حكايه مش ظريفه مع مرور اسكندريه

ازيكم يا شباب طبعا كلنا كنا في المصايف و انا كنت واحد من الناس اللي كان نفسها تستمتع بالمصيف لحد ما قابلت لجنه و كان الاتي :
انا ساكن في بيانكي " العجمي " كنت بصيف هناك يعني زي كل سنه فكنت رايح النخيل اقابل اصحابي و انا راجع بقي عند مدخل الهانوفيل كدا كان في ونش واقف قشطه يعني فجأه لقيت ظابط بينط قدام العربيه و كنت هشيله المهم وقفت قالي الرخص قلتله خير قالي الرخص اديتهاله قالي اتفضل اركن !!
ركنت و نزلتله خير !! قالي الكاسيت دا معمول علشان انت تسمعه مش تسمعهولنا قلتله الكاسيت مكانش عالي يعنيو بعدين انا كل اللي عندي 4 سماعات لا في صب و لا بازوكا و لا اي حاجه هما 4 سماعات عمي !!!!
المهم يمين شمال قالي دا اسمه تلوث سمعي و مش عايز اقولكم بقي علي قله الادب اللي كان فيها لدرجه اني اتنرفزت و شتمت و عملت حاجات غريبه انا مش متخيلها لحد دلوقتي و كان معايا 3 اصحابي و نزلو و اتخانقنا مع الكمين و كانت ليله طلع يجري علي العربيه و بيقولي افتح هفتشها و هنا بقي كانت المصيبه الكبري قلتله لا انت ولا مزير الداخليه يعرف يفتشها من غير اذن نيابه طيب وريني كدا بقي مركب فاميه ولا لا و جري علي العربيه يبص بجد منتهي قله الادب و الجهل بالقانون اللي المفروض هوا اللي بيطبقه ...........
اخر الكلام عايز كام يا عم و تدينا الرخص قال مفيهاش مصالحه فوريه ازاي يا عم الحج هوا انا مركب فاميه و الا سارينه علشان تقولي مفيهاش مصالحه فوريه " بما ان المخالفتين دول تستدعي سحب الرخصتين للفحص في المرور " قال هوا كدا يعني ايو هوا كدا و اتخانقنا تاني و قد كان منه الاتي :
1 : سحب الرخصتين في مخالفه لا تستدعي سحب الرخصتين
2 : عدم قبول المصالحه الفوريه و دا مش من حقه
3 : اعطائي ايصال ب 3 ايام فقط و انا رخصي جيزه و بما اني خارج الجيزه فا من حقي وصل باسبوع

خدت الوصل و مشيت كلمت المحامي قالي الكلام دا مش من حقه تماما و اعمله محضر اثبات حاله بالوصل دا و قد كان رحت علي مرور العجمي اللي بعد مدخل الهانوفيل بشويه و عملت محضر للظابط بالاتي :
1 : تعدي بالسب و مد الايدي
2 : سحب الرخصتين علي مخالفه لا تستدعي سحب الرخصتين
3 : ايصال ب 3 ايام مش اسبوع

النتيجه : الذهاب كل يوم لوحده المرور اللي عند كارفور الساعه 9 الصبح علشان الحق ادفع المخالفه و اخد الرخص قبل ما يسفروها علي مصر ساعتها ولا شهر علشان رخصي تيجي و دا لو جت اصلا تكديره يعني كل يوم لمده 3 ايام " المصيف اضرب " :_Alshmokh08[1]:
50 جنيه غرامه تلوث سمعي
الحمد لله بعد 3 ايام جبت الرخص من هناك و رحت للظابط بليل في نفس المكان لقيته واقف مكان الكمين دا و قد كان من الاتي بالحرف :

