موضوع مختلف.. ياترى هييجي بكرة نندم فيه على النهاردة

السلام عليكم..

بداية لازم أقول القسم او اليمين المعتاد ... تجنبا لاتهامي بالزندقة السياسية

و الله العظيم انا مصري و بحب مصر و بحب لها الخير و انا مش عضو لا بالحزب الوطني و لا حزب وداد قلبي و لا اشجع لا التمديد و لا التوريث و لا الزمالك ... و كمان انا زيكم شايف مظاهر الفساد و المحسوبية و الواسطة و تردي الاوضاع الاجتماعية و العلمية و الدينية و الذي منه ...

و لكن

انا الحقيقة بتابع كل يوم مشاهد عمليات القتل الوحشية في العراق
في الصومال
في السودان
بتابع تحرش الولايات المتحدة بسوريا
و ايران

و برضو بشوف ثقل مصر الملموس (بدون مكابرة) على الصعيد الدولي سياسيا
لينا صوت مسموع بين الدول
و مهما كان .. سياسيينا بيقابلو بكامل الاحترام و التوقير في البلاد الاخرى
المؤتمرات اللي بتقام عندنا دي مش for fun
دي بتضيف لك رصيد متراكم من الوزن السياسي

و الناس اللي بتجيلنا المؤتمرات دي
مش بتجيلنا علشان القاعات الفاخرة و الهدايا النادرة زي دول الخليج
و لا بتجيلنا لأننا هنديهم معونات زي اوروبا و أمريكا
يا ترى حد فاهم قصدي


على مستوى الناس العاديين
من اقل من 10 سنين
كام واحد مننا كان عنده عربية و اتنين و تلاته في كل اسرة
صح بندفع جمارك
بس زمان برضو كنا بندفع جمارك بس الامكانيات اتحسنت
الموبايلات و اجهزة الكمبيوتر و اللاب توب اللي في ايدينا
بالمناسبة في 2007 كنت رايح السودان و نازل من مطار الخرطوم معايا اللاب توب بتاعي و اوقفني ضابط الجمارك بغلظة قائلا ( يا زول بنجولك هذا ممنوع دخوله الزودان) و لم ينقذني سوى مندوب شركة البترول اللي كان بيخلص لنا الورق
حياة المصريين او نسبة معتبرة منهم اتحسنت
بقى عندنا قائمة متنوعة من الاختيارات في الاكل و المشروبات و الملابس و الاحذية و الساعات
و الناس كلها لبست brands

مازالت في ازمة اسكان
بس برضو في مشروع اسكان الشباب خفف الموضوع شوية (احنا اللي بوظناه لما بعنا الشقق اللي اصلا محظور بيعها)
و في المدن الجديدة اللي بتنافس المدن برة في جمالها (التجمع - الشيخ زايد - اكتوبر - الرحاب - العبور و هكذا)

في مشاكل أمنية و تجاوزات للشرطة ده صحيح
لكن 95 % من المصريين بينامو امنين في بيوتهم
و بيتسوقو امنين في المحلات و المولات
و بيتفسحو امنين
و الشرطة لا تتعقب الا من يهدد أمن النظام و ده مش صح بس احنا كلنا (الناس العاديين) مبنعملش ده

على فكرة انا لا اغفل السلبيات بس انا بقول احنا عايشين
و عايشين في قلب اكبر بؤرة للتوتر في العالم
في النص بالظبط
بص مين جيرانك
اسرائيل
فلسطين
السودان
ليبيا
و الله نعم الجيران
مفيش بلد منهم حالها ماشي
و مع ذلك عايشين بمستوى معقول (اجمالا - متجيبليش افقر شريحة في مصر و تحطها على ترابيزة التشريح و انت اصلا مش بتديها حقها من دخلك)
احنا عندنا اقل سعر رغيف عيش في العالم
بالطوابير اه بس هتلاقيه و بعدين هو لو مش بالطوابير كان الغني و الفقير اشترو منه
و دي اعتقد نفس فكرة بنزين 80 او اي حاجة بتدعمها الدولة

انا اتعلمت في هندسة عين شمس كنت بادفع 49 جنيه مصاريف سنوية
ايه الدلع ده
فين البلد اللي عدد سكانها 80 مليون و في ظروفنا المادية و بتعمل كده


انا كتبت الموضوع ده خوفا من اننا نكون زي اخواننا الشعب العراقي اللي وقف فرحان بيتنطط و هما بيوقعوا تمثال (الطاغية) صدام حسين
و دلوقتي بيبكو ايامه

و مرحبا بالحوار العقلاني الملتزم

بداية احييك على هذا الرأي العاقل
انا اتفق معك في نقاط كثيرة لكن ده مايمنعش ان احنا برضه اقل من دول تانية كتير
واكيد في سلبيات كتيرة محتاجة تتغير بس مش عارف الصراحة مين المسؤول عنها
بلاش نتكلم في السلبيات و خلينا في الايجابيات اللي انت قلتها
الحمد لله

اقتباس:

---

المشاركة الأصلية كتبت بواسطة islamnabil

بداية احييك على هذا الرأي العاقل
انا اتفق معك في نقاط كثيرة لكن ده مايمنعش ان احنا برضه اقل من دول تانية كتير
واكيد في سلبيات كتيرة محتاجة تتغير بس مش عارف الصراحة مين المسؤول عنها
بلاش نتكلم في السلبيات و خلينا في الايجابيات اللي انت قلتها
الحمد لله

---

اكيد اقل من دول كتير
و اقل كمان من الي عاوزينه
و اقل اكيد من اللي نستحقه و تستحفه مصر
بس في ظروف

انا حضرت مرة اجتماع مع والدي كنت في الكلية و كانو عاوزين منسقين و مترجمين
و كان فيه دكتور الجنزوري و دكتور احمد جويلي (فاكرينهم) و ناس تانية من قيادات وزارة التموين و التجارة
و كان الكلام ببساطة ان مصر
مينفعش لا تتقدم اوي
و لا تقع
و ان الدول الكبرى و التوازنات في المنطقة تحتم ده
و ان محاولات مصر في التسعينات للحاق بالنمور الاقتصادية
قابلها عمليات ارهابية و توتر اقليمي لتطفيش السياحة و الاستثمارات

