الموضوع: وأخرتها مع سواقين النقل .. الله ينتقم منهم

أول امبارح كنت في كارفور ومعايا الأسرة .. خلصت شوبينج ومشيت من هناك كانت الساعة حوالي 1.30 صباحاً .. المهم مشيت بالعربية بتاعتي وانتو عارفين انها لسه حتى مكملتش ألف كيلو ( 777 كيلو ) وأخدت اليو تيرن اللي بعد بنزينة الأمارات وطبعا ماشي بالراحة ، بعد ما اخدت اليوتيرن كنت محافظ على شمالي وبانحرف تدريجيا عشان امسك الطريق العدل ويا دوب ظبط نفسي على الطريق وباصص في المراية اليمين ولسه برجع بعيني للمراية اللي في النص لقيت غول نقل جي وراية بسرعة تخوف ومش بيهدي حتى والطريق في شمالي يا دوب يعدي عربية 27 بالعافية ،

لما لقيته جاي وثابت على سرعته وخلاص قرب وأوشك انه يطحني .، فبدأت في الأنحراف يمين عشان افضيله الطريق بدل ما يشيلني ، وببص في المرايا اليمين عشان اشوف اللي جاي يميني ، واذا بغول آخر بنفس السرعة الجنونية جاي في يميني " واضح ان البهوات كانو بيتسابقو " ، واصبحت محاصر من النحيتين ، ومكنش فيه حاجة في ايدي اعملها غير اني هديت جدا وكلي امل انهم يعدو من جنبي من غير ما يشلوني معاهم ،

راح الغول اللي في شمالي فعلا معدي من شمالي وكان نصه على الأسفلت ونصه على الرمله وأصلا الجزيرة بعد حوالي 5 متر بتوسع ولو كمل كان هيدخل فيها ، راح معديني وكاسر يمين على سرعتة عشان يتفادى الجزيرة واللي على يميني بردو عدى ، وأنا كان دمي نشف وتلجت على الكرسي بتاعي ، والجديد بقه كمان انهم بعد ما عدوني مكملين بنفس السرعة وعمالين ياخدو غرز فظيعة بين العربيات وأكنهم راكبين فيراري ، وانا كل اللي جه في بالي وقلته لزوجتي وهي جنبي " اقسم بالله لو كان معايا مسدس لكنت حصلتهم وضربتهم بالنار من غير ذرة تردد ، لأنهم فعلا بيهددو اراوح ناس كتير واوشكو على الأفتاك بي"

مش عارف ايه اخرتها مع هذا الأستهتار البشع بالطريق وارواح وممتلكات الناس من هؤالاء السائقين عديمي المسؤلية والعقل والخلق وكل حاجة ، والله العظيم أنا رأيي انهم لو جلدوهم في المرور كل يوم الصبح مش كتير عليهم.

الف حمد لله علي سلامتك انت و اسرتك و ربنا يسترها معانا جميعا