الرخص اهي و وريته الرخص و علي فكره مدفعتش فيها شلن المخالفه النص كم بتاعتك دي " علشان اغيظه بس " :shine[1]: و علي فكره انا عملتلك محضر في القسم علشان انت لا تعرف القانون ولا اي نيله و قلتله علي المحضر و قلتله انا بقي فاضيلك و عندي المحامي اللي مش هتبقي شغلته غير المحضر دا علشان تتعلم بس شويه يمكن دا يكون درس ليك

بالممناسبه هوا كان نقيب بس انسان قليل الادب


دي حكايتي مع مرور اسكندريه ربنا ياخدهم و اسف علي الاطاله


طبعا مش عايز انسا تامر اللي كان في اسكندريه وقتها و كلمته للمشوره بردو ربنا يخليك يا تيمو يا حببببببببببببي :D:D:D



نقل للمرور
مشرف عام.2

انت بردة نفست قلى فى دماغك على العموم يمكن الظابط دة يتعلم ميعملش كدة تانى مع الناس وحتى لو انت غلطان كان يتكلم بأدب على العموم اديك بتتعلم واكيد استفت اى معلومة فى الموضوع دة على العموم حمداللة على السلامة معلش ياباشا مقدرتش اجيلك واجازة سعيدة مع المرور

سعيده و مع المرور مظنش :d علي العموم الحمد لله انها جت علي قد كدا و ربنا ستر و مجتش في حاجه اكبر و الف شكر يا تمور

قدم فيه شكوى فى شرطة الانظباط

هو بصراحة قليل الذوق و يستاهل يتعمله محضر و بعدين التلوث السمعى فيه تصالح فورى دى اقل مايقال عنها قلة ذوق و قلة ادب
يعنى عارف ان العربية ملاكى جيزة و يديلك وصل ب 3 ايام بس دة غباء علنى هم دول الهيطببقوا قانون المرور الجديد؟
ربنا يرحمنا من قلة عقلهم و قلة ادبهم!!

السلام عليكم

على فكرة أنا ساكن فى نفس المكان اللى انت بتحكى عليه دة للأسف فى الهانوفيل على الشارع وعمرك ما تلاقى الضابط واقف إلا فى الأوقات اللى مافيهاش زحمة يعنى مثلاً فى الاوققات اللى بتتخنق فيها السكة ماتلاقيش ولا ضابط واقف وممكن عشان تعدى مدخل الهانوفيل تاخد من نص ساعة إلى ساعة فى حتة طوله 200 متر ودة طبعاً بسبب التنيات (السوزوكى) والمشاريع اللى واقفة تحمل فة نص الشارع.
أنا يوم الجمعة كنت بزور ناس فى أكتوبر عندنا وصدقونى أخدت ساعة عشان أطلع من أكتوبر لغاية الدوران اللى بعد المدخل اللى بيودى على الصحراوى وعلماً بأن التكدس والعطلة كانوا قدام نقطة المرور إلا إنى طول الساعة وشوية دول مالمحتش خيال ضابط أو حتى أمين أو عسكرى صغنن.
المرور بقى هيئة جباية أموال من راكبى السيارات فقط مالهموش وظيفة تانية وحتى وظيفة الجباية دى بيعملها بمنظرة وعنجهية وقلة ذوق
عموماً لنا الله

ومعلش بقى إن كان المصيف باظ

الحمدلله ع كل حال

حـــــــــــآجه قله آدب اصلا في مرور اليومين دول ...... هُمــآ يسحبو العربيات كلها من الشعب عشان يرتاحو ويريحونا

من سنتين تقريبا اتخنقت مع ظابط عشان كنت قالع الحزام
واللى فرسنى انى كنت لبسه قدامه و هو شايفنى بس قبل اما اخش يمين (جنب البنزينه)
قلعته عشان اسئل واحد فى الشارع ازاى اروح عمرو افندى
وركبت و فجأه لقيته ظهر قدامى مش عارف منين و عايز يسحب الرخصه عشان الحزام

