تقييمي الشخصي للواجا بعد مرور شهر و4000 كيلومتر على شرائها
الشكل الخارجي:
العربية لأول وهلة تحس انها من فئة السيارات الفخمة وتخطف قلبك وعقلك في آن واحد وهى محط انظار دائما يمكن لانها نادرة ومش منتشرة وكمان هى شكلها وتصميمها الخارجي مختلف ومتفرد عن اى نوع تاني والسبعة الجميلة اللي في مقدمة السيارة المزينة بعلامة بروتون الكبيرة بتديها هيبة.
من الخلف شكلها بسيط لكن بساطة مميزة برضة ووجود لمبة الاستوب في الشنطة زى المرسيدس العيون والكمبروسور وزى الباسات بيديها منظر رائع.
الجنوط وما ادراك ما الجنوط شكلها جامد جدا وهى مقاس 205/16" وبصراحة مدية للعربية شكل السيارات الفارهة ووبتقربها من فئة ال BMW.
الأكر بتاعة الابواب من النوع العادي القديم الذي يفتح بالرفع الى الأعلى وكنت اتمنى ان تكون من النوع الذي يفتح بالجذب للخارج زى الكورولا واللانسر ومعظم الانواع الجديدة.
الفوانيس الامامية وفوانيس الشبورة شكلها جامد جدا.
الشكل الداخلي:
اول ما تفتح باب العربية توجد لمبة في باب العربية بتنور احمر وهى موجودة في باب السائق وباب المقعد المجاور ودي دايما تلاقيها في الفئات العالية , باب السائق فيه مكنة التحكم في المرايات وزرار منع فتح الزجاج غي من عند السائق , جودة الازرار مش عالية قوي وكنت اتمنى انها تكون احسن من كده هى وزراير المريات برضة جودتها مش عالية.
الطارة جميلة وحجمها جميل وشكلها رياضي وخامتها رائعة اعتقد انها نوع ممتاز من البولي ايثيلين ويوجد بها تحكم في الكاسيت وانا كنت اول مرة اجرب عربية فيها طارة متعددة الوظائف وبصراحة هى متعة انك تغير التراكات وتعلي الصوت وتوطيه من الدريكسيون , وعلى فكرة هى قابلة للامالة لاسفل بس بيتهيألي انها كانت المفروض تعلى شوية ويمكن انا حسيت بده لأني طويل حبتين.
التابلوه جلد بني في الجزء العلوي وهو مدي للعربية فخامة لا يعلى عليها كما اما الجزء السفلي فهو نوع من البلاستيك المتوسط الجودة ويفصل بين الجزئين شريحة طوليه مصنعة من مادة بلاستيكية فخمة لونها عسلي وهى حلية في الابواب ايضا سواء الامامية او الخلفية , والتابلوه تحس انه معمول للسائق لوحده واللي بيؤكد الكلام ده ان الكونسول الامامي اللي فيه التكييف والكاسيت والولاعة والطفاية مايل شوية ناحية السائق وبيقوله "انا كلي ملك لك انت لوحدك" , مكان التخزين الموجود في التابلوه بصراحة خامته وحشه جدا وانا بأعاني دايما في فتحه وقفله وكمان القفل بتاعه جودته تعبانه وكان من احد الملاحظات اللي قلتها للتوكيل في صيانة ال 1000 كم ولسه برضه بيضايقني في القفل والفتح , باختصار يمكن القول ان تصميم التابلوه على الرغم من ان الجزء العلوي فيه فخم جدا لكنهم للاسف ضيعوه بسوء خامة الجزء السفلي البلاستيكي وكمان ابعاده مش حلوة قوي وما ينفعش تحط علبة مناديل عليه لانها ببساطة ببتزحلق.
الفتيس اللي عندي مانوال وخاماته ممتازة وهو مكسي جلد من الخارج والفتيس نفسه محلى بنفس الخامة الابانوسية الموجوده في التابلوه والابواب.
يوجد مخدع جنب السائق للاحتفاظ بالسيديهات وبرضه خامته مش قد كده لكنه معقول واعتقد انه كان المفروض يعلى شوية وفيه امامه حامل اكواب يسع لكوبين وهو ظريف.
الكراسي الامامية قابلة للتحريك والامالة عن طريق بكر زى المرسيدس القديمة وهى مملة شوية لانها بتاخد وقت لو عايز تغير اوضاعها.
الكنبة الخلفية تتكون من جزئين التلت والتلتين ومن الممكن امالتها للامام لفتح شنطة السيارة عليها واستخدامها في تخزين الاشياء الطويلة انا بس كان نفسي ان يكون فيه مخدع خلفي واعتقد انه موجود في الاوتوماتيك البريميوم.
التنجيد قماشي وخامته معقوله لكن للأسف بيتوسخ بسرعة ولازم تعمله تنجيد جلد والفئات الاعلى فيها تنجيد جلد لونه بيج.