يعني الخلاصة
هما عاوزينا اقوياء بدرجة معقولة فقط لكي نستمر
و ضعفاء لنعتمد عليهم و لا نشكل خطرا

اقتباس:

---

انا كتبت الموضوع ده خوفا من اننا نكون زي اخواننا الشعب العراقي اللي وقف فرحان بيتنطط و هما بيوقعوا تمثال (الطاغية) صدام حسين
و دلوقتي بيبكو ايامه

---

بصراحه هزتنى اوى العبارة دى
-------------------------
متفق معاك فى كثير مما ذكرته

لكن
حكاية هما عايزينا نبقى فى منطقه معينه لا نخرج منها
دى غلطتنا مش قوتهم
غلطتنا اننا لما بنفكر نكبر بنفكر بفكر الاشاوس المغاوير
عايزين من اول ما نفكر نكون سادة العالم و لا حد يوقفنا
و النتيجه معروفه
--
لما نفكر نتقدم لازم نتقدم بخطى بطيئه انما ثابته
لكى نجعل البناء متماسك حتى لو توقف لمدة انما لا يزول ما بنيناه من قبل
للأسف لا يوجد عندنا "معظمنا" الفكر على المدى الطويل
---
امريكا نفسها لم تتقدم بين يوم و ليله
انما بدأت بأشياء مثل التعليم و الصحه

و هذا ما نراه اليوم فى دول مثل قطر
تقدم كبير و مطرد فى مجال التعليم و الصحه
"صحيح انهم محكومين تحت الوصاية بس ممكن ييجى عليهم بوم و يخلعوا الوصايه--بقول ممكن"
--------
وجهة نظر

اقتباس:

---

المشاركة الأصلية كتبت بواسطة الريس

اكيد اقل من دول كتير
و اقل كمان من الي عاوزينه
و اقل اكيد من اللي نستحقه و تستحفه مصر
بس في ظروف

انا حضرت مرة اجتماع مع والدي كنت في الكلية و كانو عاوزين منسقين و مترجمين
و كان فيه دكتور الجنزوري و دكتور احمد جويلي (فاكرينهم)
و كان الكلام ببساطة ان مصر
مينفعش لا تتقدم اوي
و لا تقع
و ان الدول الكبرى و التوازنات في المنطقة تحتم ده
و ان محاولات مصر في التسعينات للحاق بالنمور الاقتصادية
قابلها عمليات ارهابية و توتر اقليمي لتطفيش السياحة و الاستثمارات

يعني الخلاصة
هما عاوزينا اقوياء بدرجة معقولة فقط لكي نستمر
و ضعفاء لنعتمد عليهم و لا نشكل خطرا

---

الله ينور عليك انت جبت المفيد :S_thum1[1]:

لن يسمحوا لنا بالتقدم ولن يسمحوا لنا بالوقوع لأن حجم الفوضي التي ستنشئ عن وقوع دولة في حجم مصر ستؤدي الي فوضي عالمية وبحق.

حديثك ذكرني كيف تكالبت الدول الاوربية 10 دول منهم دول متحاربة للوقوف ضد محمد علي و ابنه ابراهيم بعدما استطاع انشاء جيش قوي والسيطرة علي السودان والحجاز و الشام لفترة 10 سنوات وكان علي وشك اسقاط الدولة العثمانية العجوز في اسطانبول لولا التدخل الاجنبي العسكري المباشر لان سقوط الدولة العثمانيةوانشاء دولة اسلامية جديدة فتية في مصر سيخل بموازيين القوي

يعني بالمختصر نحن نعيش في مرحلة التطويق و التطويع ...

لكن الا توجد طريقة للفرار بها من هذا الوضع و النهوض ؟!:colsmil:

اقتباس:

---

لا اشجع لا التمديد و لا التوريث و لا الزمالك

---

شكرا علي وجهة النظر المختلفة و لاثباتك حسن نواياك :Oc_sun1[1]:

اقتباس:

---

المشاركة الأصلية كتبت بواسطة mtak

بصراحه هزتنى اوى العبارة دى
-------------------------
متفق معاك فى كثير مما ذكرته

لكن
حكاية هما عايزينا نبقى فى منطقه معينه لا نخرج منها
دى غلطتنا مش قوتهم
غلطتنا اننا لما بنفكر نكبر بنفكر بفكر الاشاوس المغاوير
عايزين من اول ما نفكر نكون سادة العالم و لا حد يوقفنا
و النتيجه معروفه
--
لما نفكر نتقدم لازم نتقدم بخطى بطيئه انما ثابته
لكى نجعل البناء متماسك حتى لو توقف لمدة انما لا يزول ما بنيناه من قبل
للأسف لا يوجد عندنا "معظمنا" الفكر على المدى الطويل
---
امريكا نفسها لم تتقدم بين يوم و ليله
انما بدأت بأشياء مثل التعليم و الصحه

و هذا ما نراه اليوم فى دول مثل قطر
تقدم كبير و مطرد فى مجال التعليم و الصحه
"صحيح انهم محكومين تحت الوصاية بس ممكن ييجى عليهم بوم و يخلعوا الوصايه--بقول ممكن"
--------
وجهة نظر

---

متفق معك تماما

و انا بشجع تماما فكرة التقدم الجزئي البطيء و التركيزعلى جانب فآخر و ليس السربعة في كل الجوانب
انا قرأت موضوع على النت ان شيكاجو كانت اكبر مدن الجريمة في العالم
و جالها عمدة جديد
قالهم سيبكم من كل حاجة
و اظبطولي المرور
قيادات الامن قالوله انت بتخرف
قالهم لو اتظبط المرور البلد كلها حالها هيتظبط
و انخفضت معدلات الجريمة بنسبة 68 % في عام واحد
احنا بقى محتاجين المرور و الصحة و التعليم


اخيرا
ما لقيتش مثال غير قطر

اقتباس:

---

المشاركة الأصلية كتبت بواسطة dr zezo

الله ينور عليك انت جبت المفيد :s_thum1[1]:

لن يسمحوا لنا بالتقدم ولن يسمحوا لنا بالوقوع لأن حجم الفوضي التي ستنشئ عن وقوع دولة في حجم مصر ستؤدي الي فوضي عالمية وبحق.