قله ادب و الله و ربنا يرحمنا بقي

الحمد للله على كل شئ.
ياريت حضرتك تروح تعمل محضر فعلاً با الواقعة دي وتئادم فيه شكوى . وأكيد لو رحت لأي محامي وشرحتلو بزبت ايلي عملتو. علشان لو في أي حاجة عليك يألك. وحيؤلك بردو اى ايلي تعملو علشان تعمل المحضر وتقديم الشكوة. ومن فضلك متكسلش علشان كل واحد غلطان يتعاقب

السلام عليكم
مقالة من المصرى اليوم بخصوص موضوعنا وفيها إحصائيات جميلة
ياريت اللى عنده تعليق مايحرمناش منه

ضحايا قانون المرور

بقلم د. عمرو الشوبكى ٣٠/ ٧/ ٢٠٠٩حين قررت الحكومة إصدار قانون جديد للمرور، اعتبرناه فى وقتها نموذجاً لـ«الفشل الكامل» لأنه كرّس حالة الانفصام بين قوانين الحكومة والواقع المعاش، وكيف أنها لم تحاول - ولو على سبيل السهو - الحفاظ على أرواح الناس، فقامت بتحسين أحوال الشوارع ووضع إشارات مرور وقلصت من نزيف الأسفلت، ولكن ما شهدناه كان العكس تماما حيث زادت حوادث الطرق بصورة لافتة بعد أن استهدف القانون الجديد تقنين الجباية وليس إنقاذ أرواح المواطنين.
وحين طالعتنا صحف الأربعاء ٨ يوليو الماضى بخبر مقتل ٣٥ مصرياً وإصابة ٥٢ فى يوم واحد، تعاملنا مع الموضوع ببلادة متناهية، وكأن الأمر يجرى فى إسرائيل، ونسينا أن ما يجرى على الطرق هو انتحار جماعى وقتل منظم لأسر بأكملها نتيجة الرعونة الشديدة وغياب القانون.
فحين نستكمل يومنا بعد أن نقرأ خبرا يقول: «مصرع ١٦ مواطناً فى حادث أثناء عودة ميكروباص من العامرية بالإسكندرية إلى المنيا، حيث أكد الدكتور ميلاد صديق، مدير مستشفى ملوى، أنه تلقى إخطاراً بالحادث فى منتصف الليل وأعلن الطوارئ بالمستشفى ولكن للأسف جميع الضحايا لفظوا أنفاسهم فور وقوع الحادث وأغلبهم من الشباب»،
ونعتبر ذلك أمرا عاديا مادام بعيدا عنا (وهو فى الحقيقة أقرب لنا مما نتصور)، فإنه يعنى أن خللا حقيقيا أصاب وعى المصريين، وجعل أولوياتهم مقلوبة حين غاصوا فى غيبوبة التدين الشكلى، ومتابعة أخبار «كباتن» الكرة والفنانين ومسلسلات رمضان المقبلة، ولم يهتموا بالحفاظ على أرواح أبنائهم من هذا الوحش الكاسر الذى يسمى «نزيف الأسفلت»، خاصة إذا علمنا أن عدد من لقوا مصرعهم فى هذا الشهر اقترب من مائة شخص وذلك رغم وجود (أو بسبب) قانون المرور الجديد.
والواقع أن مصر لم تكن بحاجة إلى قانون مرور جديد، إنما أولا إلى تطبيق القانون القديم، ثم فقط إضافة مادة واحدة تغلظ العقوبة على من يخالف قواعد المرور بصورة تعرض حياة المواطنين للخطر، أى هؤلاء الذين يسيرون عكس اتجاه السير فى الطرق السريعة، أو يمشون بسياراتهم دون إضاءة أو يسيرون بمقطورة تخرج منها أسياخ الحديد لأمتار، أو هؤلاء الذين يقودون سياراتهم برعونة كبيرة دون أن يستخرجوا بطاقات شخصية، لأنهم مثل آبائهم تعلموا فقط مخالفة القانون.