الكاسيت والنظام الصوتي بالسيارة ما شاء الله رائع والكاسيت سي دي نوعه كلاريون وبيشغل سيديهات ام بي ثري ودي ميزة ممتازة وكمان مجهز انه يشتغل بلو توث بس مش عارف اشغلها ازاى.
التكييف بتاعها معقول لا هو ممتاز ولا هو سيئ ولكن اداؤه اقل من الياباني بس هو مش بيأثر على اداء العربية بالسلب.
عدادات العربية دائرية وشكلها ظريف والاضاءة لونها احمر زى البي ام وعداد الكيلمترات ديجيتال وفيها عداد رحلات وساعة ديجيتال.
الشنطة الخلفية واسعة جدا وكافيه انها تشيل شنط كتير واعتقد انها 450 لتر تقريبا ويمكن فتح الكنبة الخلفية عليها.
الاضاءة الخارجية مش عالية والعالي تحس انه الواطي واعتقد انها كانت المفروض تبقى اعلى شوية والاضاءة بتاعة فوانيس الشبورة معقولة وهى مفيده الى حد ما في كشف المطبات بتاعة بلدنا المحروسة اللي بالهبل.
العربية من جوة واسعة بشكل غير طبيعي واعتقد انها معموله عشان الاحجام الكبيرة وبتقعد فيها مرتاح جدا.
العربية وانت سايقها بتحس انها كبيرة قوي زى البيجو 505 مثلا.
نيجي بقى للاداء بصراحة العربية اول ما تيجي تطلع بيها بتحس انها كسلانه شوية يعني مش بتستجيب معاك بسرعة لكن على السرعات العالية العربية ما شاء الله سريعة جدا وبتستجيب جدا وفيها انذار سرعة بيشتغل على سرعة 130 , اقصى سرعة جبتها بيها كانت 160 وكانت ممكن تجيب اكتر لكن انا اصلي جبان حبتين فقلبي ما طاوعنيش اني اجيب اكتر من كده وخصوصا انا طرقنا ما تستحملش السرعات العالية دي وعلى فكرة عداد العربية فيه لغاية 240 لكن اعتقد انها ممكن تجيب 190 او 200 لو قرصت عليها.
استهلاك البنزين تقريبا 13 كم/ لتر وده استهلاك معقول من وجهة نظري ومع التكييف ممكن يكون 12كم/لتر.
ثبات العربية مالوش حل والعربية تحس انها مكلبشة في الارض وانا اخدت بيها ملفات على 120 كم.
العفشة تحس انها ناشفة سنه واعتقد ان ده سببه الجنوط الاسبور وكمان يمكن عشان يزودوا الثبات.
العربية مش واطية قوي لكن لو العربية محملة ال 5 افراد ممكن تخبط في المطبات العشوائية اللي الناس بتعملها امام بيوتها لكن المطبات القانونية المطابقة للمواصفات مش بتخبط في العربية.
العزل الداخلي للكابينة معقول لكن فيه صوت عامل زى ما تكون مشغل شريط فاضي في الكاسيت مش عارف ايه سببه وان شاء الله اقولهم عليه في صيانة ال 5000 كم.
التوكيل معقول بس لازم تروح بدري قوي عشان تقدر تخلص في نفس اليوم وانا رحت في رمضان ووصلت هناك الساعة 7 الصبح مع انهم بيفتحوا 9 ونص ومع ذلك لقيت 5 عربيات امامي قلت يمكن الناس بتبيت في التوكيل :D .
المشاكل اللي قابلتني في العربية بعد اسبوع تقريبا الزجاج بتاع السائق فتح ومرضيش يقفل وكانت مشكلة لأني مش بأبيت العربية في جراج وغطيتها بس فضلت صاحي طول الليل وكل شوية اطلع ابص عليها لحد ما النهار طلع رحت واخدها وطالع على التوكيل وكانت مكنة الزجاج معلقة وصلحوها.
العربية اتخبطت وهى واقفة ومتغطية من واحد الله يسامحه كان بيعلم ابنه السواقة كسرلي فيها الفانوس الشمال والاكصدام اتطبق واتكسر من تحت والراجل كتر خيره جابلي فانوس جديد واكصدام جديد اسود مش مرشوش بس لغاية دلوقت ما عملتهاش وربنا يسهل واعملها على اول الاسبوع الجاى مع ان فيه ناس بتقولي سيبها عشان العين :D .
العربية بصفة عامة انا راضي جدا عن قراري بشرائها واتمنى من ربنا انه يفضل كده على طول هى بس لو تنتشر شوية قطع الغيار تنتشر وتتواجد عند ناس كتير وما يبقاش الواحد مربوط بالتوكيل والكام موزع الموجودين في القاهرة خصوصا اني باسافر كتير لبلدي الاصلية كفر الشيخ.