حديثك ذكرني كيف تكالبت الدول الاوربية 10 دول منهم دول متحاربة للوقوف ضد محمد علي و ابنه ابراهيم بعدما استطاع انشاء جيش قوي والسيطرة علي السودان والحجاز و الشام لفترة 10 سنوات وكان علي وشك اسقاط الدولة العثمانية العجوز في اسطانبول لولا التدخل الاجنبي العسكري المباشر لان سقوط الدولة العثمانيةوانشاء دولة اسلامية جديدة فتية في مصر سيخل بموازيين القوي

يعني بالمختصر نحن نعيش في مرحلة التطويق و التطويع ...

لكن الا توجد طريقة للفرار بها من هذا الوضع و النهوض ؟!:colsmil:

---

متهيألي ان الفكر السياسي المصري حاليا اختار طريقة الموائمة و التعايش مع الواقع (عكس ايران مثلا و التي اختارت الفكر التصادمي) و اعتقد ان الحل الوحيد للخروج من هذا الوضع و النهوض هو بالاعتماد على مصادر دخل ثابتة و غير متأثرة بالاحداث السياسية (يعني ميكونش الدخل الاكبر من السياحة و البترول و الكلام ده) و الاعتماد على الاستثمارات المحلية عوضا عن الاجنبية
لو تفتكرو الحكومة عملت كده فعلا لما توسعت في اقراض رجال الاعمال اللي معظمهم قرر يكت من البلد بالجمل و ما حمل بدل ما يتوسع في استثماراته بالقروض دي

رأى معقول جدا و عاجبنى جدا لأنك بتفكر بتفائل لأننا طول ما إحنا باصين على السلبيات هنكره نفسنا و مش هنحاول نتحسن بس بردوا لازم نبق عارفين السلبيات عشان نحاول نحسنها و نلغيها خالص و عمر ما الحاجة بتيجى قفش

اقتباس:

---

الناس اللي بتجيلنا المؤتمرات دي
مش بتجيلنا علشان القاعات الفاخرة و الهدايا النادرة زي دول الخليج
و لا بتجيلنا لأننا هنديهم معونات زي اوروبا و أمريكا
يا ترى حد فاهم قصدي

---

اقتباس:

---

لكن 95 % من المصريين بينامو امنين في بيوتهم
و بيتسوقو امنين في المحلات و المولات
و بيتفسحو امنين
و الشرطة لا تتعقب الا من يهدد أمن النظام و ده مش صح بس احنا كلنا (الناس العاديين) مبنعملش ده

---

بجد دول حاجتين حلويين اوى ولو فكرنا هانلاقى اننا بجد متميزين وعايشين فى الامن ومصر بلد الامن والامان ومذكورة فى القرأن

للاسف ومش عايز افتح على نفسي نار
بس بفكر لو ان جمال مبارك هو اللى كمل ورا مبارك على اقل تقدير حنفضل زى محنا
حيبقى فى استقرار،
واستقرار دى كلمة والله مش قليلة
دى تمنها كبييييييييييييير اوى
حنصحى الصبح نلاقى شغلنا، حنلاقى الاقتصاد زى مهو، مش حنلاقى حد يجرب ولا يقولك قعدوا الستات فى البيوت
اه فى ناس مطحونة وحيفضل فى ناس مطحونة فى كل الانظمة

بس تانى حيبقى فى استقرار

انت عارف اية المشكلة عندنافى مصر ان رتيس الجمهورية مش مؤمن بامكانيات الشعب ولا بتاريخة ولا بقوتة ومش شايف غير امكانيات وموارد البلد المحدودة والزيادة السكانية
عايز اقولهم كفايةةةةةةةةةةةةةةةةةةةةة ةةةةةةةةةةةةةةةةةةةةةةةة
وبعدين لما تيجى تقارن مصر متقارنهاش بالسودان ولا ليبيا انتا كدة بتقارن 128 مع مرسيدس
قارن مصر بدول فى نفس المستوى والامكانيات الهند اندونيسيا الامارات كغيرهم وغيرهم انا شايف انها مقارنة غير متكافئة
وبعدين لما راجل الشرطة يحمى الشعب دة واجب علية علشان دة شغلة وغصب عنة لازم يعملوا
ومشاريع الشباب بص فى صفحة الحوادث وانتا تعرف الفساد الى لحق بيها زى اى حاجة فى البلد
وفى الاخر اح اقول كلمة الزعيم سعد بية زغلول
مفيشششششششششششش فايدة

طبعا احنا احسن من غيرنا .....
لكن غيرنا كتييير اقل مننا امكانيات .... وبقو احسن مننا بمراحل
لازم ننظر لمن هم افضل مننا لنتقدم ......وننظر لمن هم اقل مننا علشان نقدر نعيش وما نموتش م اليأس
....تعالو ننظر من المنظار الوردي ....
احنا احسن دولة في افريقيا وجزء كبير من آسيا
احنا عندنا اعلام بيشتم في الحكومة وهو مطمئن
احنا عندنا جيش قوي و يعتبر من اقوي جيوش المنطقة
احنا عندنا أمن مش موجود في دول اوربية كتير
احنا عندنا ماحدش بيموت م الجوع
.....
تعالو بقى ننظر من الزاوية العكسية
احنا عندنا موقع جغرافي متميز
احنا عندنا 3000 كيلو شواطيء
احنا عندنا بحيرات عذبة كتير .... ونهر ... اكبر نهر في العالم
احنا عندنا طقس معتدل طوال العام
احنا عندنا شمس 12 شهر في العام
احنا عندنا قناة السويس
احنا عندنا اكتر من ثلث آثار العالم
احنا عندنا موارد بشرية غير مستغلة بوفرة كبيرة
احنا عندنا ارض مستوية قابلة للاستصلاح في معظم انحاء مصر
احنا عندنا بترول
احنا عندنا غاز
احنا عندنا ثروات طبيعية من كافة انواع المعادن
احنا عندنا كوادر علمية وفنية متميزة
احنا عندنا الشعب كله من عرق واحد .... لايوجد صراع عرقي كما في بلاد كتيرة
احنا عندنا طبيعة الشعب طيب ومتسامح ومتدين باختلاف اديانه وطوائفه
احنا عندنا حضارة و تاريخ مترسخ في اعماق نفوسنا
.....
ايه اللي ينقصنا علشان نكون دولة .... كويسة .... مش ح اقول دولة عظمى
...
كان د. على لطفي استاذي في الجامعة منذ 28 سنة دايما بيقول .... مشكلة الدول النامية هي مشكلة ادارة وليست مشكلة امكانيات ..... اعتقد انه وضع يده على اصل المشكلة

