الموضوع: 90 & 92 Fuel

بعد ارتفاع اسعار البنزين والذى منه فكرت اشوف ال 80 ممكن يستخدم فى اى انواع سيارات.
قريت شوية عالنت واتضح الأتى:
الرقم الاوكتانى بيدل على مقاومة الموتور للصفع (اللى هو التسقيف) والتسقيف ده بيكون نتيجة ان البنزين بيشتعل لوحده نتيجة الضغط العالى قبل ما تجيله الشراره اللى هى بيكون ميعادها قبل ما البستم يوصل لأعلى نقطة بلحظة بسيطة. ففي حالة الاشتعال المبكر لنتيجة ان الخليط بيشتعل والبستم لسه طالع فبيعاكس اتجاهه وده بيسبب فقد فى القدرة واهم من كده تقصير عمر الموتور بدرجه كبيرة.

الخلاصة ان نوع البنزين المناسب للموتور بيعتمد على كذا عامل من اكترها تأثيرا نسبة الانضغاط للموتور.
فيه عوامل تانية زى نوع سبيكة الموتور : لو الومنيوم بتتخلص من الحرارة اسرع وبكدة تقلل فرصة الاشتعال المبكر برضه.
بس يبقى نسبة الانضغاط من اهم المؤثرات.
كل ما نسبة الانضغاط تزيد الموتور يدى قدرة اعلى لنفس السعة، بس يحتاج بنزين بأوكتين اعلى.
رقم الاوكتين كل ما يقل البنزين بتكون سرعة اشتعاله اسرع فممكن يحصله اشتعال مبكر والموتور يسقف.
المهم بقى اللى اكتشفته انه لو استخدمت بنزين برقم اوكتان اعلى من اللى الموتور محتاجه مش بس بترمى فلوس فى الارض فى ثمنه الاعلى لكن كمان الاستهلاك ممكن يزيد وقدرة الموتور بتقل بسبب ان البنزين مش بيشتعل بسهولة فمش بيستغل بالكامل. وده يؤدى ان بقيته بيتحرق فى العادم او بيخرج مش كامل الاحتراق فيزيد التلوث وممكن يبوظ المحفز اللى فى الشكمان.

قلت اشوف نسب الانضغاط المختلفة واطبق الكلام ده. لقيت ان السيارات القديمة بتاعت الثمانينات بتتراوح من 7.5-8.5 والجديدة اعلى من 9.
امثلة:
132-2000 8.9
بيجو 504 1800 7.5
بيجو 504 2000 8.4
دايو لانوس 1500 9.5
فيات تمبرا 1600 9.2
فيات ريجاتا 1500 8.8
لانسر 1300 9.5
اوكتافيا/جولف/باسات 1600 10.3
باسات 1600FSI 12 (بتحتاج 95)
بولو 1000 10.5
المفاجأة بالنسبة ليا
جيب شيروكى 4000 8.8 !!!!!

ممكن تدور على مواصفات عربيتك فى carfolio.com او ابحث على اسم العربية وcompression ratio فى الجوجل

كده الكلام الى مكتوب قبل كده بيوضح
لما الناس اشتكت من اللانوس انها بتستهلك 92 اكتر من ال90 فده بسبب ان نسبة انضغاطها متوسطة. نفس الكلام بالنسبة لى فى الشيروكى
البولو بتستفيد من ال 92 قوى وتسقف بال 90 لأن نسبتها عالية
طيب ما الاوكتافيا نفس النسبة تقريبا بس بتمشى كويس بال 90. ده غالبا لأن السقف بيظهر لما يبقى فيه تحميل على الموتور وطبعا الموتور ال 1000 بيكون عليه حمل اكبر من ال 1600.


قلت طالما الشيروكى نسبتها واطية كده طب اجرب احط فيها 80 واشوفها هاتعمل ايه؟
طبعا فوجئت باللى باسمعه عن اختفاء ال 80 من المحطات لدرجة انى رحت محطة فى جسر السويس كنت عارف انها مافيهاش غير 80 و90 بس لقيتها حولت ل90 و 90 بس (مش 92 حتى)
المهم بعد مده لقيت محطة لسه بتبيع 80. حطيت 20 لتر اجربهم (ياسلام لو مشيت بيه، ده يبقى استهلاكها زى البولو كتكلفة)
النتيجة ان العربية مشيت بيه عادى جدا طول مالموتور ماعليهوش حمل كبير، يعنى اول تانى وتالت لو رجلى خفيفة. عالرابع لازم اخف رجلى شوية والا تبدا تسقف
مع ملاحظة انها اربع نقلات بس وممكن امشى بالتلاتة بس طالما مش مسافر (الثالث بيكون RPM على 3200 عند 120كم)
فالنتيجة انها سقفت برضه وده يقصف عمر الموتور بسرعة. بس ممكن لو خفيت رجلى جوة البلد امشى بيها كده.
طيب قلت اجرب اخلطه. حطيت عليهم 20 لتر 92 . النتيجه انها بقت ماشية 'طبيعى جدا.
فممكن احط نص التنك 80 ونصه 92 وتكون تكلفة اللتر كده 1.375 قرش يعنى بالاسعار القديمة.
المهم بقى تلاقى ال80.