توكيل كيا احترام يفوق الوصف
الحمد لله العربية اتصلحت بعد الحادثه و رجعت زيرو فعلا
http://www.nilemotors.net/Nile/a/81415-a.html
و احقاقا للحق زي ما عملت مداخلات اشتكي فيها من نقاط سلبيه متهيألي لازم اتكلم عن اي ايجابيات حصلت و اشركم معايا بالتفاصيل حتى تعم الفائده
تاريخ عمل المقايسه و استلام مركز ابو رواش للعربيه 25 / 6
تاريخ استلام العربيه 15 / 7
المده الفعليه لتصليح العربيه 5 ايام ( و ده بسبب عدم توافر كل قطع الغيار )
تكلفة المقايسه المبدايه 21500 جنيه
http://www.nilemotors.net/Nile/a/81790-a.html
التكلفه النهائيه 9900 جنيه
التفصيل
كبوت
مفصلات كبوت
كالون كبوت
فانوس امامي
صدر امامي
اكصدام امامي
شبكة نيكل
اعمال سمكرة ( رفرف ) و تركيب
اعمال دهان
الكبوت و الصدر كانوا خلصوا ( حوادث العربيه دي كتير ، العين عليها جامده اوي ، انا شفت خلال 3 زيارات لمركز الصيانه اكتر من 10 عربيات عامله حوادث متفاوته )
انا في الاول كنت فاكر ان موضوع قطع الغيار اللي خلصت ده فيلم و انهم مش عاملين ستوك لكل قطع الغيار لكني شفت بعد ما سلمت العربيه بيومين واحد بيستلم عربيه مغيره كبوت و كانت بقالها اسبوع
اتصلت بعد اسبوع من تسليمي العربيه اعرف الاخبار قالوا ان قطع الغيار وصلت الجمارك و في انتظار الافراج عنها ، ما استريحتش الا لما كلمت مدير قطع الغيار المهندس/ ناصر عن طريق الكول سنتر ، الراجل كان محترم جدا معايا و قال قطع الغيار حتكون موجوده خلال اسبوع و اداني موبايله الشخصي عشان اتابع معاه ، كلمته في المعاد وقالي ان الحاجه وصلت.
روحت المركز تاني يوم لقيتهم شغالين في العربيه ، قابلت مسؤول السمكره المهندس / سيد قابلني بكل لطف و جاوبني على كل استفساراتي و اداني موبايله عشان اتابع معاه و الصراحه انا زهقته تليفونات لغاية ما استلمت العربيه بس الراجل كان ذوق جدا معايا
و اخيرا روحت عشان استلم العربيه و انا قلقان من الفاتوره
الصراحة هما كانوا محترمين جدا مفيش حاجه كانت تنفع تتركب من الحاجات القديمه اللي في العربيه الا و ركبوها ، كان ممكن يغيروها و خلاص و انا مكنتش حتكلم ، لكن كان عندهم ضمير ووفروا عليا حاجات كتير
حتى ان مدير الصيانه المهندس / خالد فاروق راجع على الفاتورة بنفسه لقى ان كالون الكبوت مكانش محتاج يتغير اوي فاستبدلي قيمته (120 جنيه) بتغيير زيت ال 10000 كيلو مجانا لما اروح اعمل صيانتهم ان شاء الله ، و دي كانت لفته طيبه جدا منه.
معلش انا طولت عليكم بس كنت عايز اقلكم اد ايه انا كنت مبسوط من المعامله و المصداقيه في الخدمة اللي بيقدموها
و ان كانت العربيه فيها بعض السلبيات في نشوفية العفشه اللي ناس كتير بتتكلم عليها في المنتدى فيكفي ان للعربية وكيل محترم في صيانة عربياته و خدمته لعملائه
فعلا توكيل كيا احترام يفوق الوصف