اقتباس:

---

المشاركة الأصلية كتبت بواسطة ahmed4000

للاسف ومش عايز افتح على نفسي نار
بس بفكر لو ان جمال مبارك هو اللى كمل ورا مبارك على اقل تقدير حنفضل زى محنا
حيبقى فى استقرار،
واستقرار دى كلمة والله مش قليلة
دى تمنها كبييييييييييييير اوى
حنصحى الصبح نلاقى شغلنا، حنلاقى الاقتصاد زى مهو، مش حنلاقى حد يجرب ولا يقولك قعدوا الستات فى البيوت
اه فى ناس مطحونة وحيفضل فى ناس مطحونة فى كل الانظمة

بس تانى حيبقى فى استقرار

---

كده العملية بقت زي فتوات زمان

فتوة الحسينية اما يموت لازم الفتوة الجديد يبقى ابنه عشان الناس تفضل في امان

ملعون ابو ده استقرار اللي يبقى قايم عالغصب

اقتباس:

---

المشاركة الأصلية كتبت بواسطة lancerevolution

رأى معقول جدا و عاجبنى جدا لأنك بتفكر بتفائل لأننا طول ما إحنا باصين على السلبيات هنكره نفسنا و مش هنحاول نتحسن بس بردوا لازم نبق عارفين السلبيات عشان نحاول نحسنها و نلغيها خالص و عمر ما الحاجة بتيجى قفش

---

شكرا لذوقك

انا لا اتجاهل السلبيات اطلاقا
بس انا باحاول أوصّف الواقع طبقا للظروف و المعطيات اللي في ايدينا
عاوزين نغير سلبياتنا
من غير ثورة و كلام عنتريات
بل بخطط طويلة المدى يلتزم الجميع بها
و تتواجد الارادة السياسية لتنفيذها

اقتباس:

---

المشاركة الأصلية كتبت بواسطة الريس

اكيد اقل من دول كتير
و اقل كمان من الي عاوزينه
و اقل اكيد من اللي نستحقه و تستحفه مصر
بس في ظروف

انا حضرت مرة اجتماع مع والدي كنت في الكلية و كانو عاوزين منسقين و مترجمين
و كان فيه دكتور الجنزوري و دكتور احمد جويلي (فاكرينهم) و ناس تانية من قيادات وزارة التموين و التجارة
و كان الكلام ببساطة ان مصر
مينفعش لا تتقدم اوي
و لا تقع
و ان الدول الكبرى و التوازنات في المنطقة تحتم ده
و ان محاولات مصر في التسعينات للحاق بالنمور الاقتصادية
قابلها عمليات ارهابية و توتر اقليمي لتطفيش السياحة و الاستثمارات

يعني الخلاصة
هما عاوزينا اقوياء بدرجة معقولة فقط لكي نستمر
و ضعفاء لنعتمد عليهم و لا نشكل خطرا

---

أكيد دول كتير بتسعى لكدا , لكن تفتكر انت كحكومة بلد ماتقدرش تغير الرغبه دي عند دول العالم ؟
يا عزيزي السياسه ما هي الا تثبيت بشوية كلام ( باللغه العاميه ) ولكنها تعتمد على اصول وعلم بشكل احترافي ,, لو عندك حد بيعرف يثبت هيثبت العالم كله ,,, الله يرحم عبدالناصر كان الكل بيعمله الف حساب

على فكره اسرائيل تسعى بكل ما تملك من امكانيات للحفاظ على النظام الحالي والعمل على توريث الوريث للحفاظ على اتفاقية السلام وعدم فتح جبهة حرب جديده مع مصر فلو النظام اتغير اسرائيل سياستها هتتغير

لكن ان شاء الله احنا ادها وادود :)

اقتباس:

---

المشاركة الأصلية كتبت بواسطة ahmed4000

للاسف ومش عايز افتح على نفسي نار
بس بفكر لو ان جمال مبارك هو اللى كمل ورا مبارك على اقل تقدير حنفضل زى محنا
حيبقى فى استقرار،
واستقرار دى كلمة والله مش قليلة
دى تمنها كبييييييييييييير اوى
حنصحى الصبح نلاقى شغلنا، حنلاقى الاقتصاد زى مهو، مش حنلاقى حد يجرب ولا يقولك قعدوا الستات فى البيوت
اه فى ناس مطحونة وحيفضل فى ناس مطحونة فى كل الانظمة

بس تانى حيبقى فى استقرار

---

انا بقى عكسك
مش علشان هو ابن الريس
و لكن لاني شايف اخرين افضل منه و من داخل مؤسسة الحكم اللي موجودة حاليا
افراد قادرين على احداث التحول (التدريجي) الذي ننشده مع المحفظة على علاقات قوية مع جميع الاطراف

اقتباس:

---

المشاركة الأصلية كتبت بواسطة ak1981

كده العملية بقت زي فتوات زمان

فتوة الحسينية اما يموت لازم الفتوة الجديد يبقى ابنه عشان الناس تفضل في امان

ملعون ابو ده استقرار اللي يبقى قايم عالغصب

---

انا قلت راى وانا عارف انه مش حيعجب الناس
السياسة مفهاش يابيض ياسود
انت عندك توازنات كتير لازم تختار بينها
وتختار احسن الموجود مش احسن حاجة فى الدنيا

الاستقرار اللى انت بتشتم فيه ده هو اللى بيخليك تنزل من بيتك وانت مطمن على عيالك
وتنزل الشارع تلاقى عربيتك وتمشى بيها بامان
وتبقى عارف انك حتروح شغلك تلاقيه
الاستقرار ده حاجات كتييييييييييييير اوى اللى ميقدرهاش يبقى فعلا يرجع يقرا الموضوع تانى ويشوف العراق والصومال ويشوف تمن التغيير ويلعن فى الاستقرار زى مهو عايز


اقسم بالله العظيم انى لا فى حزب وطنى (وانا طفل كنت عضو لمدة شهرين) ولا عمرى شوفت جمال الا فى مؤتمر واحد تقريبا (ومش شخصيا طبعا)

