كلام في الماتريكس و الكارينز من واحد من ملاك و معجبي الماتريكس
متخافوش انا مش جاي اشعر في الماتريكس على حساب الكارينز
بس انا شدتني المقارنة الدائرة اليومين دول على لسان الجميع في الشارع و الجرايد و هنا في نايل موتورز و قناة الاسرة و الطفل
طيب
الاول نجيب من الاخر و بعدين نشرح
السؤال هل الكارينز (من اللي شفناه منها لحد دلوقتي) احسن من الماتريكس
الاجابة : أكييييييييييييييييييييييد
و لكن
نستهدى بالله شوية كده لان المقارنة متنفعش بس بين عربية و عربية
اولا الماتريكس ارخص ب 14 الف جنيه كاملين (و لسة هترخص) عن الكارينز و انا كنت من سعداء الحظ اللي اشترو الماتريكس زيرو كوري ب 77 الف قبل عمو غبور يغليها ل 90 الف (تركي) و ده سعر خرافي جزافي انتهازي حزمبلي
ثانيا الكارينز جاءت مشفية تماما زي اختها الصغيرة الماتريكس
حيث لا وسائد و لا موائد و لا ايه بي اس و لا يحزنون
ثالثا قطع غيار الماتريكس متوفرة حاليا عن جميع المكوجيه و المنجدين و اسعار غبور في قطع الغيار متعتبرش وحشة اوي خصوصا لو عديت جنب منتديات الالماني و الياباني و الفرنساوي و انخلع قلبك لسماع صرخات المعذبين فيهم
نيجي بقى للكارينز
اشيك (بكتير الحقيقة)
اوسع (في الشنطة و العرض بين الكراسي)
أثقل في الوزن و مع ذلك جراية اكتر (تكنولوجيا محرك فيما يبدو يا عبدو)
خامات تقفيل الطف (مش انضف)
الخلاصة
معاك مياية كده خش على الكارينز من غير فصال
معاك 85 الماتريكس برضو حمالة أسية و ثابتة وجودها
و العاقبة عندكم في المسرات