أما القانون الجديد الذى مر على إعلانه فى الصحيفة الرسمية أكثر من عام (٩ يونيو ٢٠٠٨)، فلم يستطع معالجة أى من هذه المشكلات رغم عباراته القاسية وتهديده ووعيده، لأنه اهتم بالقضايا الشكلية وكل ما من شأنه أن يكرس سلطة الحكومة فى الجباية من السائرين عكس الاتجاه فى الشوارع المهجورة والجانبية، فتجد نفسك فجأة أمام لجنة هدفها تحصيل مخالفة السير عكس الاتجاه (١٠٠٠جنيه)،
فى حين لا تجد أياً من هؤلاء ولو مرة على الطرق السريعة يحاسبون سائقاً «كسّل» أن يسير ولو كيلو واحدا ويدخل من المكان الصحيح، فقرر أن يسير عكس الاتجاه، وتركته الشرطة بلا حساب لأن الثمن سيكون أرواح الناس فى حين أن الشوارع الجانبية (كثير منها بلا علامات ممنوع الدخول)..
إن السير فيها عكس الاتجاه يمثل فرصة لجمع الأموال، فاهتمت بها الحكومة أبلغ اهتمام (لا بتشجيرها أو رصفها) ونشرت رجالها فى كمائن مختلفة، خاصة فى الشوارع التى لا توجد بها علامات واضحة لـ«ممنوع الدخول».
لقد شاهدت بنفسى فى شارع مراد بالجيزة فى الجزء المواجه لفندق «الفور سيزون»، كيف تعاملت إدارة المرور مع يافطة حائرة لممنوع الدوران، فوضعتها أولا فى ناحية اليسار ثم عادت بعد فترة وجيزة ووضعتها فى ناحية اليمين دون أى مبرر، لأن الهدف ليس حل مشكلة مرورية عويصة، إنما اصطياد السائقين المخالفين، فاعتادت أن ترسل لهم فى صباح الجمعة والسبت لجاناً متكررة لمفاجأة السائقين المخالفين وتحصيل المخالفات على «الغلابة»، منهم الذين ليست لديهم واسطة ولا محسوبية.
والسؤال: لماذا يطبق القانون فى هذه الحالة الصغيرة (ونحن مع تطبيقه فى الصغيرة والكبيرة) ولا يطبق على المخالفات (والجرائم) الكبيرة، خاصة فى الطرق السريعة؟
إن اهتمام قانون المرور الجديد كان بأشياء ليست لها علاقة بحوادث الطرق ولا مشكلات الشوارع والمرور، إنما بأمور عجيبة ونادرة، منها مثلا الاكتشاف النادر الذى قدمته المادة ١٣ من قانون المرور الجديد، حين ذكرت أن: «كل مركبة تحمل أثناء سيرها لوحتين معدنيتين تصرفهما إدارة المرور المختصة بعد إتمام إجراءات الترخيص» وهذا أمر عبقرى نشكر المشرع على اكتشاف أن كل سيارة يجب أن تسير بلوحتين معدنيتين.
ورغم أننا لم نكن بحاجة إلى مثل هذا الاكتشاف، بقدر ما كنا بحاجة إلى تطبيق قانون المرور القديم على اللوحات المعدنية التى ظهرت فى هذا العصر، ومكتوب عليها «هيئة قضائية» دون أى سند قانونى، ويقوم بها بعض حراس العدالة والقانون، وكذلك تلك اللوحات الممسوحة بالعمد من قبل بعض ضباط الشرطة، وعكست الاستهانة الكاملة بالقانون، وتحتاج لتطبيق القانون القديم لا اختراع قانون جديد لن يطبق على هؤلاء المخالفين.