أعتقد أساس حل المشاكل في مصر هي الديمقراطية وسيادة القانون

تخيلو كدة لو كل واحد في البلد دي من الوزير الى الغفير لما بيغلط بيتحاسب بالقانون

اقتباس:

---

المشاركة الأصلية كتبت بواسطة shok

انت عارف اية المشكلة عندنافى مصر ان رتيس الجمهورية مش مؤمن بامكانيات الشعب ولا بتاريخة ولا بقوتة ومش شايف غير امكانيات وموارد البلد المحدودة والزيادة السكانية
عايز اقولهم كفايةةةةةةةةةةةةةةةةةةةةة ةةةةةةةةةةةةةةةةةةةةةةةة
وبعدين لما تيجى تقارن مصر متقارنهاش بالسودان ولا ليبيا انتا كدة بتقارن 128 مع مرسيدس
قارن مصر بدول فى نفس المستوى والامكانيات الهند اندونيسيا الامارات كغيرهم وغيرهم انا شايف انها مقارنة غير متكافئة
وبعدين لما راجل الشرطة يحمى الشعب دة واجب علية علشان دة شغلة وغصب عنة لازم يعملوا
ومشاريع الشباب بص فى صفحة الحوادث وانتا تعرف الفساد الى لحق بيها زى اى حاجة فى البلد
وفى الاخر اح اقول كلمة الزعيم سعد بية زغلول
مفيشششششششششششش فايدة

---

عمي...
احنا ابناء منطقة ما
اقليم يسمى الشرق الاوسط
و ده له اعتباره في حسابات التقدم و التخلف
الدول اللي قارنتلك مصر بيها (ليبيا او السودان) هما جيراننا
و بالعكس دولة زي السودان بها موارد طبيعية تفوق مصر بمراحل

وبعدين راجل الشرطة ده .. و حتى الموظف الفاسد و اللي بيرتشي و بتوع المحليات و حتى انت لما بتمشي عكسي او تكسر اشارة او تبني دور مخالف او تعمل واسطة لابنك او اخوك او او او
مين الناس دول
ما دول احنا كلنا
تخيل يا اخي واحد بيزحف كده علشان يعيش
ينفع اخده سباق الماراثون ... مستحيل
ينفع اشده بعنف للناحية اللي تعجبني .. هأذيه
احنا محتاجين للتغير التدريجي و الحفاظ على المكاسب الحالية و تلافي السلبيات

اقتباس:

---

المشاركة الأصلية كتبت بواسطة aif

طبعا احنا احسن من غيرنا .....
لكن غيرنا كتييير اقل مننا امكانيات .... وبقو احسن مننا بمراحل
لازم ننظر لمن هم افضل مننا لنتقدم ......وننظر لمن هم اقل مننا علشان نقدر نعيش وما نموتش م اليأس
....تعالو ننظر من المنظار الوردي ....
احنا احسن دولة في افريقيا وجزء كبير من آسيا
احنا عندنا اعلام بيشتم في الحكومة وهو مطمئن
احنا عندنا جيش قوي و يعتبر من اقوي جيوش المنطقة
احنا عندنا أمن مش موجود في دول اوربية كتير
احنا عندنا ماحدش بيموت م الجوع
.....

---

و ضيف على كده
احنا اكبر قوة بشرية
و اعلى مستوى خبرات مهنية
و مصر قبلة الفن العربي
و مصدر العقول اللي عملت التقدم في كل الدول اللي حوالينا

اقتباس:

---

المشاركة الأصلية كتبت بواسطة aif

.....
تعالو بقى ننظر من الزاوية العكسية
احنا عندنا موقع جغرافي متميز
احنا عندنا 3000 كيلو شواطيء
احنا عندنا بحيرات عذبة كتير .... ونهر ... اكبر نهر في العالم
احنا عندنا طقس معتدل طوال العام
احنا عندنا شمس 12 شهر في العام
احنا عندنا قناة السويس
احنا عندنا اكتر من ثلث آثار العالم
احنا عندنا موارد بشرية غير مستغلة بوفرة كبيرة
احنا عندنا ارض مستوية قابلة للاستصلاح في معظم انحاء مصر
احنا عندنا بترول
احنا عندنا غاز
احنا عندنا ثروات طبيعية من كافة انواع المعادن
احنا عندنا كوادر علمية وفنية متميزة
احنا عندنا الشعب كله من عرق واحد .... لايوجد صراع عرقي كما في بلاد كتيرة
احنا عندنا طبيعة الشعب طيب ومتسامح ومتدين باختلاف اديانه وطوائفه
احنا عندنا حضارة و تاريخ مترسخ في اعماق نفوسنا
.....
ايه اللي ينقصنا علشان نكون دولة .... كويسة .... مش ح اقول دولة عظمى
...
كان د. على لطفي استاذي في الجامعة منذ 28 سنة دايما بيقول .... مشكلة الدول النامية هي مشكلة ادارة وليست مشكلة امكانيات ..... اعتقد انه وضع يده على اصل المشكلة

---

بس يا سيدي
الموقع الجغرافي ميزة و عيب
عندك نهر بس مش بينبع من عندك و دي مشكلة
عندك ارض قابلة للاستصلاح و معندكش مياه و لا فلوس لاستصلاحها
و محكوم بظروف اقليمية

على فكرة تركيا عندها كل اللي عندنا و اكتر
ملتقى 3 قارات
طقس جميل و بلاد اجمل
تاريخ عظيم تتباهى بيه بين الدول

شوف بقى الحرب على تركيا اللي مينفعش برضو يسيبوها تقع
ضموها للناتو و بعدين همشوها فيه علشان مرضيتش ببعض السياسات و القواعد
رافضين يضموها للاتحاد الاوروبي
عاملين لها صداع بمشكلة الاكراد
و قبرص

فلننظر بتأن لما يدور حولنا

اقتباس:

---

المشاركة الأصلية كتبت بواسطة الريس

ع
تخيل يا اخي واحد بيزحف كده علشان يعيش
ينفع اخده سباق الماراثون ... مستحيل
ينفع اشده بعنف للناحية اللي تعجبني .. هأذيه
احنا محتاجين للتغير التدريجي و الحفاظ على المكاسب الحالية و تلافي السلبيات

