الموضوع: أول حالة وفاة في مصر بأنفلونزا الخنازير

ياجماعه بكل هدوء السيده المصريه اصلا عندها القلب لما سافرت العمره تعبت جالها برد وحراره
ادوها ادويه معالجه بس اكيد هي ما استريحتش .....كل اللي عمل عمره عارف الواحد بيبقي ما بينامش علشان ميضيعش وقت
اكيد تعبتها اكتر ولما سافرت المدينه تعبت زياده وابتدي القلب يتاثر
وعلشان كده اتوفت ربنا يرحمها
الدعوه حتي من السعوديه ان مفيش مانع لعمل العمره....بس لو كنت تعاني من امراض مزمنه او سيده حامل او اطفال ويمكن التاجيل يبقي افضل تاجل لان انفلونزا الخنازير بقت منتشره في السعوديه عادي ةاي حد حتجيله عادي
ياما لو مصر تروح يبقي تتاخذ معاير السلامه القصوي...كمامات وغيره وكل واحد يستشير طبيبه قبل السفر ويتوكل علي الله
علي فكره اي حد عمل عمره او حج ....لازم يرجع بانفلونزا ...ده عادي
وكانت مع ناس كتيره بتموت بس محدش كان بيربط بين الانفلونزا وبين الموت للاسف
انا رجعت من الحج بانفلونزا اسيويه فضلت شهر راقده في البيت كنت ضايعه حراره والالام في جسمي كله لولا ان الواحد ساعتها كانت صحته كويسه
تخيل بقه لو كان عندي مرض مزمن كان ممكن اموت ....ساعتها كانو حيقولو ماتت من الانفلونزا .لا حيقولو اصلها كان عندها المرض الفلاني وكان مبهدلها
الخلاصه اللي تعبان ياجل السنه دي واللي الحمدلله كويس وناوي ياخد باله ويلتزم معايير الصحه القصوي

أنا مش عارف ليه الناس بتتهم الحكومة انها افتعلت أزمة انفلونزا الخنازير.

صحيح ان الحكومة تفتقد للمصداقية بسبب الفساد و ان الناس لا تثق في نوايا الحكومة ولا قدرتها على ادارة الأزمات، لكن ليه نوصل للدرجة دي من التشكيك؟ ليه كل مرة نتبنى نظرية مؤامرة جهنمية؟

الحكومة من طبيعتها التستر على الأزمات وانكار حتى وجودها مش افتعالها.
العالم الغربي عمل كده، قلل من شأن الوباء حتى لا يؤثر على اقتصاده.
بس دلوقتي، انجلترا فاقت واكتشفت ان عندها عدد مصابين بالفيروس تقريبا ضعف الموجود في بقية أوروبا كلها!. انجلترا متوقعة ان الموضوع يخرج عن السيطرة على نهاية الصيف.

هتقولي الحكومة بتفتعل أزمة للتغطية على أزمة أخرى، هقولك الحكومة مش ناقصة أزمات تؤثر على ثقة المواطن فيها (الثقة المنعدمة في الأساس).

ايه اللي حكومة عملته في أزمة الوباء دي اثقل المواطن؟
باستثناء اعدام الخنازير، الذي جاء الوباء لاعطاء حجة للقضاء على بؤر القذارة المسماه زرايب الخنازير، رد فعل الحكومة واجراءاتها الاحتياطية كانت جيدة وفعاله.

وبأكد عشان الناس متفهمنيش غلط.
أنا ساخط على الحكومة و أجهزة الأمن بسبب الفساد والفوضى و الفقر والعنف الذي وصل لدرجات غير محتملة.

بس نوصل لدرجة ان في جرائد المعارضة يتكلموا عن اجراءات مبالغ فيها في مطارتنا وان مثل تلك الاجراءات مش موجودة في مطارات أوروبا! طيب أوروبا فيها عشوائياتنا التي لو وصلها الوباء سينتشر كالنار في الهشيم؟ أوروبا عندها نظام صحي مرتهي زي نظام الصحة بتاعنا؟ كان حيكون ايه موقفنا لو الحكومة لم تتبع أي اجراءات وقائية. كانت قامت الدنيا ولم تقعد و كنا اتهمناها بعدم المبالاة بأرواحنا.