-
كنت هاموت النهارده
النهارد انا راجع على الدائرى بالسيارة الريجاتا انا وزوجتى بعد ما خرجنا من كارفور ، وبعد ما عدينا مخرج القطامية بشوية فى طريقنا الى مدينة نصر، وسيارة نقل فنطاس بمطقورة ماسك الشمال ومالوش دعوة بالدنيا واللى فيها
طبعا بعد ما يأست من انه يسيب الشمال رحت واخد يمين منه ومعدى، وإذا فجاه طقت فى دماغه انه يرمى يمين ، والكلام ده كان وانا بالضبط على يمينه وفى نص المسافة بين اول سيارته وآخرها (حوالى 20 متر لأانه جارر مقطورة) ولقيت الهول بيعينه جاى عليا من الشمال ، انا حطيت ايدى على الكلاكس ورميت الديريكسون يمين على الآخر علشان اكسب المسافة على يمينى قبل الرصيف ورجلى ماتت على الفرامل علشان يعدى منى قبل ما يفعصنى فى الرصيف، وتليت الشهادتين ونزلت عليا سكينة وهدوء اللحظات الاخيرة فى الحياه وانا براقب دوبل العجل الخلفى لمقطورة الفنطاس الفنطاس وهو عمال يقرب منى وانا بقرب من الرصيف وبقى كل همى ان الإصابة تكون بعيدة عن زوجتى، كل اللى انا بحكيه ده حصل فى مدى لا يتعدى خمس ثوانى، وانتهت الثوانى الخمسة بصوت طرااااااااااااااااااااااا ااااااااااااااااخ، وعربيتى حسيت انها اتشالت واتهبدتى من على الأض وكل اللى انا شفته المراية الشمال اللى جنبى طارت زى الصاروخ على الأسفلت واذ فجأتان اكتفت ان الطرااااااخ خلصت وان النقل عدا منى وانى لا اتقلبت ولا طلعت فوق الرصيف والعربية لا تزال تمشى على عجلاتها الأربع برغم الإصابة، والموتور داير واديها غيار لقيتها بتستجيب، كل ده فى الثانيتين التاليتن للطراخ، انا مصدقتش نفسى ولوهلة توهمت ان دى اوهام المتوفين حديثا اللى مش بيتقبلوا بسهولة فكرة انهم اتوفوا، لكن فى الثانية التالية اقتنعت اننى على قيد الحياه، الغريب فى الموضوع انى لم افقد اعصابى لحظة ، ولما سائق العربية النقل ركن على جنب ونازل يزعق كما هو تراثنا العتيد فى مسألة خدوهم بالصوت، انا حسبتها فى الثوانى التالية وقلت، انا لو وقفت واتخانقت هتبهدل بدون لازمة ، وفى نفس الوقت لو كبرت دماغى ومشيت هيطمع فيا وممكن يطلع يجرى ورايا، فرحت مهدى وقعدت اقول له اى كلام فاضى من جوة العربية واشوح بإيدى، وبعدين عملت نفسى هركن ورحت مشوحلة بإيدى بما معناه (غور فى داهية ، هو انا هاخد منك ايه يعنى) وواخد بعضى وماشى وموقفتش حتى ابص اشوف العربية فيها إيه ، بصيت بس فى مراية الصالون واطمنت ان مافيش حاجة بتخر، الغريبة ان السيناريو ده كله خد اقل من نصف دقيقة من أول ما ياست انه يسيب الشمال لحد (هو انا هاخد منك إيه يعنى)، لما وصلت البيت اكتشفت ان الحادث اسفر عن تدمير الرفرف الشمال والفانوس الامامى الشمال والمراية الشمال، بس انا كنت ولا زلت مخدر تماما بفكرة نجاتى من موت محقق، وكل ما افتكر منظر دوبل الكاوتش الخلفى المفترس وهو فى طريقه لاعتصارى بحس ان كلل حاجة فى الدنيا هايفة ومالهاش لازمة وبالتالى مش زعلان اوى على العربية ، وياللا اهو رزق السمكرى والبوهيجى،
-
الف حمد الله على السلامة يا باشمهندس خالد
ولا يهمك اللى يجيى فى الحديد كله يتعوض
-
الف سلامة عليك يا بشمهندس انت والعائلة و الحمد لله انكم بخير
و مش مشكله العربية المهم انتو بخير الحمد لله
-
الف حمدا لله على سلامتك يا باشمهندس خالد
-
حمدا لله على سلامتك وربنا يجازى السائق المتخلف! ويهدى جميع سواقين الترلات أصحاب الامخاخ التالفة!!
و أعتقد إنه كان نازل يقولك : "بالذمة يا بيه فيه حد يعدى اللى قدامه من على اليمين؟ إيه مش مذاكر قواعد المرور؟؟ أمال نجحت فى الامتحان إزاى؟؟؟"
وطبعا البيه السواق بيطبّق قواعد المرور بكل حذافيرها وبيقوم بمهمته فى ترويع الناس ومحاولة قتل الأبرياء على أتم وجه!!!
الحمد لله ان نجاك منه..
-
الحمد لله قدر الله وماشاء فعل و الف سلامة عليك بس انا لو كنت مكانك كنت نزلت عجنته علي الرعب اللي عيشك فيه ده :mrgreen:
-
we pray for that and thanks god that u still live,
-
قدر الله وما شاء فعل...وبرافو يا سبعاوى
-
فداك يا اخى والحمدلله انها جت فى الصاج وعلى قولك رزق السمكرى والبوهيجى واحتسب عند الله, فعلا الواحد فى المواقف دى يا اما بيهدى ويتصرف صح او بيفقد اعصابه ويتصرف غلط وفى الاخر كل دة بيبقى الهام من الله واعمار واقدار وخير انها جت على قد كدة , وطبعا هتقعدلك اسبوع كل ما تشوف نقل توسعله لحد ما تنسى وحمدالله على سلامتك يا ابو السباع :mrgreen:
-
حمد الله على سلامتك والحمد الله انها جت على قد كده
والله انا رأى ان المرور المفروض يشترط مؤهل عالى او متوسط علشان يمنح رخصه قياده لسواقين الدرجه الاولى على الاقل هنحد شويه من الاهمال والغباء الى الواحد بيشوفه على طول
الحمد الله على كل حال
Content Relevant URLs by
vBSEO 3.6.0 PL2