---

تدريجي .... ماشي ....
لكن لازم الناس تشعر ان فيه تغيير .....
احنا بقالنا 57 سنة بنقول تدريجي .... الديموقراطية بالتدريج والحرية بالتدريج ..... وفي الآخر مافيش حاجة اتغيرت .....
من حقك تقول اللي انت عاوزه ...... واحنا من حقنا نطنش .... ولا كأنك قولت حاجة
التدريج لازم يكون محسوس ..... ومحسوب
لكن التدريج بتاعنا ..... يعني مافيش اي تغيير

اقتباس:

---

المشاركة الأصلية كتبت بواسطة ak1981

كده العملية بقت زي فتوات زمان

فتوة الحسينية اما يموت لازم الفتوة الجديد يبقى ابنه عشان الناس تفضل في امان

ملعون ابو ده استقرار اللي يبقى قايم عالغصب

---

و مين قال كده
بس مينفعش برضو اجيب درويش الحارة و لا شيخ الجامع يبقى هو مكان الفتوة
و انا معاك مش عاوزين توريث
بس عاوزين حد يضيف و لا يسحب من الرصيد

اقتباس:

---

المشاركة الأصلية كتبت بواسطة الريس

و مين قال كده
بس مينفعش برضو اجيب درويش الحارة و لا شيخ الجامع يبقى هو مكان الفتوة
و انا معاك مش عاوزين توريث
بس عاوزين حد يضيف و لا يسحب من الرصيد

---

يا سيدي الفاضل

لو طبقنا الديمقراطية ومزورناش في الإنتخابات الناس هتختار هي عايزه مين ولو درويش الحاره مسك بالديمقراطية برضه هنقدر نشيله ونجيب الأصلح والعجله تدور ومش هنقف

اقتباس:

---

المشاركة الأصلية كتبت بواسطة medo55

أكيد دول كتير بتسعى لكدا , لكن تفتكر انت كحكومة بلد ماتقدرش تغير الرغبه دي عند دول العالم ؟
يا عزيزي السياسه ما هي الا تثبيت بشوية كلام ( باللغه العاميه ) ولكنها تعتمد على اصول وعلم بشكل احترافي ,, لو عندك حد بيعرف يثبت هيثبت العالم كله ,,, الله يرحم عبدالناصر كان الكل بيعمله الف حساب

على فكره اسرائيل تسعى بكل ما تملك من امكانيات للحفاظ على النظام الحالي والعمل على توريث الوريث للحفاظ على اتفاقية السلام وعدم فتح جبهة حرب جديده مع مصر فلو النظام اتغير اسرائيل سياستها هتتغير

لكن ان شاء الله احنا ادها وادود :)

---

احترم رأيك و اختلف معاك تماما
قد تستطيع ان تخدع بعض الناس لبعض الوقت
و لن يمكنك ان تخدع كل الناس كل الوقت

عبد الناصر
ماشي
طيب تذكر من قضى على الحياة النيابية
و كمم الافواه

طيب .. تذكر النكسة
و بعدها لاصوت يعلو فوق صوت المعركة

على فكرة اسرائيل تعمل حساب حاليا لغضب مصر لانها مستفيدة من رضاها
عواقب غضب مصر على اسرائيل اكبر من عواقبها ايام عبد الناصر
و ده ما يسمى القوة الناعمة

و مش عاوز اخش في مقارنة عصور و زعماء لاننا بنتكلم عن النهاردة و بكرة مش امبارح

اقتباس:

---

المشاركة الأصلية كتبت بواسطة ahmed4000

انا قلت راى وانا عارف انه مش حيعجب الناس
السياسة مفهاش يابيض ياسود
انت عندك توازنات كتير لازم تختار بينها
وتختار احسن الموجود مش احسن حاجة فى الدنيا

الاستقرار اللى انت بتشتم فيه ده هو اللى بيخليك تنزل من بيتك وانت مطمن على عيالك
وتنزل الشارع تلاقى عربيتك وتمشى بيها بامان
وتبقى عارف انك حتروح شغلك تلاقيه
الاستقرار ده حاجات كتييييييييييييير اوى اللى ميقدرهاش يبقى فعلا يرجع يقرا الموضوع تانى ويشوف العراق والصومال ويشوف تمن التغيير ويلعن فى الاستقرار زى مهو عايز


اقسم بالله العظيم انى لا فى حزب وطنى (وانا طفل كنت عضو لمدة شهرين) ولا عمرى شوفت جمال الا فى مؤتمر واحد تقريبا (ومش شخصيا طبعا)

---

وجهة نظر
بس عندي الاستقرار لا يساوي جمال مبارك بالضرورة
في اكتر من شخصية من اللي في المجموعة الموجودة حاليا احسن منه

اقتباس:

---

المشاركة الأصلية كتبت بواسطة aif

تدريجي .... ماشي ....
لكن لازم الناس تشعر ان فيه تغيير .....
احنا بقالنا 57 سنة بنقول تدريجي .... الديموقراطية بالتدريج والحرية بالتدريج ..... وفي الآخر مافيش حاجة اتغيرت .....
من حقك تقول اللي انت عاوزه ...... واحنا من حقنا نطنش .... ولا كأنك قولت حاجة
التدريج لازم يكون محسوس ..... ومحسوب
لكن التدريج بتاعنا ..... يعني مافيش اي تغيير

---

لا في تغيير و انا ذكرته
في مستوى معيشة المواطن و اتساع الحريات
و نقد الحكومة و الرئيس

و بعدين انا نفسي اسأل سؤال
هو احنا عاوزين الديمقراطية كوسيلة تؤدي للرفاهية و لا كغاية في حد ذاتها
ماليزيا مش ديمقراطية
و لا الامارات
و لا السعودية اكيد
و الرفاهية اللي مسموح بيها ليهم فيها لكل 10 ريال 7 ريال رايحين للغرب
و دي وفرة زائفة

احنا محتاجين ادارة واعية لظروف المنطقة و البلد و التوازنات

اقتباس:

---

المشاركة الأصلية كتبت بواسطة kh_talaat

يا سيدي الفاضل

لو طبقنا الديمقراطية ومزورناش في الإنتخابات الناس هتختار هي عايزه مين ولو درويش الحاره مسك بالديمقراطية برضه هنقدر نشيله ونجيب الأصلح والعجله تدور ومش هنقف

