الموضوع: اجيب الكارينز مانوال و خلاص؟

دلوقتي انا كنت قاعد سهران مش بافكر في الكارينز اصلا


احكي لكم اللي كنت بافكر فيه

انا كان اول عربية زيرو اشتريتها في حياتي كانت لانسر بومة 2005 .... المهم حصلت ضائقة مالية في 2007 و اضطريت ابيع برخص التراب في سبتمبر 2007 ....

المهم انها كانت مانوال ..... انا باعشق المانوال اصلا ..... هو ده اللي انا كنت قاعد افكر فيه و افتكر سواقتي للعربية و الاداء العالي و غيره

و دارت الايام و اتصرفت في قرشين و في اواخر نوفمبر 2007 جبت بومة تاني ..... بس كنت اتجوزت قلت اجيب اوتوماتيك عشان انا مراتي لخمة جدا و لو هتسوق مش هينفع تسوق غيره

دلوقتي بعد تقريبا سنتين انا متعايش معاه بس برضه بيوحشني المانوال ..... بيوحشني الدبرياج و الفتيس و تحكمي في العربية و البنزين اللي اقل بكتير (العربيتين كانوا زي بعض 1600 ...... فرق البنزين مهول)

و دارت الايام تاني و خلفت و احتجنا عربية عائلية قلت اجيب الكارينز و اسيب اللانسر للمدام


طبعا حاجز الكارينز اوتوماتيك ......


المهم من يومين بتوع المبيعات في كيا قالوا لي ان الاوتوماتيك هيتاخر لنص تمانية و كمان معاد مش اكيد

و لو عاوز تاخد المانوال 2010 نديهالك على اول تمانية هي في المينا اصلا .... و تاخد الفرق كاش حاضر



مش ده العامل الرئيسي - و لا حتى الثانوي في قراري


بس انا الشيطان وزني اخد ال 10 الاف جنيه الفرق (انا كنت دافع 110) و اجيب المانوال و اظبط اموري بال 10 الاف دول ..... نسافر انا و المدام مثلا .....

المهم انا برضه رجعت نفيت الفكرة من دماغي


و قلت خلينا في الاوتوماتيك - رغم اني مش باحبه اصلا - عشان لو المدام - اللي خلاص اتعلمت على اوتوماتيك و مش هينفع تسوق مانوال - اضطرت تسوق الكارينز


او لو كمان كام سنة ربنا فتح عالواحد و باع اللانسر و اداها الكارينز و جاب لنفسه عربية احسن

غير ان الاتجاه العام دلوقتي لشراء اوتوماتيك و كمان كام سنة للاسف المانوال هيندر و بيعه هيبقى صعب ........ زي في امريكا كده


ارجع و افكر و اقول طب و الاداء العالي بتاع المانوال

و الله انا نفسي هافة عليا اشوف حد معاه بومة مانوال استلفها منه ساعة اجري بيها !!!!!!!!!!


مش عارف احترت ...... لو هاخد المانوال لازم و ضروري اكلم السيلز بكرة عشان يحجزوا لي واحدة من الشحنة اللي جت بدل ما استنى ...... و الاوتوماتيك جاية نص اغسطس ...... و تاني اكرر الوقت مش عامل بالنسبة لي ممكن انتظر .... اي نعم انا مش هابيض لا انا هافرخ عالعربية :) ....... بس مش مشكلة لان اصلا دي سيارة اضافية للاسرة يعني ممكن نصبر عليها ..... مش مثلا بعت عربيتي و قاعد من غير عربية

رأيكم يهمني