test drive bmw 2005 gulf spec

العربيه كانت عامله 35000 كم,قعدت معايا 3 ايام .
بالنسبه للشكل الخارجي فكان فيه اختلاف في الاراء,بالذات من ورا,بس اللون هوه اللي مكنتش متخيل انه يبقي جامد اوي كده و هو الابيض.المهم فتحت العربيه بالريموت و كانت بدايه الابهار,ضوء ابيض في نقاء الزينون نازل بشكل رأسي من الاكر علشان يورهالك في الضلمه(جامد جدا).
المهم دخلت العربيه لاني الصراحه مكنتش قادر(كان نفسي اسوق),العربيه من جوه الكراسي جلد و كهرباء قابله التعديل للارتفاع و العمق و المقود قابل التعديل للارتفاع و العمق كمان.العربيه فيها مثبت سرعه و الكاسيت سي دي عادي.الفتيس ستبترونيك و الجديد انه فيه dsودي وضعيه برضه اوتو بس بتحرق علي النقلات(زي اي اوبل 94-99 2000سي سي)و وضعيه بلس و مينس مانيوال.
المهم عايز اطلع بس الكارثه مش عارف المفتاح بتحط فين, و هو علي فكره شكله غريب , المهم بعد ما دورنا لقيت حاجه زي مخرج الusb تحت زرار الستارت,حطيت المفتاح و دوست ستارت و بدأت الرحله.
اول شويه قدت بالراحه علشان اتعرف عليها اكتر و بعد كده بدأ الشغل, كيك داون, وبعدين شعور فعلا صعب يتوصف.تسارع خاطف مع نغمات من الوتور تجنن.بعد كام كيك قولت لا لازم اطلع بره القاهره علشان مش عارف استمتع,قمت طالع مصر الاسكندريه, وبعد كام كيك علي كام تسارع لقيت نفسي في اليكس(تقريبا ساعتين بمتوسط سرعه 150كم).المهم نمتلي هناك 5 ساعات صحيت الصبح و قمت نازل علطول.قلت المرم دي بقي حبت كرفات علي الكورنيش و برضه انبهرت.علي فكره العربيه فيها نظام اسمه DTC(dynamic traction control) لما بيبقي شغال بيساعد في اللفات. المهم زهقت من الزحمه و لسه برضه عايز اسوق قمت قولت علي الغردقه ووالله ما فكرت في المسافه.المهم المره دي كانت الساعه تقريبا 2 و الطريق فاضي و انا عايز اعمل ركورد.المهم طلعت من اليكس الساعه 2 وصلت القاهره الساعه 3 بمتوسط سرعه190كم.عمري ما في حياتي كنت ممكن اتخيل اني ممكن أي واحد ياخد الطريق ده في ساعه.المهم مكنتش قادر استني,كنت عايز طريق العين السخنه,وبعد ما وصلت الطريق جه معاد التوب اسبيد.اول محاوله 210كم والتانيه 228كم والار بي ام كان علي 6600 لفه.العربيه دي يا جماعه فعلا بتغير احساس الواحد بالزمن و المسافه.
في حاجه معجبتنيش و هي ان العربيه دي ما بتخمسش(كنت علي الرمله كل م اعمل كيك مع لف المقود علي الاخر كان نظام DSC بيسحب الباور من العربيه حتي و النظام مطفي).
اجمل سياره سوقتها في حياتي رقم اني ما عرفتش اعمل بيها درفتات زي اللومينا.
http://www3.0zz0.com/2007/10/17/16/48195350.jpg

و الله عربيه اقل ما يقل مبهره

الف شكر يا باشا علي التقيم ده
اعتقد بعد ديه مش هتعرف تركب الشيري تاني :lol:

بغض النظر عن انك عقدتنا... :shock: :shock: مقلتلناش العربيه كام سي سي (؟؟3) :?:

اقتباس:

---

بغض النظر عن انك عقدتنا... مقلتلناش العربيه كام سي سي (؟؟3)

---

اعتقد انه مش هتفرق :lol:

فعلا هية عربية 100 100
بس فعلا كانت ؟؟3

و الف شكر على الريفيو الجامد دة

اقتباس:

---

المشاركة الأصلية كتبت بواسطة Anti_virus_abdo

اقتباس:

---

بغض النظر عن انك عقدتنا... مقلتلناش العربيه كام سي سي (؟؟3)

---

اعتقد انه مش هتفرق :lol:

---

لا يا ريس... تفرق كتييييييييييييييييييييييي يييييييييييييييييييييييير رر 8)

اعتقد حتكون 320 لو انا مش غلطان :)

العربيه كانت 320 ,150 حصان,200 نيوتن/متر .و اشكر تفاعلكم مع الموضوع وفعلا اللي يقدر يشتري bmw ما انصحوش بأي حاجه تانيه,لان فعلا العربيه دي تمثل قمه التفاعل بين الانسان و السياره.انا و انا مروح و بسلم المفتاح مكنتش قادر اتنفس.الحمد لله.

