 140 مليار و 500 مليون جنيه عن العام الماضي ( تقريبا من شهر 4 - 2008 لشهر 4 2009 بما ان الاقرار والدفع بيكون في الشهر دا )

وقال ان الضرايب على الدخل 89 مليار و 500 مليون جنيه عن نفس الفتره

وقناة السويس دخلها السنه الي فاتت تجاوز 4 مليار دولار على اساس انه تم الاعلان عن دخل قناة السويس من شهر يناير لشهر يوليو مليار و 999.6 مليون دولار ,,, وانه قل عن نفس الفتره في السنه الي فاتت وكان 2 مليار و 638.5 مليون دولار

انا مش هتكلم عن دخل السياحه الي هو دخل اساسي للبلد برضو
ولا هتكلم عن فلوس الغاز الطبيعي الي بيتصدر
ولا هتكلم عن مترو الانفاق الي بيركبه 3 مليون شخص كل يوم في 1 جنيه يعني 90 مليون جنيه في الشهر في السنه ما يقارب من مليار و 80 مليون جنيه
ولا هتكلم عن المصريه للاتصالات الي ارباحها بتوصل مليارات
ولا هتكلم عن الضرايب العقاريه
ولا هتكلم عن شركات الكهربا والميه الي بندفعهم كل شهر اد كدا
ولا هتكلم عن اي حاجه تانيه بتعتبر مصدر بتمثل دخل للبلد

انا بس عايز اعرف دا كله بيروح فين ؟؟

شوارع خربانه في كل حته
تعليم والحمد لله نسبة النجاح في الثانويه العامه 40 % ودي اعلنها الوزير نفسه بعد النتيجه , دا طبعا بخلاف مدارس لم ينجح احد
يعني مثلا في انكش بتصفح مدرسة المرج للثانويه بنين لقيت النتيجه 50 % من عدد طلاب المدرسه الي هم 400 طالب ثانويه عامه بالظبط 200 طالب جايبين تحت درجة النجاح ابتداء من 49% وانت نازل
الصحه ؟ مستشفيات اقل ما يقال عنها دورة مياه من كثرة الحشرات الى الروائح الكريهه وموظفين مابيشتغلوش الا لما بتدفعلهم

الدين المحلي في الاخر 666 مليار جنيه والخارجي 39 مليار دولار !!!!

وكل سنه الدين المحلي بيزيد والخارجي بيزيد ومفيش حاجه فيهم بتقل

في حاجه بس مش فاهمه ,, هو الدين المحلي دا من فلوس الشعب الي محطوطه في البنك المركزي ؟؟ الحكومه بتسحب منها زي ما هي عايزه ولا مين الداين للحكومه ؟

والحكومه عماله تقول الدعم وصل 40 مليار جنيه في السنه !!!! طيب والباقي فين ؟؟
معلش بس انا مش فاهم هي الحكومه بتحوش لينا الفلوس ؟

**karim fathy** · 19-07-2009 03:15 AM

الله اعلم بس انا مش عارف امتا البلد دى هيتصلح حلها دة محدش فى العالم عندو قناة السويس دى الا احنا ومع ذلك افقر خلق الله

