إيه يا رجالة؟ هي خناقة ولا مقارنة؟
ليه كده بس يا رجالة؟ دا تبقى إنت إنتوا تمسكوا في خناق بعض بجد
يا جماعة كل واحد فيكوا همه إن هو يقول الكلام اللي هو شايفه سليم. وكل واحد عايز يوصل الراجل لبر الأمان. بس مش بالأسلوب ده
مبدأيا أنا طبيب أسنان. ولسه ما جبتش عربية، فكل مشاويري بأجر فيها عربيات. وتقريبا ما فيش عربية ما ركبتهاش.
وعلى فكرة أنا بأجر العربية وهي لسه زيرو يادوب عاملة 200 كيلوا بس وبخليها معايا لحد ما أعمل 5000 كيلوا وطبعا صاحب المعرض بياخدها مني وبيعملها الصيانات اللازمة في ميعادها.
أنا سواقتي رياضية وجميع مشاويري خليط بين المسافات المفتوحة زي إسكندرية الزراعي، والأماكن المزدحمة زي مدينة نصر، والأماكن الغير ممهدة الطرق والمطبات التي هي عبارة عن جبال صغيرة زي المنوفية.
على ضوء الحاجات دي أنا حقارن بين الإتنين, ومحدش يزعل من اللي حقوله. لأن دي تجربة شخصية بحته بدون التحيز لأي عربية.
أولا من الداخل
الإلنترا تفوز على البيرسونا أو الجين من حيث الراحة والرحابة في الصالون الداخلي.
بسبب مهنتي فدائما ظهري بيوجعني، بس لما ركبت الإلنترا وظبط الكرسي بتاعها حسيت فعلا إن ظهري مرتاح جدا ومش عايز أقوم من على الكرسي. والصالون طبعا واسع وتحسه برستيج وشيك ووقور.
البيرسونا برضه مريحة بس مش زي الإلنترا. والصالون رياضي بحت. يعني لو إنت راجل كبير وصحتك على قدك مش حتعجبك العربية خالص. إنما لو لسه شباب أو نفسك تركب عربية رياضية يبقى البيرسونا بلا منازع وخصوصا إن التابلوه والفيتيس والعدادات يحسسوك إنك راكب عربية سباق.
ثاينا نعومة السيارة
الإلنترا أول ما ركبتها كنت في حالة ذهول تام من درجة نعومتها لدرجة إني معرفتش إن الموتور داير غير من عداد الRPM
وطبعا العربية على الطريق ناعمة جدااااااااااا.
البيرسونا أقل في درجة النعومة ولكن. سواقة البيرسونا ممتعة إلى أبعد درجة. فعلا حاسس إنك راكب عربية سباق وحاسس بالطريق وحاسس بالعربية تحت إيدك. وسامع صوت الموتور الجميل اللي يحسسك إن في اسد في تحت الكبوت (صوت زئير الأسد على راي أخونا سبعاوي). صوت تحب تسمعه.
ثالثا قوة الموتور
طبعا الإلنترا تفوز. 121 حصان على بودي خفيف مقارنة بالبيرسونا110 حصان على بودي أتقل. ولكن الإلنترا تحس إن هي عايزة تجري لوحدها وده عيب مش ميزة. يعني إنت لو بتاخد U-turn ودست شوية بنزين بيقى صعب إنك تتحكم على العربية وتلاقيها بتحدف منك ، على عكس البيرسونا قوة الموتور متحكم فيها.
رابعا الثبات على الطريق
البيرسونا أكثر قليلا من الإلنترا، ولكن إنت مش حتحس بالفرق ده لو ما كنتش بتجري. البيرسونا كمان بتحسسك بالأمان وإنت ماشي يعني ما تخافشي منها على عكس الإلنترا اللي ممكن تحس بالخوف منها. بس بكرر الكلام ده لما تعدي ال 140 .قبل كده مش حتحس بفرق خالص.
خامسا النعومة على المطبات
طبعا في فرق نعومة لصالح الإلنترا. ولكن. الإلنترا لازم تدخل على المطب وإنت مهدي جدا وما ينفعشي تاخده سريع شوية. غير البيرسونا اللي ممكن تدخل على المطب وإنت مش مهدي قوي. كمان الإلنترا فيها عيب مضايقني جدا جدا جدا. لو واحد بس ركب في الكنبة اللي ورا يبقى لازم تعرض على اي مطب تدخله لأن العربية حتحك في المطب لو ماعرضتش. والله كنا 4 في العربية وكنت بعرض على كل المطبات ومع ذلك كنت بحك في كذا واحد. وطبعا دي حاجة بتوجع قلبي جدا.
لو إنت من سكان الأماكن التي لا تكثر فيها المطبات مش حتحس بالفرق ده، لكن لو زي حلاتي من المنوفية أو أماكن مطباتها كتير فنصيحة بلااااااااااااااااااااااا اش إلنترا. حتضايق منها جدا.
سادسا العزل
عزل البيرسونا أحسن من عزل الإلنترا بعد 120 يعني إنت جوا البيرسونا مش سامع غير صوت الموتور الجميل بس .لكن في الإلنترا سامع صوت الهوا وصوت الكاوتش على الطريق .هو صوت خفيف بس موجود
سابعا إستهلاك البنزين
الإلنترا موفرة عن البيرسونا لأن البودي أخف ولأن البيرسونا موتوها مصمم إنه يسحب كويس على RPM عالي يعني لازم تكون معدي 3 عشان تحس بقوة الموتور
ثامنا الأمان
دي من عيوب الإلنترا القاتلة، ما فيهاش أي إبن كلب للأمان.(أسف على اللفظ) بس فعلا حاجة تضايق جدا، توكيل زبالة، إزاي ينزل عربية بالجمال ده من غير ABS أو حتى AIR BAG
بيقولوا إن الموديل الجديد نازل بيهم، بس أنا لسه ما جربتوش
طبعا دي نقطة تفوق البيرسونا بلا منازع. ABS , AIR BAG بالإضافة إلى بودي أقوى بمراحل من بودي الإلنترا
تاسعا التقفيل
والله رغم كل اللي إتقال في حق البيرسونا أنا شايف إن شايف إن تفقيلها مش فيهوش حاجة. وزيه زي الإلنترا.
الناس اللي بتقول إن فيها عيوب تصنيع. هذه دعوة لزيارة منتدى مرسيدس، في هناك موضوع إسمه ( تجربتي مع ال E 320) أنا مش ححكي عن الموضوع ده ولكن روحوا إقرؤه.
عاشرا التوكيل والصيانة
أبقى أبو لمعة لو قلت لك إني أعرف حاجة عنهم. بس نصيحة روح زور منتدى بروتون ومنتدى هيونداي عشان تعرف الفرق.
حداشر :)
أنا ما بقتشي أدخل على منتدى المقارنة لأني لقيت كل واحد متعصب لعربية معينة وكله عمال يتخانق مع كله.
نصيحة إدخل على منتدى كل عربية على حدة، وهناك حتلاقي الحقيقة عارية من أي مجاملة. كل واحد بيحكي تجربته الشخصية مع العربية وما فيش ولا نقطة مش مفوتها من أول الكبوت للشنطة. :)
أتمنى إني أكون عرفت أساعدك
ومهما كانت العربية اللي حتجيبها فأسأل الله أن يعطيك خيرها وأن يكفيك شرها
والسلام ختام