انا نفسي اجيب ال316 value الجديدة
اوتوماتيك و مش ب 360 ألف ب 255 بس :| :|

محدش يعرف يعمل تست دريف ل سفن سيرز !!!!

أنا ركبتها وسقتها السنة اللي فاتت بس مقدرش أوصفلك أي حاجة فيها لأان حاسس إني كنت بحللللللللللللللللللللللل للللللللللم

بس عامة لو قدرت أركبها تاني هاكتب التيست درايف بتاعها .

بالنسبه للاستاذ Ahmed Samy اللي عايز يشتري 316,ما انصحكش لانها underpowered اوي.جرب 520-523 مستعمل 1997-2001 ,اسعار هايله و عربيه ممتعه.جربتها و انشاء الله هبقي اكتب التست بتاعها,بس اجمالا احسن من 316[/size][/color]http://www4.0zz0.com/2007/10/18/10/32085553.jpg

بس يا استاذ NOVO انا بصراحه مافضلش شراء السيارات المستعمله طالاما ان هناك مقدره لشراء الجديد خصوصا فى العربيات العاليه و المعقده لانك بكده هتبداء معاها رحله قطع الغيار و ما ادراك ما قطع الغيار فى هذه الفئات
انا باقول ان الجديد جديييييد لسه بخيره حتى لو كانت BMW

تقييم ممتاز يا نوفو باشا شكرا ليك و ما تحرمناش من مشاركاتك يا راجل :)

شكرا يا استاذ نوفو على التقييم الرائع
وطبعا في النهايه مش كنت تقولي علشان اتفرج بس :D :D :D

شكرا جزيلا أولا

اقتباس:

---

يا استاذ NOVO انا بصراحه مافضلش شراء السيارات المستعمله طالاما ان هناك مقدره لشراء الجديد

---

+1

احب اشكر استاذhazem_khidrو استاذأبو عبدالله على الكلام الجميل ده و اتمني ان الواحد يقدر يرد للمنتدى جزء من المعلومات القيمه اللي بيقراها فيه .

يا نوفو يا اخويا انا معرفتش اكمل قراءة من اللون الأحمر اللى انت بتستخدمه :cry: :cry: عينيا زغللت 8) 8) 8)

تجربة جامدة انا جربت 525i المصري بس روعة
بس معرفتش اقرص عليها جامد
بس روعة البيمر في مواتيرها
كل ما تكبر كل ما تاخد شغل
عشان كدة احلى سواقة سواقة 325 و335 عشان حجم صغير وموتور جامد
-----------------
رجاء عدم الكتابة باللون الاحمر لانه لون خاص بالادارة فقط
قمت بتغيير لون جميع المشاركات

انا بتفق مع حضرتك في ان كل ما المحرك يكبر و الوزن ثابت يبقي الاداء ممتاذ,بس فيه نقطه,العربيات اللي في مصر 325 و 335 معظمها بيبقى متسقطله مواتير و حالته زفت.ركبت واحده 316 1996 متسقطلها 325 كانت طياره في الخط,بس في الملفات ضيعه و الثبات نيله.روعه البييمر و نقطه تميزه في توزيع الوزن 50:50,بيديك ثبات في الملفات و كأنك مشدود بمغناطيس للارض.انا كنت بلف مع طريق السخنه و انا مقفل العداد(عااااااااااادي جدا),اذا توزيع الوزن ده اتلعب فيه يبقي بالسلامه.

انا طبعا بتكلم عن الاوريجنال
لكن كمان فيه ناس بتسقط وهيا فاهمة مش مجرد انه موتور عربيتة فوت يقوم مسقط موتور اكبر ده تعبان في دماغة
زي اللي ربط عربية في 10 حصنة من غير لجام
لازم تظبيط الفرامل والعفشة والتعليق وكل التظابيط التانية عشان تتناسب مع القوة الزيادة للعربية