**Rembrandt** · 19-07-2009 03:16 AM

يا شعبي حبيبي يا روحي يا بيبي يا حاطك في جيبي يا ابن الحلال

يا شعبي يا شاطر يا جابر خواطر يا ساكن مقابر وصابر وعال

يا واكل سمومك يا بايع هدومك يا حامل همومك و شايل جبال

يا شعبي اللي نايم وسارح وهايم وفي الفقر عايم وحاله دا حال

أحبك محشش مفرفش مطنش ودايخ مدروخ وآخر انسطال

أحبـك مكبـر دماغـك مخـدر ممشـّي امورك كدة باتكال

وأحب اللي ينصب وأحب اللي يكذب وأحب اللي ينهب ويسرق تلال

وأحب اللي شايف وعارف وخايف وبــالع لســانه وكاتم ما قال

وأحب اللي قافل عيونه المغفل وأحب البهايم وأحب البغال

وأحب اللي راضي وأحب اللي فاضي وأحب اللي عايز يربي العيال

وأحب اللي يائس واحب اللي بائس و احب اللي محبط وشايف محال

واحبك تســـافر وتبعد تهاجــر وتبعت فلوسك دولار أو ريال

واحبك تطبـّل تهـلل تهبـّـل عشان ماتش كورة وفيلم ومقال

واحبـك تأيــّد تعضّـد تمجّــد توافق تنافق وتلحس نعال

تحضّر نشـادر تجـمّع كوادر تلمـّع تقمـّع تظبـّط مجـال

لكن لـو تفكـّر تخـطط تقـرر تشغللي مخك وتفتح جدال

وتبدأ تشاكل وتعمل مشاكل وتنكش مسائل وتسأل سؤال

وعايز تنور وعايز تطور وتعمللي روحك مفرد رجال

ساعتها هاجيبك.. لايمكن أسيبك وراح تبقى عبرة وتصبح مثال

هابهدل جنابك وأذل اللي جابك وهيكون عذابك دا فوق الاحتمال

وامرمط سعادتك واهزأ سيادتك واخللي كرامتك في حالة هزال

وتلبس قضية وتصبح رزية وباقي حياتك تعيش في انعزال

هتقبل ها حبك.. هترفض هلبـّك هتطلع هتنزل هاجيبلك ....
منقول

**Bob2009** · 19-07-2009 03:30 AM

هى مش بتروح ولا حاجه كل الفكره ان الفلوس دى بتتسرق مش اكتر اما بتتسرق ازاى فهى بتتسرق نسبه كبيره منها من القروض
والباقى من خزانه الدوله والوزارات نظام خنصره يعنى
بس هى دى الفكره ان البلد بتتسرق وخلاص
الى نفسى بقى افهمه الى بيسرق بالمليار ده بيعمل بيهم ايه بس نفسى اعرف الاجابه بس مش لاقى ليها حل قولت يمكن بيفتح بيها مشاريع بره طيب المفروض المشاريع دى بتزود راس المال قولت بيصرفهم مش هيلحق يخلصهم
مش عارف بقى هو بيسرقهم ليه ونفسى اعرف ليه

**أحمد كمال** · 19-07-2009 10:29 AM

بص يا سيدي بتروح فين

في توضيب مكاتب السادة رؤساء مجالس الادارات

في المخصصات بتاعة كل الضباط من سيارات و خلافه للباشا و مدام الباشا و ولاد و بنات الباشا

في عربيات المواكب اللي لازم تبقى كلها مرسيدس ..... ما الوزير يركب مرسيدس و بقية الموكب يبقى حاجة تانية؟؟؟؟؟؟؟

في تكسير بلاط الارصفة و تركيبه من جديد كل سنة مع ان المفروض البلاط ده عمره طويل و يستحمل البري

في سوء التخطيط ...... مشروع توشكى و شرق التفريعة و غيره من المشاريع المنيلة بستين نيلة اللي اتصرف عليها مليارات عالارض

في الشارع اللي كل شوية يتكسر و يتسفلت من جديد عشان العمولات اللي بياخدوها من المقاولين

في السلع المدعومة اللي الموردين بيدفعوا رشاوي للحكومة عشان ترسى عليهم العطاءات .... و بعدها الحكومة تدعمها من جيبنا ....... و بعدها تروح لمن ليس له وجه حق بالكوسة سواء تجار بيشتروها و يبيعوها بسعرها او غيره

في دور افراح الجيش اللي كل سنة بتزيد ..... او عالاقل بتتجدد و تتظبط عالاخر ...... من ميزانية التسليح !!!!!!

في ماموريات للخارج و لا ليها تلاتين لزمة

في مراكز بالخارج سواء ثقافية او سياحية او غيره مالهاش اي لزمة غير تظبيط الموظفين بتسفيرهم

في جامعة عين شمس اللي بدل ما يجددوا المدرجات و المباني صرفوا كام مليون على تجديد الواجهة و الاسوار

و غيرهم كتير ...... يا شيخ ده انا كل ما باشوف الضرايب في ال pay slip كل شهر باتقهر و باحس انها فلوس مرمية في الزبالة لاني مش باخد بيها اي حاجة ........

**أحمد كمال** · 19-07-2009 12:02 PM

المشاركة الأصلية كتبت بواسطة ahmed0nouh

لاحظ كمان ان الارباح اللى بتطلع من مؤسسات كتير زى هيئه قناه السويس والسياحه وخلافه ده صافى بعد السرقه :)

يعنى لو حزم هناك فى المصاريف هنطلع الضعف

ليا صديق مهندس كهرباء فى الهيئه بيحكيلى عن بلاوى سوووده

ماهي ماسورة الفلوس مش بتنقط في حتة واحدة

بتنقط في كل سنتي منها

**أحمد كمال** · 19-07-2009 01:00 PM

المشاركة الأصلية كتبت بواسطة eslam_nagy

ونسيت نانسى عجرم وحماقى ومنير والعالم دى !!!!!!

دى كباريه مش جامعة.

الحمد لله انا اتخرجت قبل المساخر دي

انا رحت مرة هناك من سنة و لا اتنين تقريبا

لقيت الجامعة فعلا بقت كباريه

الولاد و البنات اغلبهم الا من رحم ربي قاعدين اتنينات في اوضاع الصراحة مش ظريفة خالص

ربنا يهدي

-

-

-

الموضوع: الحاجات دي بتروح فين ؟ محتاج افهم بس !!

LinkBack

أدوات الموضوع

عرض

-

-

-

-

-

المواضيع المتشابهه

محتاج اعرف سعر الحاجات دية

محتاج حد يقولى اسعار الحاجات دى؟ لل e36

محتاج اسعار الحاجات دي

محتاج اعرف اسعار الحاجات ديه

الكلمات الدلالية لهذا الموضوع

المفضلات

المفضلات

ضوابط المشاركة