---

معاك
بس هل ده يمنع ان احيانا اختيارات الناس قد تودي بهم الى الهلاك
جورج بوش جه بالديمقراطية و خربها وقعد على تلها
صحيح جه بعده اوباما
بس احنا مش ناقصين تجارب تدخلنا في حرب او تلبسنا في حيطة

اقتباس:

---

المشاركة الأصلية كتبت بواسطة الريس

لا في تغيير و انا ذكرته
في مستوى معيشة المواطن و اتساع الحريات
و نقد الحكومة و الرئيس

و بعدين انا نفسي اسأل سؤال
هو احنا عاوزين الديمقراطية كوسيلة تؤدي للرفاهية و لا كغاية في حد ذاتها
ماليزيا مش ديمقراطية
و لا الامارات
و لا السعودية اكيد
و الرفاهية اللي مسموح بيها ليهم فيها لكل 10 ريال 7 ريال رايحين للغرب
و دي وفرة زائفة

احنا محتاجين ادارة واعية لظروف المنطقة و البلد و التوازنات

---

الديمقراطية ليست رفاهيه وليست هدف في حد ذاتها

الديمقراطية هي خلق مناخ صحي للعمل والتقدم .... وجعل الناس يؤمنون بما يعملون ويؤدون واجبهم بحب وايمان

يعني لو كل واحد حس انه له قيمه في البلد دي أكيد هيشتغل بضمير وهيحاول يفيد بلده ويحافظ عليها

لكن للأسف معظم الناس حاسه ان البلد دي مش بلدها وأي حد جاي من بره بيبقى له الأولويه في كل حاجه

احب اسجل اعجابي بروح التحضر الجامدة جدا اللي بتحكم الحوار

و جه في بالي حاجة
لما حصل حرب لبنان الاخيرة
كل اللبنانيين جريو على مصر

و في وسط ازمة العراق
الاف العراقيين جريو على مصر (مؤكد في محل بتاع واحد عراقي فتح جنبكم)

و ايام حصار ليبيا
مكانش عنهم غير مصر

نص ابناء السودانيين الموسرين
بيتعلمو في مصر

العرب بيتعلمو في مصر
و بيتفسحو في مصر

دي مصر يا اخواننا .. احنا بس اللي مش حاسين بقيمتها

اقتباس:

---

المشاركة الأصلية كتبت بواسطة aif

طبعا احنا احسن من غيرنا .....
لكن غيرنا كتييير اقل مننا امكانيات .... وبقو احسن مننا بمراحل
لازم ننظر لمن هم افضل مننا لنتقدم ......وننظر لمن هم اقل مننا علشان نقدر نعيش وما نموتش م اليأس
....تعالو ننظر من المنظار الوردي ....
احنا احسن دولة في افريقيا وجزء كبير من آسيا
احنا عندنا اعلام بيشتم في الحكومة وهو مطمئن
احنا عندنا جيش قوي و يعتبر من اقوي جيوش المنطقة
احنا عندنا أمن مش موجود في دول اوربية كتير
احنا عندنا ماحدش بيموت م الجوع
.....
تعالو بقى ننظر من الزاوية العكسية
احنا عندنا موقع جغرافي متميز
احنا عندنا 3000 كيلو شواطيء
احنا عندنا بحيرات عذبة كتير .... ونهر ... اكبر نهر في العالم
احنا عندنا طقس معتدل طوال العام
احنا عندنا شمس 12 شهر في العام
احنا عندنا قناة السويس
احنا عندنا اكتر من ثلث آثار العالم
احنا عندنا موارد بشرية غير مستغلة بوفرة كبيرة
احنا عندنا ارض مستوية قابلة للاستصلاح في معظم انحاء مصر
احنا عندنا بترول
احنا عندنا غاز
احنا عندنا ثروات طبيعية من كافة انواع المعادن
احنا عندنا كوادر علمية وفنية متميزة
احنا عندنا الشعب كله من عرق واحد .... لايوجد صراع عرقي كما في بلاد كتيرة
احنا عندنا طبيعة الشعب طيب ومتسامح ومتدين باختلاف اديانه وطوائفه
احنا عندنا حضارة و تاريخ مترسخ في اعماق نفوسنا
.....
ايه اللي ينقصنا علشان نكون دولة .... كويسة .... مش ح اقول دولة عظمى
...
كان د. على لطفي استاذي في الجامعة منذ 28 سنة دايما بيقول .... مشكلة الدول النامية هي مشكلة ادارة وليست مشكلة امكانيات ..... اعتقد انه وضع يده على اصل المشكلة

---

والله يا حج احمد انت جبت المفيد , بس انا مش عارف المركزيه هي الي واقفه ادام التفكير الجيد لاستغلال الموارد ؟

تفتكر لو وزعناها وعملناها بدل محافظات تكون ولايات , وكل ولايه ذاتية الحكم ولكنها في النهايه تحت حكم الرئيس

بكدا كل ولايه هتبدأ تظبط اقتصادها باعتمادها على نفسها وعلى مواردها وفي الاخر نشوف الولايه الي ماعندهاش موارد كافيه ونديلها من الفائض
ويكون حاكم الولايه بالانتخاب بالظبط زي انتخابات الرياسه


اعتقد الفكره هتكون افضل ولا ايه :)

باسم باشا
ليك وحشه
احييك على فكرة طرح الموضوع اولا واخيرا

باسم باشا
ليك وحشه
احييك على فكرة طرح الموضوع اولا واخيرا

اقتباس:

---

المشاركة الأصلية كتبت بواسطة الريس

على مستوى الناس العاديين
من اقل من 10 سنين
كام واحد مننا كان عنده عربية و اتنين و تلاته في كل اسرة
صح بندفع جمارك
بس زمان برضو كنا بندفع جمارك بس الامكانيات اتحسنت
الموبايلات و اجهزة الكمبيوتر و اللاب توب اللي في ايدينا

---

الجملة دى اكتر واحد وقفت قدامها

صاحبى من 3 سنين بالظبط كانوا عندهم عربية موديل 80 والموبايلات 3310 فى اسرتهم.

حاليا ما شاء 3 عربيات اقلهم ب90 الف جنيه والموبايلات n73 وانت طالع

ولما بنتكلم ويجى يقولى مش عارف ايه غالى بصراحة ببقى عايز اضربه.