أما الأمر الطريف الثانى - فهو ما جاء فى المادة ٧٠، (وأيضا المادة ٧٢ مكرر)، من حديث عن عداد السيارات الأجرة، ونص على: «يعاقب بغرامة لا تقل عن ثلاثمائة جنيه ولا تزيد على ألف وخمسمائة جنيه كل سائق مركبة أجرة مرخصة بالعداد أو بدونه امتنع بغير مبرر عن نقل الركاب أو تشغيل العداد».
والحقيقة لا يوجد نص عبر عن حالة انفصام كامل عن واقع الناس مثل ما جاء فى هذه المادة المضحكة المبكية، فقد توقف العداد عن العمل مثلما توقفت مصر عن العمل منذ أكثر من ربع قرن، فالعداد توقفت تسعيرته على ٦٠ قرشاً فى ظل غلاء فاحش لأسعار البنزين ولا يوجد مبرر واحد يفسر عدم قيام الحكومة برفع قيمة تسعيرة العداد كل هذه السنين، إلا ربما انتظار مشروع أحمد عز الذى أعاد تشغيل العداد بتعريفة جديدة بعد شراء بعض السيارات القديمة بمبلغ بخس وإعطاء السائقين أخرى جديدة بها عداد.
إن هناك ما يقرب من ١٠ آلاف شخص يموتون سنويا نتيجة حوادث الطرق، إضافة إلى إصابة ٦٠ ألف آخرين، فيما تبلغ الخسائر المادية الناتجة عن هذه الحوادث ١٦ مليار جنيه، ونجحت مصر عن جدارة فى أن تحتل المركز الأول بين الدول الأكثر تعرضا لحوادث الطرق فى العالم.
والمفارقة أن الإحصاءات تقول إن ٥٠% من حوادث الطرق سببها الرئيسى سيارات النقل الثقيل، وعجزت الدولة عن وضع قانون جديد ينظم سير النقل الثقيل والمقطورات، وبقى نزيف الأسفلت مستمرا.
وجاء فى دراسة حكومية أن حوادث الطرق بلغت معدلات خطيرة تفوق المعدلات العالمية، حيث وصلت الوفيات إلى ٢٢٢ حالة وفاة لكل ١٠٠٠ كم من الطرق، مقارنة بالمتوسط العالمى، الذى يتراوح ما بين ٤ و٢٠ حالة وفاة.
من المؤكد أن هذا العام سيشهد حوادث طرق أكثر من العام الماضى، لأن القانون الذى أصدرته الحكومة لم يهدف إلى مواجهة هذه الحوادث، إنما جباية الأموال كلما أتيحت الفرصة، حتى لو كان ذلك على حساب آلاف القتلى وعشرات الآلاف من المصابين.

عادى جداً هى بقت جباية و قلة ادب و الحمد لله على كل شئ

جامد جداً و صح قوى المقال الصحفى ده و بيكشف العبقرية الفذة اللى بقى فيها المشرع المصرى للقوانين و ربنا يسترها على الجميع

فعلا
يبقا انت اكيد اكيد فى مصر

مرور اسكندرية الاسوأ على الاطلاق

ولكنه الاكثر مجاملات للحبايب وقرايب بتوع الكوسه قصدى الشرطة

جاهل
مامته اللي مدخلاه كلية الشرطة عشان يطلع يفتري عالناس...و الأمثلة من دول كتير .. وربنا يستر

اقتباس:

---

المشاركة الأصلية كتبت بواسطة successcre8or

جاهل
مامته اللي مدخلاه كلية الشرطة عشان يطلع يفتري عالناس...و الأمثلة من دول كتير .. وربنا يستر

---

يحرق أبوه لأبو اللي دخله الكلية دي في يوم واحد

قولوا ان شالله !

للاسف التصرفات الجاهلة دى بتدى انطباع سيء عن الكل , و فعلا لازم شكوى او محضر ليه و للى زيه و يتقرفوا زى ما بيقرفونا عشان يعرفوا ان احنا مش عبيد عندهم .