الموضوع: فبرة عمود دركسيون اللانوس

المشاركة الأصلية كتبت بواسطة BASKOTA

حلو التوقيع الجديد يا محمد بس لا للتاكسى الاسود ليه
انا مجربتوش بصراحة ولا الابيض ولا الاسود

ربنا يخلليكى

التاكسى الاسود هو رمز الاستغلال... الاستغلال فى محاولة الحصول على اقبل مقابل مادى من الزبون فى اى مشوار و بيبقى فى الغالب معيار الحساب هو شكل الزبون (نضيف و متريش ولا لا) و جنسة (البنات سهل الضغط عليهم و احيانا تخويفهم) و اذا كان معاه حريم ولا لا (عشان منظر الراجل اللى معاها ساعة الحساب و كدة) و ركب منين و نازل فين (بغض النظر تماما عن المسافة بين النقطتين) و الوقت (صبح ولا ليل) و حالة الجو (امطار و خلافة) و بعد اخذ كل المتغيرات دى فى الاعتبار يقولك السواق انا حاخد 100 جنية فى حين ان المشوار لا يساوى اكتر من 3 جنية... اذا انت مطالب انك تدفع مبلغ من المال ليس له ادنى علاقة بطبيعة الخدمة اللى حصلت عليها... دا حتى فيه نكتة بتقول:

مرة واحد وقف تاكسى و قاله "تاخد كام و تودينى فين؟؟"
رد السواق و قال: "هات اللى معاك و خلليك هنا"

دا طبعا بقفرض ان السواق اساسا رضى يركبك... دا ساعات كتير يسمع المشوار و يسيبك و يمشى ولا اكنك بتشحت منة... و ممكن يقولك لا انا مش حخش هنا و ممشيش من هنا ولا اكن الزبون راكب ببلاش... و الظريف لما يقولك "اصلى حرجع فاضى"... طيب و انا مالى؟؟؟ هو انا مسؤل انك تركب زبون فى كل سنتى تمشية؟؟؟ طيب و افرض وصلتنى مشوار المفروض انك حتركب حد بعديا و ملقيش زباين... حترجع تاخد منى فرق؟؟؟ طيب افرض المشوار اللى حترجع فيه فاضى دة واحد شاورلك... حتسيبة لانك واخد اجرة زيادة منى ولا بعد ما تركبة حترجع ترجعلى جزء من الاجرة؟؟؟.... باختصار دة اسمة سرقة و نصب و احتيال

دا غير طبعا طريقة سواقتهم و تعطيلهم للمرور و بلطجتهم فى وسط الشوارع بعربياتهم اللى انتهت صلاحيتها من 50 سنة... بصراحة انا سعيد جدا بالتاكسى الابيض و اتمنى ان الحكومة تاخد قرار باعدام كافة التاكسيات السوداء حتى لو موديل 2010 عشان الناس دى تتعلم الادب و تحترم الزباين و تحترم اكل عيشها

ليذهب التاكسى الاسود الى الجحيم ( و غالبا السواق حيفاصل فى الاجرة برضة... على اساس انه حيرجع فاضى من هناك)

MMamdouh