باسم باشا
طبعا الذي ينكر ان هناك تطور يكون جاحد او مش بيشوف
لكن التطور يجب ان يكون متناسب مع التطور الذي يحدث حولك ......
وبعدين السواد الاعظم من الشعب المصري ..... تحت خط الفقر بكتير
التطور اللي بينشدة الناس
همو تطور التعليم .....للأسف التعليم من سيء الى اسوأ
هو تطور العلاج العام ..... ده بقى مش ح اتكلم عنه
هو تطور المجتمع ..... ماحدش في بلدنا لا يتمنى العودة للماضي السعيد
هو تطور التخطيط ..... احنا ماعندناش تخطيط اساسا والمفروض نستورده
هو تطور العدالة الاجتماعية وخاصة في توزيع الثروات ..... ودي قنبلة موقوته
....
مش مجرد اننا بقينا نركب عربيات و ناكل لحمة يبقى احنا تطورنا ...
لازم ننظر كمان للدول التي بدأت معانا وصلت فين
الهند
اليابان
الصين
ماليزيا
اندونيسيا
باكستان
الامارات
السعودية
.... جزر القمر ياراجل فيها تطور ..... مش احنا بس اللي بنتطور .....
برغم كدة انا بأؤيد ان مصر من الدول المستقرة امنيا واجتماعيا واقتصاديا وسياسيا .....لكن لازم نتقدم بشكل اكبر من كدة بكتير
زي ما وضحت في مشاركتي السابقة ...... احنا عندنا كل المقومات ..... مش ناقصنا حاجة ....لما تشوف اليابان .... ماعندهاش اي حاجة من اللي عندنا ..... وبقت فين ....في القمة
احنا مش بنقول نوصل للقمة زي اليابان وكوريا
بس نبقى في وسط الجدول .... مش مهددين بالهبوط زي الترسانة والمحلة :T_thum1[1]:

الخلاصة ..
إحنا عندنا القدرة ..
والقدرة لا تحركها إلا إرادة .. فأين الإرادة .. مفيش إرادة في اي حاجة حتى في اللعب والهلس

قطر التي ذكرت عندها إرادة للتطور والتغيير لكن فين قدراتها أصلاً .. مفيش ..

حينما تمتزج الإرادة بالقدرة والقدرة بالإرادة يصير التطور حتمياً

وحكاية القدرة والإرادة دي ليها موضوع تاني مفصل بإذن الله

وعلى هامش الموضوع وبعد تحيتكم على هذه الروح الجميلة ..
من يقول إن مصر لا تتطور للأفضل يكون غير منصف .. لكن السؤال المهم جداً ..
معدل التطور سرعته قد إيه ...... بطيئة جداً
ثمار التطور من يجنيها .......... فيه سوء توزيع للموارد وغياب للعدالة الاجتماعية بشكل يتسع بضراوة ..

أما حكاية الأمان .. فهي أسرع الإيجابيات المصرية انهياراً في السنوات الماضية ..
والأمان مش أمان مع النفس وعلى الممتلكات
الأمان هو الاطمئنان والأمل
الأمان أمل في بكرة .. وده للأسف مش موجود
الأمان أمان في استقرار حياتك مادياً وأدبياً واطمئنان ضد غدر الناس بصنوفهم .. غير متوفر

حديثكم يثير في الشجون .. وكان في نفسي كلام لم أقله بعد
تقبلوا خالص مودتي

حضرتك لو لاحظت هتلاقى الناس كلها دلوقتى تقولك زمان وايام زمان الاسعار كانت ارخص بكتير والحياة اسهل والعيشة احسن ياريتنا نرجع زى ايام زمان
الايام اللى احنا ماعيشنهاش اصلا بس بنسمع عنها
ولما تتفرج على اى فيلم ابيض واسود تلاقى الناس فى الستينات والخمسينات برده كانت بتقول الحياة بقت صعبة كده ليه وفين ايام زمان واسعار زمان

ما اقصده من كلامى هو حالة التمرد على الواقع والحنين والتحسر على الماضى التى يعانى منها الناس على اختلاف العصور

وبناءا عليه هييجى وقت بعد سنين والناس تقول على زمنا ده الله يرحم ايام زمان
ربما نملك الكثير من السلبيات ونقط الضعف التى نتمنى زوالها ونتمنى الوصول بمجتمعنا الى مستوى حياة وخدمات وامن افضل
لكننا لا نستطيع ان ننكر ان لنا من الايجابيات ما لا بأس به
ونحمد الله اننا لم نعاصر الاحتلال ولا الحروب بل نشاهدها فقط عبر التلفاز
ومن يرد النهوض بالمجتمع فليبدأ بنفسه

اسمحلى اتكلم فى الموضوع من ناحية اخرى
ناحية التقدم الذى لا يريده لنا الغرب كما اسلفت حضرتك
ذكرت انه ليس بقوة الغرب بقدر ما هو ضعف منا
و المثال الواضح على ذلك:
الدوله تتكون من ....و.....الى ان نصل الى العنصر الرئيسى فى الدولة و هو
المواطن "الشعب"
لو ننظر لأنفسنا
كام واحد عايز يتقدم
يتقدم فى شغله-فى حياته -فى سلوكه
طبعا كلنا هانقول انا انا
و لكن ماذا نفعل
ماذا تفعل لكى تتقدم فى عملك
هل تذاكر اشياء جديده
هل تنمى مهاراتك
هل..
هل.....
و السؤال الاهم "هل تفعل ذلك لمجرد لتتقدم و تفيد عملك ام لانتظار ترقيه و اذا لم تأتى او لم تلوح فى الافق يبقى اردم كل ما سبق و على قد فلوسهم و الكلام من هذا القبيل"
اظن لما كل واحد فينا يحاول ان يتقدم بنفسه و بابنه و عائلته يبقى كلنا سوف نتقدم
و ارجوكم لا اريد ان يتحول الكلام الى البلد و العيشه و الظروف
--
اتعامل مع هنود فى عملى و تكلمت معهم عن الطفرة التى حدثت فأجابنى فيما معناه
الناس بتاكل اى كتاب يقع تحت ايديها
بتشتغل شغل ناااااااار حتى لو بفلوس قليله الى ان يكتسب ما يلزم ليطالب بفلوس تقابل خبرته و مجهوده
"طبعا البلد لها دور "
انما الدور الرئيسى العنصر البشرى